مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے وصال کے قریب ایک صحیفہ منگوایا ، تاکہ اس میں ایسی تحریر لکھ دیں کہ جس کے بعد لوگ گمراہ نہیں ہوں گے اور گمراہ نہیں کریں گے ، گھر میں اس بارے میں آوازیں بلند ہوئیں ، سیدنا عمر بن خطاب رضی اللہ عنہ نے بات چیت شروع کی ، تو نبی اکرم صلی اللہ علیہ وسلم نے یہ ارادہ ملتوی کر دیا ۔
یہ روایت امام ابویعلیٰ نے نقل کی ہے ۔ انہوں نے ایک روایت میں یہ الفاظ نقل کیے ہیں : نبی اکرم صلی اللہ علیہ وسلم نے اس تحریر میں اپنی امت کے لئے یہ لکھوانا تھا کہ نہ وہ ظلم کریں اور نہ ان پر ظلم کیا جائے ۔ ان تمام روایات کے رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ( جانور کے ) کندھے ( کی ہڈی ) منگوائی ، آپ نے فرمایا : میرے پاس کندھا ( یعنی جانور کی کندھے کی ہڈی ) لے کر آؤ ! تاکہ میں تمہیں تحریر لکھ دوں ، تم میرے بعد کبھی اختلاف نہیں کرو گے تو آپ کے پاس لوگوں کے درمیان بات چیت شروع ہو گئی ، حاضرین میں سے ایک خاتون نے کہا: تم لوگوں کا ستیاناس ہو ، نبی اکرم صلی اللہ علیہ وسلم نے تمہیں حکم دیا ہے ، تو حاضرین میں سے کسی نے کہا: تم خاموش رہو ! تمہیں عقل نہیں ہے ، نبی اکرم صلی اللہ علیہ وسلم نے فرمایا : تم سب میں سمجھ داری نہیں ہے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا ابتدائی حصہ منقول ہے ۔
یہ روایت امام طبرانی نے نقل کی ہے ، اس کی سند میں ایک راوی لیث بن ابوسلیم ہے اور وہ تدلیس کرنے والا ہے ، اس روایت کے بقیہ رجال ثقہ ہیں ۔

سیدنا معاذ رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے دس کلمات کی وصیت کی تھی آپ نے ارشاد فرمایا : ” تم کسی کو اللہ کا شریک نہ ٹھہرانا ، خواہ تمہیں قتل کر دیا جائے یا تمہیں جلا دیا جائے ، اور تم اپنے ماں باپ کی نافرمانی نہ کرنا ، اگرچہ وہ دونوں تمہیں یہ حکم دیں کہ تم اپنے اہل خانہ اور اپنے مال سے نکل جاؤ ، اور تم فرض نماز جان بوجھ کر ہرگز ترک نہ کرنا ، کیونکہ جو شخص فرض نماز جان بوجھ کر ترک کر دیتا ہے ، اس سے اللہ تعالی کا ذمہ لاتعلق ہو جاتا ہے ، اور تم شراب ہرگز نہ پینا ، کیونکہ یہ ہر برائی کی جڑ ہے اور تم گناہ کے ارتکاب سے بچ کے رہنا ، کیونکہ گناہ اللہ تعالیٰ کی ناراضنگی کو حلال کر دیتا ہے اور تم میدان جنگ سے راہ فرار اختیار کرنے سے بچنا ، خواہ لوگ ہلاکت کا شکار ہو رہے ہوں ، اگر لوگوں کو موت لاحق ہو جائے ، تو تم ثابت قدم رہنا ، اور تم اپنی حیثیت کے مطابق اپنے اہل خانہ پر خرچ کرنا اور ان کی تربیت کے حوالے سے ان سے عصا کو نہ اٹھانا اور انہیں اللہ تعالیٰ کا خوف دلاتے رہنا“ ۔
یہ روایت امام أحمد نے اور امام طبرانی نے معجم کبیر میں نقل کی ہے امام أحمد کے رجال ثقہ ہیں ، البتہ عبدالرحمن بن جبیر بن نفیر نے سیدنا معاذ رضی اللہ عنہ سے سماع نہیں کیا ہے ، امام طبرانی کی سند متصل ہے اس کی سند میں ایک راوی عمرو بن واقد قرشی ہے اور وہ کذاب ہے ۔

سیدنا ابوسعید خدری رضی اللہ عنہ کے بارے میں یہ بات منقول ہے : ایک شخص ان کے پاس آیا اور بولا: آپ مجھے کوئی نصیحت کیجئے ۔ انہوں نے فرمایا : تم نے مجھ سے اس چیز کے بارے میں دریافت کیا ہے ، جس کے بارے میں ، میں نے نبی اکرم صلی اللہ علیہ وسلم سے تم سے پہلے دریافت کیا ( تو نبی اکرم صلی اللہ علیہ وسلم نے ارشاد فرمایا تھا : ) ” میں تمہیں اللہ تعالیٰ کا تقویٰ اختیار کرنے کی وصیت کرتا ہوں کیونکہ یہ ہر چیز کی بنیاد ہے اور تم پر جہاد کرنا لازم ہے ، کیونکہ یہ اسلام کی رہبانیت ہے اور تم پر اللہ تعالیٰ کا ذکر کرنا اور قرآن کی تلاوت کرنا لازم ہے کیونکہ یہ آسمان میں تمہارے لئے آسانی کا باعث بنے گا اور زمین میں تمہارے ذکر کا باعث بنے گا“ ۔
یہ روایت امام أحمد اور امام ابویعلیٰ نے نقل کی ہے تاہم انہوں نے یہ الفاظ نقل کیے ہیں : ” ایک شخص نبی اکرم صلی اللہ علیہ وسلم کے پاس آیا اور بولا: یا رسول اللہ ! آپ مجھے وصیت کیجئے ، نبی اکرم صلی اللہ علیہ وسلم نے ارشاد فرمایا : تم پر اللہ کا تقویٰ اختیار کرنا لازم ہے ، کیونکہ یہ ہر بھلائی کا مجموعہ ہے ۔ ۔ ۔ ۔ ۔ ۔ ۔ ۔ ۔ ۔ “ اس کے بعد راوی نے حسب سابق حدیث نقل کی ہے ، جس میں یہ الفاظ زائد ہیں : ” تم اپنی زبان کو صرف بھلائی کے کام میں استعمال کرنا ، اس کے ذریعے تم شیطان پر غالب آ جاؤ گے “ ۔ امام أحمد کے رجال ثقہ ہیں امام ابویعلیٰ کی سند میں ایک راوی لیث بن ابوسلیم ہے اور وہ تدلیس کرنے والا ہے ۔

سیدنا حرملہ عنبری رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا ، میں نے عرض کی : یا رسول اللہ ! آپ مجھے وصیت کیجئے نبی اکرم صلی اللہ علیہ وسلم نے ارشاد فرمایا : ” تم اللہ تعالیٰ سے ڈرتے رہنا اور جب تم کسی محفل میں موجود ہو اور تم وہاں سے اٹھو اور پھر تم ان لوگوں کو وہ بات کہتے ہوئے سنو ، جو تمہیں اچھی لگے تو تم چلے جانا اور جب ان لوگوں کو کوئی ایسی بات کہتے ہوئے سنو ، جو تم ناپسند کرتے ہو ، تو پھر اسے چھوڑ دینا “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

سیدنا ابوذر غفاری رضی اللہ عنہ بیان کرتے ہیں : میں نے عرض کی : یا رسول اللہ ! آپ مجھے وصیت کیجئے ، نبی اکرم صلی اللہ علیہ وسلم نے ارشاد فرمایا : میں تمہیں اللہ تعالیٰ کا تقویٰ اختیار کرنے کی وصیت کرتا ہوں ، کیونکہ یہ تمہارے معاملے ( یعنی دین ) کی بنیاد ہے ، میں نے عرض کی : یا رسول اللہ ! مجھے مزید عطا کیجئے ! نبی اکرم صلی اللہ علیہ وسلم نے فرمایا : تم پر قرآن کی تلاوت کرنا اور اللہ کا ذکر کرنا لازم ہے ، کیونکہ یہ چیز تمہارے لئے آسمانوں میں نور ہو گی اور زمین میں تمہارے لئے نور ہو گی ، میں نے عرض کی : یا رسول اللہ ! مجھے مزید عطا کیجئے ! نبی اکرم صلی اللہ علیہ وسلم نے فرمایا : تم زیادہ نہ ہنسنا ، کیونکہ یہ چیز دل کو مردہ کر دیتی ہے اور چہرے کے نور کو رخصت کر دیتی ہے ، میں نے عرض کی : یا رسول اللہ ! آپ مجھے مزید عطا کیجئے ! نبی اکرم صلی اللہ علیہ وسلم نے فرمایا : تم پر جہاد کرنا لازم ہے ، کیونکہ یہ میری امت کے رہبانیت ہے ، میں نے عرض کی : یا رسول اللہ ! مجھے مزید عطا کیجئے ! نبی اکرم صلی اللہ علیہ وسلم نے فرمایا : تم پر خاموش رہنا لازم ہے البتہ بھلائی کی بات کا معاملہ مختلف ہے ، یہ چیز شیطان کو تم سے پرے کر دے گی اور تمہارے دین کے معاملے میں تمہاری مددگار ہو گی ، میں نے عرض کی : یا رسول اللہ ! مجھے مزید عطا کیجئے ! نبی اکرم صلی اللہ علیہ وسلم نے ارشاد فرمایا : تم اس کا جائزہ لینا جو تم سے کمتر ہو ، تم اس کی طرف نہ دیکھنا جو تم سے بلند تر ہو ، یہ چیز اس بات کے زیادہ لائق ہو گی کہ تم اپنے اوپر اللہ تعالیٰ کی نعمت کو حقیر نہیں سمجھو گے ، میں نے عرض کی : یا رسول اللہ مجھے مزید عطا کیجئے ! نبی اکرم صلی اللہ علیہ وسلم نے ارشاد فرمایا : تم رشتہ داروں کے ساتھ اچھا سلوک کرنا ، اگرچہ وہ تمہارے ساتھ برا سلوک کریں ، میں نے عرض کی : یا رسول اللہ مجھے مزید عطا کیجئے ! آپ نے فرمایا : تم اللہ تعالیٰ کے بارے میں کسی ملامت کرنے والے کی ملامت سے خوف زدہ نہ ہونا ، میں نے عرض کی : یا رسول اللہ ! مجھے مزید عطا کیجئے ! نبی اکرم صلی اللہ علیہ وسلم نے فرمایا : تم لوگوں کے لئے اُسی چیز کو پسند کرنا ، جو تم اپنے لئے پسند کرتے ہو ، پھر نبی اکرم صلی اللہ علیہ وسلم نے اپنا دست مبارک میرے سینے پر مارا اور پھر ارشاد فرمایا : ” اے ابوذر ! تدبیر کی مانند کوئی عقل مندی نہیں ہے ، احتیاط کی مانند کوئی پرہیز گاری نہیں ہے ، اور اچھے اخلاق کی مانند کوئی خوبی نہیں ہے “ ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت میں سے یہ الفاظ نقل کیے ہیں : ” پرہیز کی مانند کوئی احتیاط نہیں ہے ۔ ۔ ۔ ۔ ۔ ۔ ۔ ۔ ۔ ۔ “ یہاں سے لے کر آخر تک نقل کیا ہے ۔
یہ روایت امام طبرانی نے نقل کی ہے ، اس کی سند میں ایک راوی ابراہیم بن ہشام بن یحیی غسانی ہے ، جسے ابن حبان نے ثقہ قرار دیا ہے جبکہ ابوحاتم اور ابوزرعہ نے اسے ضعیف کہا: ہے ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے سات باتوں کی وصیت کی تھی آپ نے فرمایا تھا : ” تم کسی کو اللہ کا شریک نہ ٹھہرانا ، خواہ تمہیں کاٹ دیا جائے یا تمہیں جلا دیا جائے ، یا تمہیں مصلوب کر دیا جائے ، اور تم جان بوجھ کر نماز ترک نہ کرنا ، کیونکہ جو شخص جان بوجھ کر اسے ترک کرتا ہے ، وہ ملت سے خارج ہو جاتا ہے ، اور تم معصیت کا ارتکاب نہ کرنا ، کیونکہ یہ اللہ تعالیٰ کی ناراضگی کا باعث ہے اور تم شراب نہ پینا کیونکہ یہ تمام برائیوں کی جڑ ہے ، اور تم موت سے فرار اختیار نہ کرنا ، اگرچہ تم اس میں ہو ، اور تم اپنے والدین کی نافرمانی نہ کرنا ، اگرچہ وہ دونوں تمہیں یہ حکم دیں کہ تم اپنی پوری دنیا سے نکل جاؤ ، تو تم نکل جانا اور تم اپنے اہل خانہ سے عصا کو اُٹھا کے نہ رکھنا اور اپنی ذات کی طرف سے اُن کے ساتھ انصاف سے کام لینا “ ۔
