مجمع الزوائد ومنبع الفوائد

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے مہاجرین اور انصار کے درمیان ایک تحریر لکھوائی تھی کہ وہ ان کی دیت ادا کریں گے اور ان کے غیر موجود شخص کا مناسب طریقے سے فدیہ دیں گے اور مسلمانوں کے درمیان بہتری پیدا کریں گے ۔
یہ روایت امام أحمد نے نقل کی ہے اس کی سند میں ایک راوی حجاج بن ارطاۃ ہے اور وہ تدلیس کرنے والا ہے لیکن وہ ثقہ ہے ۔

سیدنا مخول بہدی رضی اللہ عنہ بیان کرتے ہیں : میں نے ابواء کے مقام پر کچھ رسیاں لگائی ہوئی تھیں ، ان میں ایک ہرن پھنس گیا ، پھر وہ چھوٹ گیا ، ایک شخص نے اسے پکڑ لیا وہ شخص اور میں ، نبی اکرم صلی اللہ علیہ وسلم کی خدمت میں حاضر ہوئے ، ہم میں سے کوئی ایک دوسرے کے لیے اس کو چھوڑ نہیں رہا تھا ، تو نبی اکرم صلی اللہ علیہ وسلم نے اسے ہمارے درمیان تقسیم کر دیا ۔
یہ روایت امام بزار نے نقل کی ہے اور اس کی سند میں ایک راوی محمد بن سلیمان بن مسمول ہے اور وہ ضعیف ہے ۔

سیدنا عبیداللہ بن عباس بن عبدالمطلب ، رضی اللہ عنہ جو سیدنا عبداللہ بن عباس رضی اللہ عنہما کے بھائی ہیں ، وہ بیان کرتے ہیں : سیدنا عباس رضی اللہ عنہ کا ایک پرنالہ تھا ، جو سیدنا عمر رضی اللہ عنہ کے ( دور خلافت میں اُن کے ) راستے میں آتا تھا ، ایک مرتبہ سیدنا عمر رضی اللہ عنہ نے جمعہ کے دن مخصوص لباس پہنا ، اسی دن سیدنا عباس رضی اللہ عنہ کے لئے دو پرندے ذبح کیے گئے ، جب سیدنا عمر رضی اللہ عنہ پرنالے کے پاس پہنچے ، تو اس پرنالے میں سے دونوں پرندوں کا خون پانی کے ساتھ بہتا ہوا آیا اور سیدنا عمر رضی اللہ عنہ کو لگ گیا ، سیدنا عمر رضی اللہ عنہ نے اس پرنالے کو اکھاڑ دینے کا حکم دیا ، سیدنا عمر رضی اللہ عنہ واپس گئے ، انہوں نے کپڑے اتارے ، دوسر الباس پہنا پھر آئے اور لوگوں کو نماز پڑھائی ( نماز کے بعد ) سیدنا عباس رضی اللہ عنہ اُن کے پاس آئے اور بولے : اللہ کی قسم ! یہ پرنالہ اس جگہ پر لگا ہوا تھا ، جہاں نبی اکرم صلی اللہ علیہ وسلم نے اسے لگایا تھا ، تو سیدنا عمر رضی اللہ عنہ نے سیدنا عباس رضی اللہ عنہ سے کہا: میں آپ کو تاکید کرتا ہوں کہ آپ میری پشت پر سوار ہو کر اُس پرنالے کو اسی جگہ رکھیں ، جہاں نبی اکرم صلی اللہ علیہ وسلم نے اسے لگایا تھا ، تو سیدنا عباس رضی اللہ عنہ نے ایسا ہی کیا ۔
یہ روایت امام أحمد نے نقل کی ہے ، اس کے رجال ثقہ ہیں ، البتہ ہشام بن سعد نامی راوی نے سیدنا عبیداللہ بن عباس رضی اللہ عنہما سے سماع نہیں کیا ہے ، باقی اللہ بہتر جانتا ہے ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم کا وصال ہو گیا اور سیدنا ابوبکر رضی اللہ عنہ کو خلیفہ بنا دیا گیا ، تو سیدنا عباس رضی اللہ عنہ اور سیدنا علی رضی اللہ عنہ کا کچھ چیزوں کے بارے میں اختلاف ہو گیا ، جو نبی اکرم صلی اللہ علیہ وسلم نے ترکہ میں چھوڑی تھیں ، سیدنا ابوبکر رضی اللہ عنہ نے کہا: وہ چیز جسے نبی اکرم صلی اللہ علیہ وسلم نے ترکہ میں چھوڑا ہے ، اور اسے آپ نے کوئی حرکت نہیں دی تھی ، تو میں بھی اسے کوئی حرکت نہیں دوں گا ، جب سیدنا عمر رضی اللہ عنہ کو خلیفہ بنایا گیا ، تو یہ دونوں صاحبان اپنا مقدمہ لے کر ان کے پاس آئے ، تو انہوں نے بھی یہ کہا: کہ جس چیز کو سیدنا ابوبکر رضی اللہ عنہ نے حرکت نہیں دی تھی ، تو میں بھی اسے حرکت نہیں دوں گا ، جب سیدنا عثمان رضی اللہ عنہ کو خلیفہ بنایا گیا ، تو ان دونوں نے اپنا مقدمہ ان کے سامنے پیش کیا ، سیدنا عثمان رضی اللہ عنہ خاموش رہے ۔ انہوں نے اپنا سر جھکا لیا ، سیدنا عبداللہ بن عباس رضی اللہ عنہما کہتے ہیں : مجھے یہ اندیشہ ہوا کہ وہ اس چیز کو اپنے قبضے میں لے لیں گے ، تو میں نے سیدنا عباس رضی اللہ عنہ کے دونوں کندھوں کے درمیان اپنا ہاتھ رکھا اور میں نے یہ کہا: اے ابا جان ! میں آپ کو قسم دیتا ہوں کہ آپ یہ چیز سیدنا علی رضی اللہ عنہ کے حوالے کر دیں ، تو سیدنا عباس رضی اللہ عنہ نے وہ چیز سیدنا علی رضی اللہ عنہ کے حوالے کر دی ۔
یہ روایت امام أحمد نے نقل کی ہے اور اس کے رجال ثقہ ہیں ۔

قریش میں سے ، بنوتیم سے تعلق رکھنے والے ایک بزرگ نے یہ بات بیان کی ہے : فلاں نے اور فلاں نے اور فلاں نے یہاں تک کہ انہوں نے چھ یا سات افراد کو شمار کروایا ، جن سب کا تعلق قریش سے تھا ، اور ان میں ایک سیدنا عبداللہ بن زبیر رضی اللہ عنہما بھی تھے کہ انہوں نے مجھے یہ روایت بیان کی ہے : وہ بیان کرتے ہیں : ایک مرتبہ ہم سیدنا عمر رضی اللہ عنہ کے پاس بیٹھے ہوئے تھے ، اسی دوران سیدنا علی رضی اللہ عنہ اور سیدنا عباس رضی اللہ عنہ اندر آئے ، ان دونوں کی آواز بلند ہو رہی تھی ( یعنی آپس میں تکرار چل رہی تھی ) سیدنا عمر رضی اللہ عنہ نے کہا: اے ابا جان ! آپ ٹھہر جائیں مجھے پتہ ہے آپ کیا کہیں گے کہ میرے بھتیجے کا نصف مال مجھے ملنا چاہیے ، اور اے علی مجھے یہ بھی پتہ ہے کہ آپ کیا کہیں گے ؟ آپ کہیں گے : ان کی صاحبزادی میری بیوی ہے ، تو اسے نصف مال ملنا چاہیے ، یہ جو کچھ بھی نبی اکرم صلی اللہ علیہ وسلم کے قبضے میں تھا ، ہم نے یہ دیکھا کہ نبی اکرم صلی اللہ علیہ وسلم نے اسے کس طرح استعمال کیا ؟ آپ کے بعد سیدنا ابوبکر رضی اللہ عنہ اس کے نگران بنے ، تو انہوں نے اس سب کے بارے میں نبی اکرم صلی اللہ علیہ وسلم کے طریقے کے مطابق استعمال کیا ، سیدنا ابوبکر رضی اللہ عنہ کے بعد میں اس کا نگران بنا ، تو میں اللہ کے نام کی قسم اٹھا کر یہ کہتا ہوں کہ میں اس بات کی بھرپور کوشش کروں گا کہ اس بارے میں اللہ کے رسول صلی اللہ علیہ وسلم کے طریقے اور سیدنا ابوبکر رضی اللہ عنہ کے طریقے کے مطابق کام کروں ۔ محمد نامی راوی کہتے ہیں : ( سیدنا عمر رضی اللہ عنہ نے فرمایا : ) سیدنا ابوبکر رضی اللہ عنہ نے مجھے حدیث بیان کی ، اور پھر سیدنا عمر رضی اللہ عنہ نے اللہ کے نام کی قسم اُٹھا کر یہ کہا: ہے کہ سیدنا ابوبکر رضی اللہ عنہ سچے تھے کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” نبی کی وراثت تقسیم نہیں ہوتی ، اُن کی وراثت مسلمانوں کے غریب لوگوں اور مساکین کو دی جاتی ہے “ ۔ سیدنا ابوبکر رضی اللہ عنہ نے مجھے حدیث بیان کی ، پھر سیدنا عمر رضی اللہ عنہ نے قسم اٹھائی کہ سیدنا ابوبکر رضی اللہ عنہ سچے تھے اور سیدنا ابوبکر رضی اللہ عنہ نے یہ بیان کیا ہے کہ نبی اکرم صلی اللہ علیہ وسلم نے ارشاد فرمایا ہے : ” نبی کا اُس وقت تک انتقال نہیں ہوتا ، جب تک اُس کی امت کا کوئی فرد اس کی امامت نہیں کرتا“ ( اس کے بعد سیدنا عمر رضی اللہ عنہ نے فرمایا : ) یہ وہ چیزیں تھیں ، جو نبی اکرم صلی اللہ علیہ وسلم کے قبضے میں تھیں ، ہم نے دیکھا کہ نبی اکرم صلی اللہ علیہ وسلم انہیں کیسے استعمال کرتے تھے ؟ اگر آپ دونوں یہ چاہیں ، تو یہ دونوں میرے حوالے کر دیں ، یا یہ کہ آپ اس کے بارے میں اللہ کے رسول صلی اللہ علیہ وسلم اور سیدنا ابوبکر رضی اللہ عنہ کے طریقے کے مطابق عمل کرتے ہیں ، تو پھر میں یہ آپ کے سپرد کر دیتا ہوں ، راوی کہتے ہیں : یہ حضرات اس وقت اُٹھ کے چلے گئے ، پھر یہ دونوں حضرات واپس آئے اور سیدنا عباس رضی اللہ عنہ نے کہا: آپ یہ علی کے حوالے کر دیں ، کیونکہ میں اپنی خوشی سے یہ اس کو دے رہا ہوں ۔
یہ روایت امام أحمد نے نقل کی ہے اس کی سند میں ایک ایسا راوی ہے ، جس کا نام بیان نہیں کیا گیا ہے ، اس روایت کے بقیہ رجال صحیح کے رجال ہیں ۔

ابن سیرین بیان کرتے ہیں : سیدنا امام حسن بن علی رضی اللہ عنہما نے فرمایا : ” اگر تم جابرس سے لے کر جابلق تک کا جائزہ لو ، تو تمہیں میرے اور میرے بھائی ( یعنی سیدنا امام حسین رضی اللہ عنہ ) کے علاوہ اور کوئی شخص ایسا نہیں ملے گا ، جس کا نانا ” نبی “ ہو اور میں یہ سمجھتا ہوں کہ تم لوگ سیدنا معاویہ رضی اللہ عنہ ( کی خلافت ) پر اکھٹے ہو جاؤ ، ہو سکتا ہے کہ یہ بھی تمہارے لئے آزمائش ہو ، اور مخصوص مدت تک کی مہلت ہو “ ۔ معمر نامی راوی کہتے ہیں : جابرس اور جابلق سے مراد ، مشرق اور مغرب ہیں ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

