مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ چاہتا ہو کہ وہ مستجاب الدعوات بن جائے اور اس کی پریشانی ختم ہو جائے ، اُسے تنگدست کو آسانی فراہم کرنی چاہیے “ ۔
یہ روایت امام أحمد اور امام ابویعلیٰ نے نقل کی ہے ، انہوں نے یہ الفاظ نقل کیے ہیں : ” جو شخص تنگدست کو آسانی فراہم کرتا ہے “ ۔ امام أحمد کے رجال ثقہ ہیں ۔

سیدنا عثمان رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ ، اس بندے کو اپنے سائے میں رکھے گا ، جس دن اُس کے سائے کے علاوہ کوئی سایہ نہ ہو گا ، جس ( بندے نے ) تنگدست کو مہلت دی ہو گی ، یا مقروض کو چھوڑ دیا ہو گا “ ۔
یہ روایت عبداللہ نے ” مسند “ میں نقل کی ہے ، اس کی سند میں ایک راوی عباس بن فضل انصاری ہے ، جس کی نسبت جھوٹ کی طرف کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم مسجد کی طرف تشریف لے گئے ، آپ اپنے دست مبارک کے ذریعے اشارہ کر کے اس طرح فرما رہے تھے ، یہاں ابوعبدالرحمن نامی راوی نے اپنے ہاتھ کے ذریعے زمین کی طرف اشارہ کر کے یہ بات بیان کی ( نبی اکرم صلی اللہ علیہ وسلم نے ارشاد فرمایا : ) ” جو شخص تنگدست کو مہلت دیتا ہے ، یا اُسے ادائیگی معاف کر دیتا ہے ، اللہ تعالی اسے جہنم کی تپش سے بچائے گا “ ۔
یہ روایت امام أحمد نے نقل کی ہے اور اس کی سند میں ایک راوی عبداللہ بن جعوبہ سلمی ہے ، میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال صحیح کے رجال ہیں ۔

سیدنا کعب بن عجرہ رضی اللہ عنہ ، نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص تنگدست کو مہلت دیتا ہے ، یا اُسے آسانی فراہم کرتا ہے ، تو اللہ تعالیٰ اس شخص کو اس دن اپنے سائے میں رکھے گا ، جس دن اس کے سائے کے علاوہ اور کوئی سایہ نہیں ہو گا“ ۔
یہ روایت امام طبرانی نے تینوں کتابوں میں نقل کی ہے اور اس کی سند میں ایک راوی عبیدہ بن معتب ہے اور وہ متروک ہے ۔

سیدنا اسعد بن زرارہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص یہ پسند کرتا ہو کہ اللہ تعالیٰ اس کو اس دن سایہ نصیب کرے ، جس دن اس کے سائے کے علاوہ اور کوئی سایہ نہیں ہو گا ، تو اسے تنگدست کو آسانی فراہم کرنی چاہیے ، یا اسے ادائیگی معاف کر دینی چاہیے “ ۔
یہ روایت امام طبرانی نے معجم کبیر میں عاصم بن عبیداللہ کے حوالے سے ، سیدنا اسعد رضی اللہ عنہ سے نقل کی ہے ، عاصم نامی راوی ضعیف ہے ، اُس نے سیدنا اسعد بن زرارہ رضی اللہ عنہ کا زمانہ نہیں پایا ہے ۔

سیدنا ابودرداء ، نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص تنگ دست کو مہلت دے ، یا اسے ادائیگی معاف کر دے ، قیامت کے دن اللہ تعالیٰ اُسے اپنا سایہ عطا کرے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی خالد بن عبدالرحمن مخزومی ہے اور اس کے ضعیف ہونے پر اتفاق پایا جاتا ہے ۔

سیدنا ابوالیسر رضی اللہ عنہ بیان کرتے ہیں : میں نبی اکرم صلی اللہ علیہ وسلم کے بارے میں گواہی دے کر یہ بات بیان کرتا ہوں کہ میں نے آپ صلی اللہ علیہ وسلم کو یہ ارشاد فرماتے ہوئے سنا ہے : ” لوگوں میں سے سب سے پہلے ، جو شخص قیامت کے دن اللہ کے سائے میں آئے گا ، وہ ایسا شخص ہو گا ، جس نے تنگدست کو اتنی مہلت دی ہو گی ، جب تک اسے گنجائش نہیں ملتی ، یا جو چیز اس سے لینی تھی ، وہ چیز اس پر صدقہ کر دی ہو گی ، اور یہ کہا: ہو گا : کہ میرا مال تم پر صدقہ ہے ، اور یہ اللہ کی رضا کے حصول کے لئے ہے ، اور پھر اس نے ( لین دین کے ) صحیفے کو پھاڑ دیا ہو “ ۔ ( علامہ ہیثمی فرماتے ہیں : ) میں یہ کہتا ہوں : سیدنا ابوالیسر رضی اللہ عنہ کے حوالے سے ” صحیح “ میں ایک حدیث مذکور ہے ، جو اس حدیث کے علاوہ ہے ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔

