مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : دو آدمیوں نے نبی اکرم صلی اللہ علیہ وسلم کے سامنے مقدمہ پیش کیا ، ان دونوں میں سے ہر ایک برابر تعداد میں عادل گواہ لے آیا ، تو نبی اکرم صلی اللہ علیہ وسلم نے ان دونوں کے درمیان قرعہ اندازی کی اور یہ دعا کی : اے اللہ ! تو ان کے درمیان فیصلہ کر دے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی اسامہ بن زید قرشی ہے اور وہ ضعیف ہے ۔

سیدنا جابر بن سمرہ رضی اللہ عنہ بیان کرتے ہیں : دو آدمیوں نے نبی اکرم صلی اللہ علیہ وسلم کے سامنے ایک اونٹ کے بارے میں مقدمہ پیش کیا ، ان دونوں میں سے ہر ایک نے ثبوت ( یعنی گواہ ) پیش کر دیا کہ وہ اونٹ اس کا ہے ، تو نبی اکرم صلی اللہ علیہ وسلم نے اس اونٹ کے بارے میں یہ فیصلہ دیا کہ وہ اونٹ ان دونوں کے درمیان تقسیم ہو گا ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی یاسین زیات ہے اور وہ متروک ہے ۔