مجمع الزوائد ومنبع الفوائد

اسماعیل بن امیہ ، اپنے دادا کا یہ بیان نقل کرتے ہیں : ایک غلام تھا جس کا نام طہمان ، یا شاید ذکوان تھا ، ان کے دادا نے اس میں سے اپنے حصے کو آزاد کر دیا ، وہ غلام نبی اکرم صلی اللہ علیہ وسلم کے پاس آیا ، اس نے نبی اکرم صلی اللہ علیہ وسلم کی خدمت میں عرض کی : تو نبی اکرم صلی اللہ علیہ وسلم نے فرمایا : تم اپنی گردن میں آزاد ہو ، تم اپنی گردن میں غلام ہو ( یعنی کچھ آزاد ہو ، اور کچھ غلام ہو ) راوی کہتے ہیں : تو وہ غلام مرتے دم تک اپنے آقا کی خدمت کرتا رہا ۔
یہ روایت امام أحمد نے نقل کی ہے اور
یہ روایت ” مرسل “ ہے اور اس کے رجال ثقہ ہیں ۔
یہ روایت امام طبرانی نے نقل کی ہے ، وہ فرماتے ہیں : اسماعیل بن امیہ کے حوالے سے ، ان کے والد کے حوالے سے ، ان کے دادا سے منقول ہے ۔ انہوں نے
یہ روایت عبداللہ بن أحمد کے حوالے سے ، اُن کے والد کے حوالے سے ، ان کی سند کے ساتھ نقل کی ہے ، تو اس بات کا احتمال موجود ہے کہ میرے نسخے میں یہ لفظ نہ آیا ہو ، کہ انہوں نے اپنے والد کے حوالے سے ، اپنے دادا سے نقل کی ہے ، باقی اللہ بہتر جانتا ہے ۔

سیدنا عبداللہ بن سنان مزنی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” آدمی اپنے غلام میں سے جتنا چاہے ، اس کو آزاد کر دے ، اگر چاہے ، تو ایک تہائی حصے کو کر دے ، اگر چاہے ، تو چوتھائی حصے کو کر دے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، وہ بیان کرتے ہیں : اگر وہ چاہے ، تو پانچویں حصے کو آزاد کر دے ، اس کے اور اللہ تعالیٰ کے درمیان کوئی قہر ( یا زبردستی ) نہیں ہے “ ۔ اس روایت کی سند میں ایک راوی محمد بن فضاء ہے اور وہ ضعیف ہے ۔

سیدنا جابر بن عبداللہ رضی اللہ عنہ بیان کرتے ہیں : ایک غلام ، دس آدمیوں کی ملکیت تھا ، ان میں سے نو افراد نے ( اپنے ، اپنے حصے کو ) آزاد کر دیا ، اور دسویں فرد نے ، اپنے حصے کو آزاد کرنے سے انکار کر دیا ، اس نے عرض کی : یا رسول اللہ ! یہ میرا رتبہ ہے ، نبی اکرم صلی اللہ علیہ وسلم نے فرمایا : اس میں تمہارا رتبہ ہے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن فضل ہے اور وہ متروک ہے ۔

محمد بن عمر بن سعید بیان کرتے ہیں : ایک غلام دس آدمیوں کی ملکیت تھا ، انہوں نے اسے آزاد کر دیا ، ان میں سے ایک نے اس کو آزاد نہیں کیا ، وہ نبی اکرم صلی اللہ علیہ وسلم کی خدمت میں حاضر ہوا ، تاکہ اس شخص کے حوالے سے نبی اکرم صلی اللہ علیہ وسلم سے سفارش کروائے ، نبی اکرم صلی اللہ علیہ وسلم نے اس غلام کے بارے میں اس شخص سے بات کی ، تو اس شخص نے اپنے حصہ نبی اکرم صلی اللہ علیہ وسلم کو پیش کر دیا ، تو نبی اکرم صلی اللہ علیہ وسلم نے اس غلام کو آزاد کر دیا ، تو وہ غلام یہ کہا: کرتا تھا : میں نبی اکرم صلی اللہ علیہ وسلم کا آزاد کردہ غلام ہوں ، اس کا نام ” رافع ابوبہی “ تھا ۔
یہ روایت امام طبرانی نے نقل کی ہے ، محمد بن عمر نامی اس راوی سے میں واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا سمرہ رضی اللہ عنہ ، نبی اکرم صلی اللہ علیہ وسلم کے حوالے سے یہ بات نقل کرتے ہیں : ہذیل قبیلے سے تعلق رکھنے والے ایک شخص نے اپنے حصے کو آزاد کر دیا ، تو نبی اکرم صلی اللہ علیہ وسلم نے ارشاد فرمایا : وہ غلام آزاد شمار ہو گا ، کیونکہ اللہ تعالیٰ کا کوئی شراکت دار نہیں ہوتا ۔
یہ روایت امام أحمد نے ، اس سے پہلے والی حدیث کی مانند نقل کی ہے ، اور روایت کے یہ الفاظ ان کے نقل کردہ ہیں ، اس روایت کے رجال صحیح کے رجال ہیں ۔

