مجمع الزوائد ومنبع الفوائد

سیدنا جابر بن عبداللہ رضی اللہ عنہ بیان کرتے ہیں : انصار سے تعلق رکھنے والے ایک شخص نے اپنی والدہ کو کھجوروں کا ایک باغ زندگی بھر کے لئے دے دیا ، اس خاتون کا انتقال ہو گیا ، اس شخص کے بھائی آئے اور بولے : ہم اس باغ میں برابر کے حصہ دار ہیں ، تو اس شخص نے انکار کر دیا ، ان لوگوں نے اپنا مقدمہ نبی اکرم صلی اللہ علیہ وسلم کے سامنے پیش کیا ، تو نبی اکرم صلی اللہ علیہ وسلم نے اس باغ کو ان لوگوں کے درمیان وراثت کے اصولوں کے مطابق تقسیم کر دیا ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد نے اور دیگر حضرات نے اس سیاق کے بغیر نقل کی ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا معاویہ بن ابوسفیان رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” عمری ، اُس کے متعلقہ فرد کے لئے جائز ہے “ ۔
یہ روایت امام ابویعلیٰ نے اور امام طبرانی نے معجم کبیر اور معجم اوسط میں نقل کی ہے ۔

اُن کے حوالے سے منقول ایک روایت میں یہ الفاظ ہیں : ” عمری ، وراثت کے حکم میں ہے “ ۔ امام ابویعلیٰ کے رجال صحیح کے رجال ہیں ، صرف عبداللہ بن محمد بن عقیل کا معاملہ مختلف ہے ، اس کی نقل کردہ حدیث حسن ہے ۔

سیدنا انس رضی اللہ عنہ بیان کرتے ہیں : ایک شخص نے دوسرے شخص کو عمری کے طور پر یہ کوئی چیز دی ، اس نے نبی اکرام صلی اللہ علیہ وسلم سے دریافت کیا : تو آپ نے فرمایا : یہ اس کے ورثاء کو ملے گی ، یا جیسے بھی آپ نے فرمایا : ۔
یہ روایت امام بزار نے نقل کی ہے اور اس کے رجال ثقہ ہیں اور صحیح کے رجال ہیں ، البتہ حسن بن قزعہ کا معاملہ مختلف ہے اور ویسے وہ ثقہ ہے ۔

سیدنا عبداللہ بن زبیر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کو عمری کے طور پر کوئی چیز دی جائے ، تو وہ اس کو اور اس کے بعد اس کے پسماندگان کو ملے گی “ ۔ ( راوی کہتے ہیں : ) نبی اکرم صلی اللہ علیہ وسلم کی مراد یہ تھی کہ جو لوگ اُس کے پسماندگان میں شامل ہیں ، وہ وراثت کے طور پر اسے حاصل کر لیں گے ( نبی اکرم صلی اللہ علیہ وسلم نے فرمایا : ) اور جب رقبی کے طور پر کوئی چیز دی گئی ہو ، تو وہ بھی عمری کے حکم میں ہو گی “ ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عمرو رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” رقبی کے طور پر کوئی چیز نہ دو ، عمری کے طور پر کوئی چیز نہ دو ، اگر تم ایسا کرتے ہو ، تو پھر وہ عمری اور مرقب شمار ہو گی“ ۔ راوی بیان کرتے ہیں : میں نے دریافت کیا : یہ کیسے ہو گا ؟ تو انہوں نے جواب دیا : عمری سے مراد یہ ہے کہ تم یہ کہو کہ یہ تمہاری زندگی بھر کے لئے تمہاری ہے اور رقبی سے مراد یہ ہے کہ تم یہ کہو کہ میرے اور تم میں سے جو بعد میں فوت ہو گا ، یہ اس کو ملے گی ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی مثنی بن صباح ہے ، جسے جمہور ائمہ نے ضعیف کہا: ہے بعض حضرات نے یہ کہا: ہے : یہ متروک ہے ، یحیی بن معین نے ایک روایت کے مطابق اسے ثقہ کہا: ہے ۔