مجمع الزوائد ومنبع الفوائد

محمد بن سوقہ اپنے والد کا یہ بیان نقل کرتے ہیں : جب عمرو بن حریث نے گھر بنایا ، تو میں ان کے پاس آیا تاکہ ان سے ان کا گھر کرائے پر لے لوں ، انہوں نے دریافت کیا : تم اس کا کیا کرو گے ؟ میں نے کہا: میں یہ چاہتا ہوں کہ میں یہاں بیٹھ کر خرید و فروخت کیا کروں گا ، انہوں نے فرمایا : اگر تم یہ بات کہہ رہے ہو ، تو پھر میں تمہیں اس گھر کے بارے میں ایک حدیث بیان کرتا ہوں ، یہ گھر یہاں رہنے والے کے لئے برکت والا ہے اور اس شخص کے لئے برکت والا ہو گا ، جو اس میں کوئی چیز فروخت کرے یا خریدے ، اس کی وجہ یہ ہے کہ ایک مرتبہ میں نبی اکرم صلی اللہ علیہ وسلم کی خدمت میں حاضر ہوا ، نبی اکرم صلی اللہ علیہ وسلم کے پاس کچھ مال رکھا ہوا تھا ، آپ نے اس مال میں سے مٹھی بھر درہم لیے اور فرمایا : اے عمرو ! یہ لے لو ، میں نے وہ لے لیے ، میں وہ لے کر اپنی والدہ کے پاس آیا ، میں نے کہا: اے امی جان ! آپ یہ درہم سنبھال کے رکھ لیں ہم بات میں اس بات کا جائزہ لیں گے کہ ہم اسے کہاں خرچ کریں ؟ کیونکہ یہ وہ دراہم ہیں ، جو نبی اکرم صلی اللہ علیہ وسلم نے مجھے عطا کیے ہیں اور میں نے لیے ہیں ، پھر جتنا عرصہ اللہ کو منظور تھا ، اتنا عرصہ گزر گیا یہاں تک کہ ہم لوگ کوفہ آ گئے میں نے ایک گھر خریدنے کا ارادہ کیا ، تو میری والدہ نے مجھ سے کہا: اے میرے بیٹے ! جب تم گھر خریدنے لگو اور اس کی ادائیگی کی تیاری کر لو ، تو تم مجھے بتا دینا تو میں نے ایسا ہی کیا پھر میں اپنی والدہ کے پاس آیا میں نے انہیں بلایا جب وہ آئیں تو مال ان کے پاس رکھا ہوا تھا انہوں نے اپنا کچھ مال نکالا اور ان دراہم میں ڈال دیا ( جو میں نے ادائیگی میں دینے میں تھے ) اور پھر اپنے ہاتھ کے ذریعے انہیں ملا دیا میں نے کہا: اے امی جان ! یہ کیا چیز ہے ؟ انہوں نے فرمایا : اے میرے بیٹے ! یہ وہ دراہم ہیں جو تم میرے پاس لے کے آئے تھے اور تم نے یہ بات بیان کی تھی کہ یہ نبی اکرم صلی اللہ علیہ وسلم نے اپنے دست مبارک کے ذریعے تمہیں دیے ہیں ، تو مجھے یہ پتہ ہے کہ یہ گھر برکت والا ہو گا ، اس شخص کے لئے ، جو اس میں بیٹھے گا اور برکت والا ہو گا ، اس شخص کے جو اس میں کوئی چیز فروخت کرے گا ، یا خریدے گا ۔
یہ روایت امام طبرانی نے معجم کبیر میں نقل کی ہے امام ابویعلیٰ نے یہ الفاظ نقل کیے ہیں : ( راوی بیان کرتے ہیں : ) میں نبی اکرم صلی اللہ علیہ وسلم کی خدمت میں حاضر ہوا آپ نے ایک اونٹ قربان کروایا تھا آپ نے اسے تقسیم کرنے کا حکم دیا تقسیم کرنے والے صاحب سے آپ نے فرمایا : عمرو کو بھی اس میں سے ایک حصہ دے دینا ، لیکن ان صاحب نے مجھے نہیں دیا وہ مجھ سے غافل رہ گئے جب میں اگلے دن نبی اکرم صلی اللہ علیہ وسلم کی خدمت میں حاضر ہوا تو آپ کے سامنے کچھ درہم موجود تھے ، آپ نے دریافت کیا : میں نے تمہیں جس کے بارے میں ہدایت کی تھی تم نے وہ حصہ لے لیا تھا راوی کہتے ہیں : میں نے عرض کی : یا رسول اللہ ! انہوں نے مجھے کچھ بھی نہیں دیا ، راوی بیان کرتے ہیں : تو نبی اکرم صلی اللہ علیہ وسلم نے مٹھی بھر درہم لئے اور پھر وہ مجھے عطا کر دیے ۔ ۔ ۔ اس کے بعد راوی نے حسب سابق حدیث ذکر کی ہے ۔ اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