سیدنا شداد بن اوس رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص تنگدست کو مہلت دے ، یا ( لازم ادائیگی کو ) اُس پر صدقہ کر دے گا ، تو اللہ تعالیٰ قیامت کے دن اُسے اپنے سائے میں رکھے گا “ ۔
یہ روایت امام طبرانی نے معجم اوسط میں نقل کی ہے اور اس کی سند میں ایک راوی یحیی بن سلام افریقی ہے اور وہ ضعیف ہے ۔

سیدنا جابر بن عبدالله رضی اللہ عنہ بیان کرتے ہیں : میں اپنے محبوب ( یعنی نبی اکرم صلی اللہ علیہ وسلم ) کے بارے میں گواہی دے کر یہ بات بیان کرتا ہوں : کہ میں نے آپ کو یہ ارشاد فرماتے ہوئے سنا ہے : ” قیامت کے دن ، اللہ تعالیٰ اس شخص کو اپنے سائے میں رکھے گا ، جو تنگدست کو مہلت دے گا ، یا اپاہج شخص کی مدد کرے گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عبداللہ بن سعید بن ابوسعید مقبری ہے اور وہ متروک ہے ۔

سیدنا ابوقتادہ رضی اللہ عنہ اور سیدنا جابر بن عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص یہ پسند کرتا ہو کہ اللہ تعالیٰ اسے قیامت کی پریشانیوں سے نجات عطا کرے ، اور اسے اپنے عرش کے سائے میں رکھے اُسے تنگدست کو مہلت دینی چاہیئے “ ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جو شخص تنگدست کو مہلت دے گا ، اللہ تعالی قیامت کے دن اُسے اپنے سائے میں رکھے گا اور ہر بھلائی صدقہ ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یحیی بن یزید بن عبدالملک نوفلی ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص تنگدست کو گنجائش ملنے تک کی مہلت دے گا ، اللہ تعالیٰ اس شخص کو اس کے گناہ کے حوالے سے اس کی نوبت تک کی مہلت دے گا “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی حکم بن جارود ہے ، جسے ازدی نے ضعیف قرار دیا ہے ، اور حکم کا استاد ، اور اس کے استاد کا استاد ، میں ان دونوں سے واقف نہیں ہوں ۔

سیدنا بریدہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص تنگدست کو مہلت دے گا ، تو اسے ہر ایک دن ، اتنی رقم جتنا صدقہ کرنے کا ثواب ملے گا“ ۔ راوی بیان کرتے ہیں : پھر میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جو شخص تنگدست کو مہلت دے گا ، اُسے روزانہ اُس سے دُگنی رقم صدقہ کرنے کا ثواب ملے گا “ ۔ میں نے عرض کی : یا رسول اللہ ! میں نے پہلے آپ کو یہ ارشاد فرماتے ہوئے سنا کہ جو شخص تنگدست کو مہلت دے گا تو اسے روزانہ اتنی رقم صدقہ کرنے کا ثواب ملے گا “ ۔ پھر میں نے آپ کو یہ ارشاد فرماتے ہوئے سنا : ” جو شخص تنگدست کو مہلت دے گا اسے روزانہ دگنی رقم صدقہ کرنے کا ثواب ملے گا “ ۔ تو نبی اکرم صلی اللہ علیہ وسلم نے ارشاد فرمایا : ” جب قرض کی واپسی کا وقت نہ آیا ہو ، اس سے پہلے روزانہ اتنی رقم صدقہ کرنے کا ثواب ملے گا ، اور جب وہ وقت گزر جائے اور وہ پھر بھی اسے مہلت دے ، تو اسے روزانہ اُس سے دُگنی رقم صدقہ کرنے کا ثواب ملے گا “ ۔ ( علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا ایک حصہ نقل کیا ہے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کسی شخص کا ، کسی دوسرے شخص پر حق ہو ، اور وہ اس کو متعین مدت تک مؤخر کر دے ، تو اسے صدقہ کرنے کا اجر ملے گا ، اور اگر وہ متعین مدت کے بعد بھی اس کو مؤخر کر دے ، تو اُسے روازنہ اتنی رقم صدقہ کرنے کا اجر ملے گا “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابوداؤد نابینا ہے اور وہ کذاب ہے ۔