مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” امانت اس کو ادا کر دو ! جس نے تمہارے پاس امانت کے طور پر رکھوائی ہو ، اور جو شخص تمہارے ساتھ خیانت کرے ، تم اس کے ساتھ خیانت نہ کرو“ ۔
یہ روایت امام طبرانی نے معجم کبیر اور معجم صغیر میں نقل کی ہے ، معجم کبیر کے رجال ثقہ ہیں ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تم امانت اس کو ادا کر دو ! جس نے تمہارے پاس امانت رکھوائی ہو ، اور تم اس شخص کے ساتھ خیانت نہ کرنا ، جس نے تمہارے ساتھ خیانت کی ہو “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی یحیی بن عثمان بن صالح مصری ہے ، ابن ابوحاتم کہتے ہیں : محدثین نے اس کے بارے میں کلام کیا ہے ۔

سیدنا ابوقراد سلمی رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے پاس موجود تھے ، آپ نے وضو کا پانی منگوایا ، آپ نے اپنا ہاتھ اس میں ڈبویا ، پھر آپ نے وضو کیا ، ہم نے وہ پانی لیا اور اسے پی لیا ، نبی اکرم صلی اللہ علیہ وسلم نے فرمایا : تم لوگوں نے ایسا کیوں کیا ہے ؟ ہم نے عرض کی : اللہ اور اس کے رسول کی محبت کی وجہ سے ، نبی اکرم صلی اللہ علیہ وسلم نے فرمایا : اگر تم یہ چاہتے ہو کہ اللہ اور اس کا رسول بھی تمہارے ساتھ محبت رکھیں ، تو جب تمہیں امین بنایا جائے ، تو تم امین بن جاؤ اور جب بولو ، تو سچ بولو ، اور جو شخص تمہارے پڑوس میں آئے اس کے ساتھ اچھا پڑوس رکھو ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبید بن واقد قیسی ہے اور وہ ضعیف ہے ۔

سیدنا عبداللہ بن عمرو رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” چار چیزیں ، اگر تمہارے درمیان ہوں گی ، تو پھر تمہیں دنیا میں سے جو بھی چیز نہیں ملتی ، تو تم پر کوئی حرج نہیں ہو گا ، امانت کی حفاظت کرنا ، اچھے اخلاق ، بیچ بولنا اور کھانے میں احتیاط ( یعنی حلال کھانا ) “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، اس کی نقل کردہ حدیث حسن ہے ، اس روایت کے بقیہ رجال صحیح کے رجال ہیں ۔

سیدنا شداد بن اوس رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” اپنی دنیا میں سے ، تم سب سے پہلے امانت کو غیر موجود پاؤ گے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی مہلب بن العلاء ہے ، میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ثقہ ہیں ۔

سیدنا انس رضی اللہ عنہ فرماتے ہیں : اللہ سے ڈرو ! اور امانتیں ان کے اہل افراد کو ادا کرو ۔
یہ روایت امام ابویعلیٰ نے نقل کی ہے اس کی سند میں ایک راوی عیسیٰ بن صدقہ ہے ، جسے ابوزرعہ نے ضعیف قرار دیا ہے ، امام دارقطنی رحمہ اللہ کہتے ہیں : وہ متروک ہے ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تم مجھے چھ چیزوں کی اپنی ذات کے حوالے سے ضمانت دو ، میں تمہیں جنت کی ضمانت دیتا ہوں ، جب تم بات کرو تو سیچ بولو ، جب تم وعدہ کرو ، تو پورا کرو ، جب تمہیں امین بنایا جائے ، تو ادائیگی کرو ، اپنی شرمگاہوں کی حفاظت کرو ، اپنی نگاہیں جھکا کے رکھو اور اپنے ہاتھ روک کے رکھو “ ۔
یہ روایت امام أحمد نے اور امام طبرانی نے معجم اوسط میں نقل کی ہے اور اس کے رجال ثقہ ہیں ، البتہ مطلب نامی راوی نے سیدنا عبادہ رضی اللہ عنہ سے سماع نہیں کیا ہے ۔