مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” خوشحال شخص کا ( ادائیگی میں ) ٹال مٹول کرنا ظلم ہے ، اور جب کسی شخص کو ( وصولی کے لئے ) کسی دوسرے کے سپرد کیا جائے ، تو اسے چلے جانا چاہیئے “ ۔
یہ روایت امام بزار نے نقل کی ہے ، اس کی سند میں ایک راوی اسماعیل بن مسلم مکی ہے اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک ہی سودے میں ، دو سودے کرنے سے منع کیا ہے ، اور یہ ارشاد فرمایا ہے : ” خوشحال شخص کا ( ادائیگی میں ) ٹال مٹول کرنا ظلم ہے ، جب ایک شخص کو کسی دوسرے شخص کے حوالے کیا جائے گا ، تو اُسے دوسرے کے پیچھے چلے جانا چاہیے “ ۔
یہ روایت امام بزار نے نقل کی ہے اور اس کے رجال صحیح کے رجال ہیں ، صرف حسن بن عرفہ نامی راوی کا معاملہ مختلف ہے ، اور وہ ثقہ ہے ۔

سیدنا علی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ ، ظالم خوشحال شخص اور جاہل بوڑھے اور غریب متکبر کو پسند نہیں کرتا ہے “ ۔
یہ روایت امام بزار نے نقل کی ہے اور امام طبرانی نے معجم اوسط میں نقل کی ہے ، تاہم انہوں نے یہ الفاظ نقل کیے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ ، ظالم خوشحال ، جاہل بوڑھے اور غریب متکبر کو ناپسند کرتا ہے “ ۔ اس روایت کی سند میں ایک راوی حارث اعور ہے اور وہ ضعیف ہے ، ویسے اس کی توثیق کی گئی ہے ۔

سیدہ خولہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ ایسی امت کو پاکیزگی عطا نہیں کرتا ، جس کا کمزور شخص ، طاقتور شخص سے حق کو کسی تردد ( یا مشکل ) کے بغیر نہیں لے سکتا ، پھر آپ نے ارشاد فرمایا : جس شخص کا قرض خواہ ، اپنے حق کے حوالے سے مقروض سے راضی ہو کر جائے ، تو اس ( مقروض ) کے لیے زمین کے جانور ، پانی کی مچھلیاں دعائے رحمت کرتے ہیں ، اور جس شخص کا قرض خواہ اُس سے ناراض ہو کر جائے تو اس ( مقروض ) کے خلاف ہر دن اور رات میں ، ہر جمعے ( یعنی ہفتے ) میں ، اور ہر مہینے میں زیادتی نوٹ کی جاتی ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابوسعد بقال ہے اور وہ ضعیف ہے ۔