سعید بن مسیب بیان کرتے ہیں : ہم نے تیس صحابہ کرام کے حوالے سے ، نبی اکرم صلی اللہ علیہ وسلم سے یہ بات یاد رکھی ہے کہ آپ نے ارشاد فرمایا ہے : ” جو شخص کسی غلام میں ، اپنے حصے کو آزاد کر دے ، تو وہ اس کی بقیہ قیمت کا ( دوسرے مالکان ) کے لئے ضامن ہو گا “ ۔
یہ روایت امام أحمد نے نقل کی ہے ، اس کی سند میں ایک راوی حجاج بن ارطاۃ ہے ، وہ ثقہ ہے ، لیکن وہ تدلیس کرنے والا ہے ، اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی غلام میں ( اپنے ) حصے کو آزاد کرتا ہے ، تو وہ ( دیگر شراکت داروں ) کے لئے ، ان کے حصے کے حوالے سے ، اپنے مال میں سے ضامن ہو گا “ ۔
یہ روایت امام بزار نے ابراہیم بن اسماعیل بن یحیی کے حوالے سے ، اُن کے والد سے نقل کی ہے ، اور یہ دونوں ضعیف ہیں ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی غلام میں ، اپنے حصے کو آزاد کر دے ، تو اس پر یہ لازم ہے کہ اس کے بقیہ حصے کو بھی آزاد کرے ، اگر اس شخص کے پاس مال نہیں ہوتا ، تو غلام اپنی قیمت کے حوالے سے مزدوری کرے گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی محمد بن اسحاق مروزی ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جب کوئی غلام مختلف لوگوں کے درمیان مشترکہ ملکیت ہو اور ان میں سے کوئی ایک اس کو آزاد کر دے ، تو غلام کی سب سے زیادہ قیمت لگائی جائے گی ، پھر وہ اس کی قیمت کا تاوان ( جرمانہ ) ادا کرے گا اور غلام کو آزاد کر دیا جائے گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مثنی بن صباح ہے اور وہ ضعیف ہے ، ویسے اس کی توثیق کی گئی ہے ۔

سیدنا عبادہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی غلام میں سے ، ایک حصے کو آزاد کر دے ، تو وہ اس کے بقیہ حصے کا ضامن ہو گا“ ۔

ایک روایت میں یہ الفاظ ہیں : ” تو اس پر یہ لازم ہو گا کہ اس کو مکمل آزاد کروائے ، اگر اس شخص کے پاس مال موجود ہو “ ۔
یہ روایت امام طبرانی نے نقل کی ہے اور اسحاق بن یحیی نامی راوی نے سیدنا عبادہ رضی اللہ عنہ کا زمانہ نہیں پایا ہے ۔

سیدنا عبداللہ بن مسعود رضی اللہ عنہ فرماتے ہیں : جہینہ قبیلے سے تعلق رکھنے والے دو آدمیوں کے درمیان ایک غلام مشترکہ ملکیت تھا ، ان دونوں میں سے ایک شخص نے اسے آزاد کر دیا ، وہ شخص نبی اکرم صلی اللہ علیہ وسلم کی خدمت میں حاضر ہوا ، تو نبی اکرم صلی اللہ علیہ وسلم نے اسے اس کے ضمان کا پابند کیا ، اس شخص کے پاس کچھ بکریاں تھیں ، جو ایک سو کے قریب تھیں ، اس نے انہیں فروخت کیا اور اپنے ساتھی کو اس کو اس کی قیمت دی ۔
یہ روایت امام طبرانی نے نقل کی ہے ، اس کی سند میں ایک راوی حسن بن عمارہ ہے اور وہ ضعیف ہے ۔