مجمع الزوائد ومنبع الفوائد

سیدنا عبداللہ بن عمر صلی اللہ علیہ وسلم نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص چالیس دن تک اناج کی ذخیرہ اندوزی کرتا ہے وہ اللہ تعالیٰ سے لاتعلق ہو جاتا ہے اور اللہ تعالی اس سے لا تعلق ہو جاتا ہے اور جس بھی محلے کے لوگ ایسی حالت میں صبح کرتے ہیں کہ ان کے درمیان کوئی بھوکا شخص موجود ہو ، تو ان لوگوں سے اللہ تعالیٰ کا ذمہ لاتعلق ہو جاتا ہے “ ۔
یہ روایت امام أحمد امام ابویعلیٰ امام بزار اور امام طبرانی نے معجم اوسط میں نقل کی ہے اس کی سند میں ایک راوی ابوبشر املوکی ہے ، جسے یحیی بن معین نے ثقہ قرار دیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کوئی چیز ذخیرہ کرتا ہے اور اس کا مقصد یہ ہو کہ اس طرح مسلمانوں کے خلاف قیمتیں زیادہ کر لے گا تو ایسا شخص گناہگار ہو گا“ ۔
یہ روایت امام أحمد نے نقل کی ہے اس کی سند میں ایک راوی ابومعشر ہے اور وہ ضعیف ہے ویسے اس کی توثیق کی گئی ہے ۔

حسن بیان کرتے ہیں : سیدنا معقل بن یسار رضی اللہ عنہ کی طبعیت زیادہ خراب ہو گئی تو عبیداللہ بن زیاد ان کی عیادت کرنے کے لئے ان کے پاس آئے ۔ انہوں نے کہا: کہ اے سیدنا معقل رضی اللہ عنہ کیا آپ یہ بات جانتے ہیں کہ میں نے حرام طور پر خون بہایا ہے انہوں نے جواب دیا : جی نہیں ! میں نہیں جانتا اس نے دریافت کیا کہ کیا آپ یہ بات جانتے ہیں کہ میں نے مسلمانوں کی قیمتوں میں کچھ دخل دیا سیدنا معقل رضی اللہ عنہ نے جواب دیا میں نہیں جانتا پھر انہوں نے فرمایا : تم لوگ مجھے بٹھاؤ پھر انہوں نے فرمایا : اے عبیداللہ تم سنو میں تمہیں ایک ایسی چیز بیان کرتا ہوں جو میں نے نبی اکرم صلی اللہ علیہ وسلم سے ایک مرتبہ نہیں دو مرتبہ نہیں ( یعنی اس سے زیادہ مرتبہ سنی ہے ) میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” جو شخص مسلمانوں کی قیمتوں میں دخل دیتا ہے تاکہ ان کے خلاف انہیں زیادہ کر دے تو اللہ تعالیٰ کے ذمہ یہ بات لازم ہے کہ قیامت کے دن اس شخص کو آگ کے ایک بڑے حصے میں بٹھائے “ ۔ عبیداللہ نے دریافت کیا : کیا آپ نے خود نبی اکرم صلی اللہ علیہ وسلم کی زبانی یہ بات سنی ہے ؟ انہوں نے فرمایا : جی ہاں ! ایک مرتبہ نہیں دو مرتبہ نہیں ( اس سے زیادہ مرتبہ سنی ہے ) ۔
یہ روایت امام أحمد نے امام طبرانی نے معجم کبیر اور معجم اوسط میں نقل کی ہے ، تاہم انہوں نے یہ الفاظ نقل کیے ہیں : ” اللہ تعالیٰ کے ذمہ یہ بات لازم ہے کہ اسے آگ کے بڑے حصے میں ڈال دے “ ۔ اس روایت کی سند میں ایک راوی زید بن مرہ ابومعلی ہے میں نے کسی کو اس کے حالات بیان کرتے ہوئے نہیں پایا ہے اس روایت کے بقیہ رجال صحیح کے رجال ہیں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” مکہ میں ذخیرہ اندوزی کرنا الحاد ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبداللہ بن مومل ہے ، جسے ابن حبان اور دیگر حضرات نے ثقہ قرار دیا ہے اور ایک جماعت نے اسے ضعیف کہا: ہے ۔

سیدنا معاذ بن جبل رضی اللہ عنہ بیان کرتے ہیں : میں نے نبی اکرم صلی اللہ علیہ وسلم سے ذخیرہ اندوزی کے بارے میں دریافت کیا کہ یہ کیا ہے ؟ نبی اکرم صلی اللہ علیہ وسلم نے ارشاد فرمایا : ” یہ کہ جب آدمی قیمتیں کم ہونے کے بارے میں سنے تو یہ چیز اسے بری لگے اور جب زیادہ ہونے کے بارے میں سنے تو وہ اس پر خوش ہو ذخیرہ اندوزی کرنے والا بندہ برا ہے کہ اگر اللہ تعالی قیمتیں کم کر دے تو وہ غمگین ہو جاتا ہے اور اگر اللہ تعالی قیمتیں زیادہ کر دے تو وہ خوش ہوتا ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی سلیمان بن سلمہ خبائری ہے اور وہ متروک ہے ۔