یہ روایت امام طبرانی نے نقل کی ہے ، اس کی سند میں ایک راوی سلمہ بن شریح ہے ، امام ذہبی کہتے ہیں : یہ معروف نہیں ہے اس روایت کے بقیہ رجال صحیح کے رجال ہیں ۔

سیدنا ابودرداء رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے سات باتوں کی وصیت کی تھی : ” تم کسی کو اللہ کا شریک نہ ٹھہرانا ، خواہ تمہیں کاٹ دیا جائے یا تمہیں جلا دیا جائے ، اور تم جان بوجھ کر نماز ترک نہ کرنا ، کیونکہ جو شخص اسے ترک کر دیتا ہے اس سے ذمہ لاتعلق ہو جاتا ہے ، اور تم شراب نہ پینا کیونکہ یہ ہر برائی کی کنجی ہے ، اور تم اپنے ماں باپ کی فرمانبرداری کرنا ، اگرچہ وہ دونوں تمہیں یہ حکم دیں کہ تم دنیا سے نکل جاؤ ، تو تم اس سے نکل جانا اور تم حکومت کے بارے میں متعلقہ فرد سے تنازع نہ کرنا ، تم تم ہی ہو اور تم میدان جنگ سے راہ فرار ہرگز اختیار نہ کرنا ، خواہ تم ہلاک ہو جاؤ اور تم اپنے ساتھیوں کی مہمان نوازی کرنا ، اور اپنے اہل خانہ پر اپنی حیثیت کے مطابق خرچ کرنا ، اور تم اُن سے عصا نہ اٹھانا اور تم اللہ تعالیٰ کا خوف انہیں دلاتے رہنا “ ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت میں سے یہ حصہ نقل کیا ہے : ” تم شراب نہ پینا کیونکہ یہ ہر برائی کی کنجی ہے “ ۔ شیخ جمال الدین مزی نے اس پر ” ابن ماجہ “ کی علامت لگائی ہے ، شاید انہوں نے اصل میں ” ابن عساکر “ کہنا تھا ، باقی اللہ بہتر جانتا ہے ۔
یہ روایت امام طبرانی نے نقل کی ہے اس کی سند میں ایک راوی شہر بن حوشب ہے ، اس کی نقل کردہ حدیث حسن ہے اس روایت کے بقیہ رجال ثقہ ہیں ۔

سیدنا ابودرداء رضی اللہ عنہ بیان کرتے ہیں : میرے خلیل صلی اللہ علیہ وسلم نے مجھے وصیت کی تھی کہ میں اس شخص کا جائزہ لوں ، جو مجھ سے نیچے کا ہے ، میں اس شخص کی طرف نہ دیکھوں ، جو مجھ سے اوپر کا ہے اور یہ کہ میں مسکینوں سے محبت رکھوں اور ان کے قریب رہوں اور میں صلہ رحمی کروں ، اگرچہ وہ لوگ میرے ساتھ زیادتی کریں اور جفا کریں ، اور میں اللہ تعالیٰ کے حکم کے مطابق بات کروں ، اور میں اللہ تعالیٰ کے بارے میں کسی ملامت کرنے والے کی علامت سے خوف زدہ نہ ہوؤں ، اور میں کسی سے کچھ نہ مانگوں اور میں کثرت کے ساتھ لا حول ولا قوة الا باللہ پڑھتا ہوں ، کیونکہ یہ جنت کے خزانوں میں سے ہے ۔
یہ روایت امام طبرانی نے نقل کی ہے اس کی سند میں ایک راوی ابوجودی ہے ، میں اس سے واقف نہیں ہوں اس روایت کے بقیہ رجال ثقہ ہیں ۔

