مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں ، میں نے ایک خاتون کے ساتھ شادی کر لی ، نبی اکرم صلی اللہ علیہ وسلم نے دریافت کیا : اے جابر ! کیا تم نے شادی کر لی ہے ؟ میں نے عرض کی : جی ہاں ! نبی اکرم صلی اللہ علیہ وسلم نے دریافت کیا : کنواری کے ساتھ کہ ثیبہ کے ساتھ ؟ میں نے عرض کی : شیبہ کے ساتھ ، نبی اکرم صلی اللہ علیہ وسلم نے فرمایا : کنواری کے ساتھ کیوں نہ کی ؟ کہ تم اس کے ساتھ خوش فعلیاں کرتے اور وہ تمہارے ساتھ خوش فعلیاں کرتی ، سیدنا جابر رضی اللہ عنہ کہتے ہیں : میں نے عرض کی : یا رسول اللہ ! میری بہنیں ہیں ، مجھے یہ اندیشہ ہے کہ کہیں وہ میرے اور میری بہنوں کے درمیان رکاوٹ نہ بن جائے ، نبی اکرم صلی اللہ علیہ وسلم نے فرمایا : ” عورت کے ساتھ اس کے دین ، یا اس کے مال ، یا اس کی خوبصورتی کی وجہ سے نکاح کیا جاتا ہے ، تو تم پر دین دار کو اختیار کرنا لازم ہے ، تمہارے ہاتھ خاک آلود ہوں“ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تا ہم اس میں یہ الفاظ نہیں ہیں : ” عورت کے ساتھ تین باتوں کی وجہ سے نکاح کیا جاتا ہے ۔ ۔ ۔ ۔ ۔ ۔ ۔ ۔ ۔ ۔ “ اس سے لے کر آخر تک کے الفاظ نہیں ہیں ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عورت کے ساتھ ان میں سے کسی ایک وجہ سے نکاح کیا جاتا ہے ، اس کی خوبصورتی ، یا اس کا مال ، یا اس کے اخلاق ، یا اس کا دین ، تو تم پر دین دار اور اچھے اخلاق والی عورت کو اختیار کرنا لازم ہے ، تمہارا ہاتھ خاک آلود ہو“ ۔
یہ روایت امام أحمد ، امام ابویعلیٰ اور امام بزار نے نقل کی ہے اور اس کے رجال ثقہ ہیں ۔

سیدنا عوف بن مالک اشجعی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بیمار کی عیادت کرو جنازے کے ساتھ جاؤ اور تم پر کوئی حرج نہیں ہے کہ اگر تم شادی میں شریک نہ ہو ، اور تم پر کوئی حرج نہیں ہے کہ تم عورت کی خوبصورتی کی وجہ سے اس سے نکاح نہ کرو ، کیونکہ یہ ہو سکتا ہے کہ وہ کوئی بھلائی لے کے نہ آئے ، اور تم پر کوئی حرج نہیں ہے کہ اگر تم کسی عورت کے مال کی کثرت کی وجہ سے اس کے ساتھ نکاح نہ کرو ، کیونکہ ہو سکتا ہے کہ اس کا مال بھلائی لے کے نہ آئے ، بلکہ دین دار اور امانت والی عورتیں تلاش کرو ( یا اُن کو ترجیح دو ) “ ۔
یہ روایت امام بزار نے نقل کی ہے اس کی سند میں ایک راوی یزید بن عیاض ہے اور وہ متروک ہے ۔