امام شعبی بیان کرتے ہیں : نخیلہ کے مقام پر ، میں سیدنا امام حسن بن علی رضی اللہ عنہما کے پاس موجود تھا ، جب سیدنا معاویہ رضی اللہ عنہ نے ان کے ساتھ صلح کی ، سیدنا معاویہ رضی اللہ عنہ نے ان سے کہا: جب یہ بات ہو گئی ہے ، تو آپ اٹھ کر کلام کریں اور یہ بات بیان کریں کہ آپ نے حکومت میرے حوالے کر دی ہے ، یہاں سفیان نامی راوی نے بعض اوقات یہ الفاظ نقل کیے ہیں : آپ لوگوں کو اس معاملے کے بارے میں بتا دیں جسے آپ نے ترک کر دیا ہے ، تو سیدنا امام حسن رضی اللہ عنہ کھڑے ہوئے ۔ انہوں نے منبر پر خطبہ دیتے ہوئے ، اللہ تعالیٰ کی حمد و ثناء بیان کی ، امام شعبی بیان کرتے ہیں : میں یہ بات سن رہا تھا ، پھر انہوں نے فرمایا : ” اما بعد ! سب سے بڑی سمجھداری ، پرہیز گاری ہے ، اور سب سے بڑی حماقت گنہگاری ہے ، یہ معاملہ جس کے بارے میں میرے اور معاویہ کے درمیان اختلاف پایا جاتا تھا ، اگر تو یہ میرا حق تھا ، تو پھر میں اسے معاویہ کے لئے چھوڑ رہا ہوں ، تاکہ اس امت کے درمیان بہتری ہو جائے اور ان کا خون بہنا بند ہو جائے ، اور اگر یہ کسی ایسے شخص کا حق تھا ، جو اس کے بارے میں مجھ سے زیادہ حق رکھتا ہے ، تو میں نے ایسا کر لیا ہے ( اور اس سے دست بردار ہو گیا ہوں ) مجھے نہیں معلوم کہ شاید یہ صورت حال بھی تم لوگوں کے لئے آزمائش ہو ، اور ایک مخصوص مدت تک کی مہلت ہو“ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی مجالد بن سعید ہے اور اس کے بارے میں کلام کیا گیا ہے ، ویسے اس کی توثیق کی گئی ہے ، اس روایت کے بقیہ رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : جب وہ دن آیا جس میں سیدنا علی رضی اللہ عنہ اور سیدنا معاویہ رضی اللہ عنہ نے دومۃ الجندل کے مقام اکٹھا ہونا تھا ، تو سیدہ حفصہ رضی اللہ عنہا نے مجھے سے کہا: یہ چیز تمہارے لئے مناسب نہیں ہے کہ تم اس صلح سے پیچھے رہو ! جس کے ذریعے اللہ تعالیٰ سیدنا محمد صلی اللہ علیہ وسلم کی امت میں صلح کروا دے گا ، تم اللہ کے رسول صلی اللہ علیہ وسلم کے سسرالی عزیز ہو ، سیدنا عمر بن خطاب رضی اللہ عنہ کے صاحبزادے ہو ، اس دن سیدنا معاویہ رضی اللہ عنہ ایک بڑے بختی اونٹ پر بیٹھ کر آئے اور بولے : اس معاملے کے بارے میں کون لالچ رکھتا ہے ؟ اور کون اس کی امید رکھتا ہے ؟ اور اس کی طرف گردن اٹھا کے دیکھتا ہے ؟ سیدنا عبداللہ بن عمر رضی اللہ عنہما کہتے ہیں : اس دن سے پہلے کبھی میں نے اپنے دل میں دنیا کے بارے میں نہیں سوچا تھا ، لیکن اُس وقت میرا جی چاہا کہ میں یہ کہوں : اس کے بارے میں وہ شخص امید رکھتا ہے ، جس نے اسلام کی خاطر تمہارے ساتھ اور تمہارے باپ کے ساتھ جنگ کی تھی ، یہاں تک کہ تم دونوں کو اسلام میں داخل کروایا تھا ، لیکن پھر مجھے جنت اور اس کی نعمتوں کا خیال آ گیا ، تو میں نے اس سے اعراض کیا ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ، بظاہر یہ ہے کہ اس سے مراد ( سیدنا علی رضی اللہ عنہ کی نہیں بلکہ ) سیدنا امام حسن بن علی رضی اللہ عنہما کی صلح ہے اور اس بارے میں راوی کو وہم ہوا ہے ۔