سیده ام امیمہ رضی اللہ عنہ ، جو نبی اکرم صلی اللہ علیہ وسلم کی کنیز ہیں ، وہ بیان کرتی ہیں : ایک مرتبہ میں نبی اکرم صلی اللہ علیہ وسلم پر وضو کا پانی انڈیل رہی تھی اسی دوران ایک شخص اندر آیا ، اس نے کہا: آپ مجھے وصیت کیجئے نبی اکرم صلی اللہ علیہ وسلم نے فرمایا : ” تم کسی کو اللہ کا شریک نہ ٹھہرانا ، خواہ تمہیں کاٹ دیا جائے ، یا تمہیں آگ کے ذریعے جلا دیا جائے ، اور تم اپنے ماں باپ کی نافرمانی نہ کرنا ، اگرچہ وہ دونوں تمہیں یہ حکم دیں کہ تم اپنے اہل خانہ اور اپنی دنیا سے نکل جاؤ ، تو تم نکل جانا اور تم شراب ہرگز نہ پینا ، کیونکہ یہ ہر برائی کی کنجی ہے اور تم جان بوجھ کر نماز ترک نہ کرنا ، کیونکہ جو شخص ایسا کرتا ہے ، اس سے اللہ اور اس کے رسول کا ذمہ لاتعلق ہو جاتا ہے ، اور تم میدان جنگ سے راہ فرار ہرگز اختیار نہ کرنا ، کیونکہ جو شخص ایسا کرتا ہے ، وہ اللہ تعالیٰ کی ناراضگی لے کر واپس آتا ہے ، اور اس کا ٹھکانہ جہنم ہو گا اور وہ برا ٹھکانہ ہے ، اور تم زمین کے ( حد بندی کے ) نشانات میں کوئی اضافہ نہ کرنا ، کیونکہ جو شخص ایسا کرے گا ، تو جب وہ قیامت کے دن آئے گا ، تو اس کی گردن پر سات زمینوں کی مقدار جتنے ( وزن کا طوق ) ہو گا اور تم اپنی حیثیت کے مطابق اپنے اہل خانہ پر خرچ کرنا اور ان سے اپنے عصا کو اُٹھا کے نہ رکھنا اور اللہ تعالیٰ کا خوف انہیں دلاتے رہنا“ ۔
یہ روایت امام طبرانی نے نقل کی ہے اس کی سند میں ایک راوی یزید بن سنان رہاوی ہے ، جسے امام بخاری رحمہ اللہ اور دیگر حضرات نے ثقہ قرار دیا ہے ، اکثر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے یہ وصیت کی تھی کہ جس دن میں نے روزہ رکھا ہوا ہو ، تو بالوں میں تیل بھی لگایا ہوا ہو ، اور بال سنوارے بھی ہوئے ہوں ، آپ نے فرمایا : تم روزے کی حالت میں ایسی صبح نہ کرنا کہ تم نے ماتھے پر بل ڈالے ہوئے ہوں اور مسلمانوں میں سے جو شخص تمہاری دعوت کرے تو اس کی دعوت قبول کر لینا ، جبکہ وہاں آلات موسیقی ظاہر نہ کیے گئے ہوں ، اگر ایسا ہو ، تو پھر تم قبول نہ کرنا ، اور اہل قبلہ میں سے جو شخص مر جاتا ہے ، تم اس کی نماز جنازہ ادا کرنا ، اگرچہ اسے مصلوب کر کے ، یا سنگسار کر کے مارا گیا ہو ، اور تم اللہ تعالیٰ کی بارگاہ میں ایسی حالت میں حاضر ہو کہ تم نے پوری زمین جتنے گناہ ساتھ لیے ہوئے ہوں ، یہ چیز تمہارے لئے اس سے زیادہ بہتر ہو گی کہ تم نے اہل قبلہ میں سے کسی ایک کے خلاف گواہی دی ہو “ ۔
یہ روایت امام طبرانی نے نقل کی ہے اس کی سند میں ایک راوی یمان بن سعید ہے ، جسے امام دارقطنی رحمہ اللہ اور دیگر حضرات نے ضعیف قرار دیا ہے ۔

