مجمع الزوائد ومنبع الفوائد

محمد بن کریب نے ، اپنے والد کے حوالے سے ، سیدنا عبداللہ بن عباس رضی اللہ عنہما کے حوالے سے سیدنا سنان بن عبداللہ جہنی رضی اللہ عنہ کے حوالے سے یہ بات نقل کی ہے : ان کی پھوپھی نے انہیں بتایا کہ وہ نبی اکرم صلی اللہ علیہ وسلم کی خدمت میں حاضر ہوئیں ، انہوں نے عرض کی : یا رسول اللہ ! میری والدہ کا انتقال ہو گیا ہے ، ان کے ذمہ خانہ کعبہ تک پیدل چل کر جانے کی نذر لازم تھی ، نبی اکرم صلی اللہ علیہ وسلم نے فرمایا : کیا تم یہ استطاعت رکھتی ہو کہ تم ان کی طرف سے پیدل چل کر جاؤ ؟ اس خاتون نے عرض کی : جی ہاں ! نبی اکرم صلی اللہ علیہ وسلم نے فرمایا : پھر تم اپنی والدہ کی طرف سے پیدل چل کر جاؤ ، اس خاتون نے عرض کی : کیا یہ چیز ان کی جگہ کفایت کر جائے گی ؟ نبی اکرم صلی اللہ علیہ وسلم نے فرمایا : جی ہاں ! اس بارے میں تمہاری کیا رائے ہے ؟ اگر تمہاری ماں کے ذمہ کوئی قرض ہوتا ، اور تم اس کی طرف سے ادا کر دیتی ، تو کیا وہ تمہاری طرف سے قبول ہو جاتا ؟ اس خاتون نے جواب دیا : جی ہاں ! تو نبی اکرم صلی اللہ علیہ وسلم نے فرمایا : اللہ تعالی اس بارے میں زیادہ حق رکھتا ہے ۔
یہ روایت امام طبرانی نے معجم کبیر میں نقل کی ہے اور محمد بن کریب نامی راوی ضعیف ہے ۔

سیدنا مروان بن قیس رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کے زمانہ اقدس میں اپنے اہل خانہ سے ” رعیہ “ لیا تھا ، وہ بیان کرتے ہیں : ایک شخص نبی اکرم صلی اللہ علیہ وسلم کے پاس آیا اور بولا: یا رسول اللہ ! میرے والد کا انتقال ہو گیا ہے ، انہوں نے یہ نذر مانی تھی کہ وہ پیدل چل کر مکہ تک جائیں گے اور اونٹ قربان کریں گے ، انہوں نے کوئی مال نہیں چھوڑا ، تو کیا ان کی طرف یہ نذر ادا ہو جائے گی ، اگر ان کی طرف سے پیدل چل کر جایا جائے ، اور میں اپنے مال میں سے ان کی طرف سے اونٹ قربان کر لوں ؟ نبی اکرم صلی اللہ علیہ وسلم نے فرمایا : جی ہاں ! تم ان کی طرف سے اس کو پورا کرو اور ان کی طرف سے قربانی کرو اور ان کی طرف سے پیدل چل کر جاؤ ، اس بارے میں تمہاری کیا رائے ہے ؟ کہ اگر تمہارے والد کے ذمہ کسی شخص کا قرض ہوتا ، اور تم اپنے مال میں سے ان کی طرف سے ادا کر دیتے ، تو کیا اس شخص نے راضی ہو کر واپس نہیں جانا تھا ؟ تو اللہ تعالیٰ تو اس بات کا زیادہ حق دار ہے کہ اس کو راضی کیا جائے ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا عبداللہ بن عمرو رضی اللہ عنہ بیان کرتے ہیں : عاص بن وائل نے زمانہ جاہلیت میں یہ نذر مانی تھی کہ وہ ایک سو اونٹ قربان کریں گے ، ہشام بن عاص نے اپنے حصے کے پچاس اونٹ قربان کر دیے ، سیدنا عمرو رضی اللہ عنہ نے نبی اکرم صلی اللہ علیہ وسلم سے اس بارے میں دریافت کیا ، تو نبی اکرم صلی اللہ علیہ وسلم نے ارشاد فرمایا : اگر تمہارے والد نے توحید کا اقرار کیا تھا ، تو پھر تم روزہ رکھو اور اس کی طرف سے صدقہ کرو ، تو یہ چیز اسے نفع دے گی ۔
یہ روایت امام أحمد نے نقل کی ہے اور اس کی سند میں ایک راوی حجاج بن ارطاۃ ہے اور وہ تدلیس کرنے والا ہے ۔