مجمع الزوائد ومنبع الفوائد

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہدیہ واپس نہ کرو ! مسلمانوں کو مارو نہیں“ ۔
یہ روایت امام أحمد اور امام ابویعلیٰ نے نقل کی ہے ، امام أحمد کے رجال صحیح کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص تم سے اللہ کے نام پر مانگے اُسے دو ، اور جو شخص تم سے اللہ کے نام پر پناہ مانگے ، اسے پناہ دو ، جو شخص تمہاری دعوت کرے ، تم اس کی دعوت میں جاؤ ، اور جو شخص تمہیں پائے تمہیں تحفے کے طور پر دے ، تو تم اسے قبول کر لو “ ۔
یہ روایت امام طبرانی نے معجم کبیر اور معجم اوسط میں نقل کی ہے ، آپ نے ارشاد فرمایا : ” جو شخص تحفے کے طور پر تمہیں دستی ، یا پایا دے ، تو تم اسے قبول کر لو “ ۔
یہ روایت ابویعلیٰ نے نقل کی ہے ، تا ہم اس میں یہ الفاظ نہیں ہیں : ” جو شخص تمہیں بلائے ۔ ۔ ۔ ۔ ۔ ۔ ۔ ۔ ۔ ۔ “ اس سے لے کر آخر تک کے الفاظ نہیں ہیں ۔ معجم کبیر کے رجال صحیح کے رجال ہیں ، صرف لیث بن ابوسلیم نامی راوی کا معاملہ مختلف ہے وہ ثقہ ہے ، لیکن وہ تدلیس کرنے والا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کے زمانہ اقدس میں مسلمان باہمی تعلق کی وجہ سے ایک دوسرے کو تحفے دیا کرتے تھے ، نبی اکرم صلی اللہ علیہ وسلم نے ارشاد فرمایا : ” اگر سب لوگ اسلام قبول کر لیں ، تو وہ فاقہ کا شکار ہوئے بغیر ایک دوسرے کو تحفے دے سکتے ہیں “ ۔
یہ روایت امام طبرانی نے معجم صغیر میں نقل کی ہے ، معجم کبیر میں انہوں نے یہ الفاظ نقل کیے ہیں : نبی اکرم صلی اللہ علیہ وسلم لوگوں کے درمیان تعلق کے حوالے سے تحفے دینے کا حکم دیتے تھے ، اور آپ یہ فرماتے تھے : ” اگر سب لوگ اسلام قبول کر لیں ، تو وہ بھوکے رہے بغیر ایک دوسرے کو تحفے دے سکیں گے “ ۔ اس روایت کی سند میں ایک راوی سعید بن بشیر ہے ، جسے ایک جماعت نے ثقہ قرار دیا ہے اور کچھ لوگوں نے اسے ضعیف کہا: ہے ، اس روایت کے بقیہ رجال ثقہ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے انصار کے گروہ ! ایک دوسرے کو تحفے دو ، کیونکہ تحفہ ، دشمنی ( یا ناراضگی ) کو ختم کرتا ہے ، محبت پیدا کرتا ہے ، اللہ کی قسم اگر مجھے پایا تحفے کے طور پر دیا جائے ، تو میں قبول کر لوں گا ، اور اگر مجھے ایک دستی کی دعوت دی جائے ، تو میں قبول کر لوں گا “ ۔
یہ روایت امام طبرانی نے معجم اوسط میں ، اور امام بزار نے اس کی مانند نقل کی ہے ، اس کی سند میں ایک راوی عائذ بن شریح ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” ایک دوسرے کو تحفے دو ، باہمی محبت پیدا ہو گی ، اور ہجرت کرو ، تمہاری اولاد میں بزرگی آئے گی ، اور صاحب حیثیت لوگوں کی کوتاہیوں سے درگزر کرو “ ۔ اس روایت کی سند میں ایک راوی مثنی ابوحاتم ہے ، میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ثقہ ہیں اور ان میں سے بعض کے بارے میں کلام کیا گیا ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے فرمایا : ” اے مومنوں کی خواتین ! ایک دوسرے کو تحفے دو ! خواہ بکری کا پایا ہی کیوں نہ ہو ، کیونکہ یہ چیز محبت کو برقرار رکھتی ہے ، اور دشمنی کو ختم کرتی ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی طبیب بن سلیمان ہے ، جسے طبرانی نے ثقہ قرار دیا ہے اور امام دارقطنی رحمہ اللہ نے اسے ضعیف کہا: ہے ۔

سیدہ عائشہ صدیقہ رضی اللہ عنہا ، نبی اکرم صلی اللہ علیہ وسلم کا یہ فرمان نقل کرتی ہیں : ” ایک دوسرے کو تحفے دو ! تمہاری باہمی محبت زیادہ ہو گی “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی مثنی ابوحاتم ہے میں نے کسی کو اس کے حالات بیان کرتے ہوئے نہیں پایا ہے ، عبیداللہ بن عیزار نامی راوی کا معاملہ بھی اسی طرح ہے ۔

سیدہ ام حکیم بنت وداع خزاعیہ رضی اللہ عنہا بیان کرتی ہیں : میں نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ایک دوسرے کو تحفے دو ! کیونکہ تحفہ محبت کو بڑھا دیتا ہے اور سینے کے شر ( اور فساد ) کو رخصت کر دیتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایسا راوی ہے ، جو معروف نہیں ہے ۔

سیدنا امام حسین بن علی رضی اللہ عنہما ، نبی اکرم صلی اللہ علیہ وسلم کا یہ فرمان نقل کرتے ہیں : ” حاجت کے وقت تحفہ دینا ، اچھا کام ہے “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی یحیی بن سعید عطار ہے اور وہ ضعیف ہے ۔

سیدنا عبداللہ بن بسر رضی اللہ عنہ بیان کرتے ہیں : نبی اکرم صلی اللہ علیہ وسلم تحفہ قبول کر لیتے تھے اور آپ صدقہ قبول نہیں کرتے تھے ۔
یہ روایت امام طبرانی نے نقل کی ہے اور اس کی سند میں ایک راوی ہاشم بن سعید ہے ، جسے ابن حبان نے ثقہ قرار دیا ہے ، اور ایک جماعت نے اسے ضعیف کہا: ہے ۔

سیدہ ام سلمہ رضی اللہ عنہا کے بارے میں یہ بات منقول ہے : ایک خاتون نے انہیں بکری کی ٹانگ ہبہ کی ، جو بکری اس عورت کو صدقہ کے طور پر دی گئی تھی ، تو نبی اکرم صلی اللہ علیہ وسلم نے سیدہ ام سلمہ رضی اللہ عنہا کو یہ حکم دیا کہ وہ اسے قبول کر لیں ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