صہیب ، جو سیدنا عباس رضی اللہ عنہ کے غلام ہیں ، وہ بیان کرتے ہیں : سیدنا عباس رضی اللہ عنہ نے مجھے سیدنا عثمان غنی رضی اللہ عنہ کے پاس بھیجا ، تاکہ میں انہیں بلا کے لاؤں ، میں سیدنا عثمان رضی اللہ عنہ کے پاس آیا ، تو وہ لوگوں کو کھانا کھلا رہے تھے ، میں نے انہیں بلایا وہ سیدنا عباس رضی اللہ عنہ کے پاس آئے اور انہوں نے کہا: اے ابوالفضل ! آپ چہرہ کامیاب ہو ( یعنی دعا دی ) تو سیدنا عباس رضی اللہ عنہ نے کہا: امیر المؤمنین ! آپ کا چہرہ بھی ( کامیاب ہو ) سیدنا عثمان رضی اللہ عنہ نے بتایا : جب آپ کا قاصد میرے پاس آیا تو میں لوگوں کو کھانا کھلا رہا تھا تو انہیں کھانا کھلانے کے فوراً بعد میں آپ کے پاس آ گیا ہوں ، سیدنا عباس رضی اللہ عنہ نے کہا: میں آپ کو علی کے بارے میں اللہ کا واسطہ دے کر کہتا ہوں ، وہ آپ کے چچازاد ہیں ، دین میں آپ کے بھائی ہیں نبی کے صحابی ہونے میں آپ کے ساتھی ہیں ، اور آپ کے سسرالی عزیز بھی بنتے ہیں ، مجھے یہ بات پتہ چلی ہے کہ آپ یہ ارادہ رکھتے ہیں کہ علی اور اس کے ساتھیوں کو اس کا نگران بنا دیں اور مجھے اس معاملے میں معاف رکھیں اے امیر المونین ! تو سیدنا عثمان رضی اللہ عنہ نے فرمایا : میں آپ کو سب سے پہلا جواب تو یہ دیتا ہوں کہ علی کے بارے میں ، میں نے آپ کی سفارش کو قبول کر لیا ، اگر سیدنا علی رضی اللہ عنہ یہ چاہیں تو کوئی شخص ان کے علاوہ مناسب نہیں ہے ، لیکن اگر وہ انکار کر دیتے ہیں ، تو پھر ان کی رائے کا معاملہ مختلف ہے ، پھر انہوں نے سیدنا علی رضی اللہ عنہ کو پیغام بھیجا کہ میں آپ کو آپ کے چچازاد اور آپ کے پھوپھی زاد اور آپ کے دین میں ، آپ کے بھائی اور آپ کے رسول کے صحابی ہونے میں آپ کے ساتھی اور آپ کے بیعت کے نگران ہونے کے حوالے سے آپ کو اللہ کا واسطہ دے کر کہتا ہوں ، تو سیدنا علی رضی اللہ عنہ نے فرمایا : اللہ کی قسم ! اگر وہ مجھے یہ حکم دے دیں کہ میں اپنے گھر سے نکل جاؤں تو میں نکل جاؤں گا ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدہ ام ہانی رضی اللہ عنہ بیان کرتی ہیں : فتح کے مکہ کے سال ، نبی اکرم صلی اللہ علیہ وسلم میرے ہاں تشریف لائے ، میں نے کہا: کیا آپ سیدنا علی رضی اللہ عنہ کے حوالے سے مجھے نہیں بچائیں گے ؟ نبی اکرم صلی اللہ علیہ وسلم نے دریافت کیا : کیا ہوا ہے ؟ میں نے کہا: ایک شخص میرے پاس آیا وہ میرے پیچھے چھپ گیا ، سیدنا علی رضی اللہ عنہ نے کہا: تم اس کے آگے سے ہٹ جاؤ ! ورنہ میں تمہیں نیزہ مار دوں گا ، اور پھر انہوں نے میرے سر کے اگلے حصے پر نیزہ چبھو بھی دیا ، تو نبی اکرم صلی اللہ علیہ وسلم نے فرمایا : علی کو تمہیں نیزہ نہیں مارنا چاہیے تھا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