مجمع الزوائد ومنبع الفوائد

سیدنا کردم بن سفیان رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم سے ایسی نذر کے بارے میں دریافت کیا جو انہوں نے زمانہ جاہلیت میں مانی تھی تو نبی اکرم صلی اللہ علیہ وسلم نے ان سے دریافت کیا : کیا وہ کسی بت کے لئے یا کسی مخصوص عبادت کے مقام کے لیے تھی ؟ انہوں نے جواب دیا : جی نہیں ! بلکہ اللہ تعالی کے لئے تھی نبی اکرم صلی اللہ علیہ وسلم نے فرمایا : پھر تم اللہ تعالی کے لئے اسے پورا کرو جو تم نے اللہ تعالیٰ کے لئے طے کیا ہے اور اس کے ثواب کے حصول کے لئے جانور قربان کرو اور اپنی نذر پوری کرو ۔
یہ روایت امام أحمد نے نقل کی ہے اور اس کی سند میں ایسا راوی ہے ، جس کی شناخت نہیں ہو سکی ۔

سیدنا کردمہ رضی اللہ عنہ کی صاحبزادی ، اپنے والد کے حوالے سے یہ بات نقل کرتی ہیں کہ انہوں نے نبی اکرم صلی اللہ علیہ وسلم سے سوال کیا ، اور یہ کہا: میں نے یہ نذر مانی تھی کہ میں تین اونٹ قربان کروں گا نبی اکرم صلی اللہ علیہ وسلم نے فرمایا : اگر یہ نذر زمانہ جاہلیت کے کسی اجتماع کی بنیاد پر ، یا زمانہ جاہلیت کی کسی عید کے حوالے سے ، یا کسی بت کے حوالے سے تھی ، تو پھر تو اس کی کوئی حیثیت نہیں ہے ، اور اگر یہ اس کے علاوہ تھی ، تو پھر تم اپنی نذر کو پورا کرو ، انہوں نے عرض کی : یا رسول اللہ ! اس لڑکی کی والدہ نے پیدل چلنے کی نذر مانی تھی ، تو کیا میں اس کی طرف سے پیدل چل لوں ؟ نبی اکرم صلی اللہ علیہ وسلم نے فرمایا : جی ہاں ! ۔
یہ روایت امام أحمد نے نقل کی ہے اور اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن عباس رضی اللہ عنہما بیان کرتے ہیں : سیدنا سعد بن عبادہ رضی اللہ عنہ نے نبی اکرم صلی اللہ علیہ وسلم سے اس نذر کے بارے میں حکم دریافت کیا ، جو ان کی والدہ نے زمانہ جاہلیت میں مانی تھی ، اور پھر اس کو پورا کرنے سے پہلے اس خاتون کا انتقال ہو گیا تھا ، تو نبی اکرم صلی اللہ علیہ وسلم نے انہیں یہ ہدایت کی کہ وہ اس خاتون کی طرف سے اسے پورا کر دیں ۔ علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے تا ہم اس میں یہ الفاظ نہیں ہیں : ” زمانہ جاہلیت میں “ ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