سیدہ ام انس رضی اللہ عنہ بیان کرتی ہیں : انہوں نے عرض کی : یا رسول اللہ ! آپ مجھے وصیت کیجئے آپ نے فرمایا : تم گناہوں سے لاتعلق رہو ، کیونکہ یہ سب سے زیادہ فضیلت والی ہجرت ہے ، اور تم فرائض کی حفاظت کرنا کیونکہ یہ سب سے زیادہ فضیلت والا جہاد ہے ، اور تم اللہ تعالیٰ کا ذکر کثرت سے کرنا ، کیونکہ تم اللہ تعالیٰ کے پاس کوئی ایسی چیز نہیں لے کر جاؤ گی ، جو اس کے نزدیک اُس کے ذکر سے زیادہ محبوب ہو “ ۔
یہ روایت امام طبرانی نے نقل کی ہے اس کی سند میں ایک راوی سعد بن ابراہیم بن نسطاس ہے اور وہ ضعیف ہے ۔

ابوسلمہ بیان کرتے ہیں : سیدنا معاذ رضی اللہ عنہ بیان کرتے ہیں : میں نے عرض کی : یا رسول اللہ آپ مجھے وصیت کیجئے ! آپ نے فرمایا : تم اللہ تعالیٰ کی یوں عبادت کرو جیسے تم اُسے دیکھ رہے ہو اور تم اپنا شمار مرحومین میں کرو ، تم ہر پتھر اور درخت کے پاس اللہ کا ذکر کرو ، اور جب تم کوئی برائی کر لو تو اس کے فوراً بعد نیکی کر لو ، پوشیدہ کی جگہ پوشیدہ اور اعلانیہ کی جگہ اعلانیہ “ ۔
یہ روایت امام طبرانی نے نقل کی ہے ، ابوسلمہ نامی راوی نے سیدنا معاذ رضی اللہ عنہ کا زمانہ نہیں پایا ہے اس روایت کے رجال ثقہ ہیں ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” تم اپنی ذات کے حوالے سے مجھے چھ چیزوں کی ضمانت دو ! میں تمہیں جنت کی ضمانت دیتا ہوں ، جب تم بات کرو ، تو سچ بولو ، جب وعدہ کرو تو پورا کرو ، جب تمہیں امین بنایا جائے تو امانت ادا کر دو ، اپنی شرمگاہوں کی حفاظت کرو ، اپنی نگاہیں جھکا کے رکھو اور اپنے ہاتھ ( کسی کو نقصان پہنچانے کے حوالے سے ) روک کے رکھو “ ۔
یہ روایت امام أحمد نے اور امام طبرانی نے نقل کی ہے ، امام أحمد کے رجال ثقہ ہیں ، البتہ مطلب نامی راوی نے سیدنا عبادہ رضی اللہ عنہ سے سماع نہیں کیا ہے ۔

سیدنا ابوکاہل رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : اے ابوکاہل ! کیا میں تمہیں اس فیصلے کے بارے میں نہ بتاؤں ؟ جو اللہ تعالیٰ نے اپنی ذات کے بارے میں طے کیا ہے ؟ میں نے عرض کی : جی ہاں ! یا رسول اللہ ! نبی اکرم صلی اللہ علیہ وسلم نے فرمایا : اللہ تعالیٰ تمہارے دل کو زندگی دے اور اس دن اسے موت کا شکار نہ کرے جب تمہارا جسم مر جائے گا اے ابوکاہل ! تم یہ بات جان لو ! کہ رب العزت اس شخص پر غضبناک نہیں ہو گا ، جس کے دل میں خوف ہو اور آگ اس شخص کو بالکل بھی نہیں کھائے گی ۔ اے ابوکاہل ! تم یہ بات جان لو کہ جو شخص اللہ تعالیٰ سے حیا کی وجہ سے پوشیدہ اور اعلانیہ طور پر شرمگاہ کا پردہ رکھے گا ، تو اللہ تعالی کے ذمہ یہ بات لازم ہے کہ قیامت کے دن اس کے پوشیدہ معاملات کا پردہ رکھے ۔ اے ابوکاہل ! تم یہ بات جان لو کہ جس شخص کے دل میں نماز کی حلاوت داخل ہو جائے ، یہاں تک کہ وہ اُس کے رکوع اور سجود کو مکمل کرے ، تو اللہ تعالیٰ کے ذمہ یہ بات لازم ہے کہ قیامت کے دن اس بندے کو راضی کرے ۔ اے ابوکاہل ! تم یہ بات جان لو کہ جو شخص چالیس دن اور چالیس راتوں تک با جماعت نماز یوں ادا کرے کہ وہ تکبیر اولی کو بھی پا لے ، تو اللہ تعالیٰ کے ذمہ یہ بات لازم ہے کہ اس کے لئے جہنم سے بچاؤ کو نوٹ کر لے ۔ اے ابوکاہل ! تم یہ بات جان لو جو شخص ہر مہینے میں تین روزے رکھے اور ساتھ رمضان کے روزے بھی رکھے ، تو اللہ تعالیٰ کے ذمہ یہ بات لازم ہے کہ وہ پیاس والے دن اُسے سیراب کرے ۔ اے ابوکاہل ! تم یہ بات جان لو کہ جو شخص لوگوں کو تکلیف دینے سے باز رہے ، تو اللہ تعالیٰ کے ذمہ یہ بات لازم ہے کہ قبر کی اذیت اُس سے روک لے ۔ اے ابوکاہل ! تم یہ بات جان لو کہ جو شخص اپنے والدین کے ساتھ ان کی زندگی اور موت ، ہر حال میں اچھائی کرتا ہے ، تو اللہ تعالیٰ کے ذمہ یہ بات لازم ہے کہ وہ قیامت کے دن اُسے راضی کرے ۔ میں نے عرض کی : کوئی شخص اپنے والدین کے مرنے کے بعد ، اُن کے ساتھ اچھا سلوک کیسے کر سکتا ہے ؟ نبی اکرم صلی اللہ علیہ وسلم نے فرمایا : اُن کے مرنے کے بعد ان کے ساتھ اچھا سلوک یہ ہے کہ آدمی اپنے والدین کے لئے دعائے مغفرت کرے اور انہیں برا نہ کہے اور کسی کے والدین کو برا نہ کہے کہ وہ جواب میں اُس کے والدین کو برا کہے ۔ اے ابوکاہل ! تم یہ بات جان لو کہ جو شخص زکوۃ لازم ہونے کے وقت اپنے مال کی زکوۃ ادا کرتا ہے ، تو اللہ تعالی کے ذمہ یہ بات لازم ہے کہ وہ اسے انبیاء کا ساتھی بنائے ۔ اے ابوکاہل ! تم یہ بات جان لو کہ جس شخص کی نیکیاں کم ہوں گی اور اس کی برائیاں زیادہ ہوں گی ، تو اللہ تعالیٰ کے ذمہ یہ بات لازم ہے کہ قیامت کے دن اس کے پلڑے کو بھاری کر دے ۔ اے ابوکاہل ! تم یہ بات جان لو کہ جو شخص اپنی بیوی بچوں کے لئے ( کمائی کرنے کے لئے ) کوشش کرتا ہے اور اپنے زیر ملکیت لوگوں کے لئے کوشش کرتا ہے اور ان کے بارے میں اللہ تعالیٰ کے حکم کو قائم رکھتا ہے اور انہیں حلال رزق کھلاتا ہے ، تو اللہ تعالیٰ کے ذمہ یہ بات لازم ہے کہ وہ اس شخص کو شہداء کے ساتھ ان کے درجہ میں رکھے ۔ اے ابوکاہل ! تم یہ بات جان لو کہ جو شخص روزانہ دن کے وقت مجھ پر تین مرتبہ درود بھیجے اور رات کے وقت مجھ پر تین مرتبہ درود بھیجے ، وہ مجھ سے محبت اور میرے شوق کی خاطر ایسا کرے ، تو اللہ تعالیٰ کے ذمہ یہ بات لازم ہے کہ وہ اس شخص کے اس رات کے اور اس دن کے گناہوں کی مغفرت کر دے ۔ اے ابوکاہل ! تم یہ بات جان لو کہ جو شخص اس بات کی گواہی دیتا ہو کہ اللہ تعالیٰ کے علاوہ اور کوئی معبود نہیں ہے ، وہی ایک معبود ہے ، اور وہ اس بات پر یقین رکھتا ہو ، تو اللہ تعالیٰ کے ذمہ یہ بات لازم ہے کہ ہر مرتبہ ( یہ کلمات پڑھنے پر ) اس شخص کے ایک سال کے گناہوں کی مغفرت کر دے “ ۔
یہ روایت امام طبرانی نے نقل کی ہے اور اس کی سند میں ایک راوی فضل بن عطاء ہے ، جس کا ذکر امام ذہبی نے کیا ہے ، انہوں نے یہ بات بیان کی ہے کہ اس کی سند تاریک ہے ۔