مجمع الزوائد ومنبع الفوائد

سیدنا سمرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ آدمی اپنے بھائی کی شادی کے پیغام پر شادی کا پیغام بھیجے ، یا اس کے سودے پر سودا کرے ۔
یہ روایت امام أحمد نے نقل کی ہے اس کی سند میں ایک راوی عمران بن داور قطان ہے ، جسے ابوحاتم اور ابن حبان نے ثقہ قرار دیا ہے امام ابوداؤد اور دیگر حضرات نے اسے ضعیف کہا: ہے اس روایت کے بقیہ رجال صحیح کے رجال ہیں ۔

زید بن اسلم بیان کرتے ہیں : میں نے ایک شخص کو سیدنا عبداللہ بن عمر رضی اللہ عنہما سے بیع مزایدہ کے بارے میں دریافت کرتے ہوئے سنا تو سیدنا عبداللہ بن عمر رضی اللہ عنہما نے فرمایا نبی اکرم صلی اللہ علیہ وسلم نے اس بات سے منع کیا ہے کہ کوئی شخص اپنے بھائی کے سودے پر سودا کرے البتہ مال غنیمت اور وراثت کا حکم مختلف ہے ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے تاہم اس میں یہ الفاظ نہیں ہیں : ” البتہ مال غنیمت اور وراثت کا حکم مختلف ہے “ ۔
یہ روایت امام أحمد نے اور امام طبرانی نے معجم اوسط میں نقل کی ہے اس کی سند میں ایک راوی ابن لہیعہ ہے اس کی نقل کردہ حدیث حسن ہے اس روایت کے بقیہ رجال صحیح کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے کوئی ایک شخص اپنے بھائی کے سودے پر ہرگز سودا نہ کرے اور اس کی شادی کے پیغام پر ، پیغام نہ بھیجے “ ۔
یہ روایت امام ابویعلیٰ نے نقل کی ہے اس کی سند میں ایک راوی بشر بن حسین ہے اور وہ کذاب ہے ۔

سیدنا انس رضی اللہ عنہ انصار سے تعلق رکھنے والے ایک شخص کے بارے میں نقل کرتے ہیں : وہ نبی اکرم صلی اللہ علیہ وسلم کی خدمت میں حاضر ہوا اور آپ کے سامنے حاجت مند ہونے کی شکایت کی ، تو نبی اکرم صلی اللہ علیہ وسلم نے ارشاد فرمایا : کیا تمہارے پاس کوئی چیز ہے ؟ تو وہ نبی اکرم صلی اللہ علیہ وسلم کے پاس ایک چٹائی اور ایک پیالہ لے آیا ، نبی اکرم صلی اللہ علیہ وسلم نے فرمایا : کون اسے خریدے گا ؟ ایک صاحب نے عرض کی : میں ان دونوں کو ایک درہم کے عوض میں خرید لوں گا نبی اکرم صلی اللہ علیہ وسلم نے فرمایا : کون ایک درہم سے زیادہ دے گا ؟ تو حاضرین خاموش رہے ۔ نبی اکرم صلی اللہ علیہ وسلم نے فرمایا : کون زیادہ دے گا ؟ تو ایک صاحب بولے : میں دو درہم کے عوض میں ان دونوں کو لے لیتا ہوں ۔ نبی اکرم صلی اللہ علیہ وسلم نے فرمایا : یہ تمہارے ہوئے ، پھر آپ نے ارشاد فرمایا : ” مانگنا ، تین میں سے کسی ایک فرد کے لئے حلال ہے ایسا خون جو تکلیف پہنچانے والا ہو ( یعنی قتل کی دیت دینی ہو ) ایسا تاوان جو پریشان کرنے والا ہو اور ایسی غربت جو خاک آلود کر دے “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابوداؤد اور دیگر حضرات نے سیدنا انس صلی اللہ علیہ وسلم کے حوالے سے ایک شخص سے نقل کی ہے ۔
یہ روایت امام أحمد نے نقل کی ہے امام ترمذی نے اس کی سند کو حسن قرار دیا ہے ۔

سیدنا سفیان بن وہب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو سنا ہے آپ صلی اللہ علیہ وسلم نے ” مزایده “ ( یعنی زیادہ بولی: لگا کر کوئی چیز خریدنے ) سے منع کیا ہے ۔
یہ روایت امام بزار نے نقل کی ہے اور اس کی سند حسن ہے ۔