مجمع الزوائد ومنبع الفوائد

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک ہی سودے میں دو سودے کرنے سے منع کیا ہے ۔ سماک نامی راوی کہتے ہیں : ( اس سے مراد یہ ہے ) ایک شخص کوئی چیز فروخت کرتا ہے اور پھر یہ کہتا ہے ، ادھار کی صورت میں یہ اتنے اتنے کی ہو گی اور نقد کی صورت میں یہ اتنے اتنے کی ہو گی ۔
یہ روایت امام بزار اور امام أحمد نے نقل کی ہے ۔

امام طبرانی نے ان کے حوالے سے معجم اوسط میں یہ الفاظ نقل کیے ہیں : نبی اکرم صلی اللہ علیہ وسلم نے ارشاد فرمایا : ” ایک سودے میں دو سودے حلال نہیں ہیں “ ۔

یہ روایت انہوں نے معجم کبیر میں نقل کی ہے اور اس کے الفاظ یہ ہیں : ” دو سودوں میں ، ایک سودا سود ہے “ ۔
یہ روایت ” موقوف “ ہے ۔
یہ روایت امام بزار نے اسی طرح نقل کی ہے اور یہ بات زائد نقل کی ہے : نبی اکرم صلی اللہ علیہ وسلم نے ہمیں اچھی طرح وضو کرنے کا حکم دیا ہے “ ۔ امام أحمد کے رجال ثقہ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خوشحال شخص کا ( ادائیگی میں ) ٹال مٹول کرنا ظلم ہے اور جب کسی شخص کو وصولی کے لئے کسی دوسرے کے سپرد کیا جائے تو اسے دوسرے شخص کے پیچھے جانا چاہیے اور ایک سودے میں دو سودے جائز نہیں ہیں“ ۔
یہ روایت امام أحمد اور امام بزار نے نقل کی ہے ، ان کے الفاظ یہ ہیں : ” نبی اکرم صلی اللہ علیہ وسلم نے ایک دو سودے میں دو سودے کرنے سے منع کیا ہے “ ۔ امام أحمد کے رجال صحیح کے رجال ہیں ۔

عبدالوارث بن سعد بیان کرتے ہیں : میں مکہ آیا وہاں میں نے امام ابوحنیفہ امام ابن ابولیلیٰ اور امام ابن شبرمہ کو پایا میں نے امام ابوحنیفہ سے سوال کیا میں نے کہا: ایسے شخص کے بارے میں آپ کیا کہتے ہیں جو کوئی چیز فروخت کرتا ہے اور پھر کوئی شرط عائد کر دیتا ہے ۔ انہوں نے فرمایا : سودا باطل ہو گا اور شرط بھی باطل ہو گی ، پھر میں ابن ابولیلیٰ کے پاس آیا میں نے ان سے یہی سوال کیا ، تو انہوں نے فرمایا : سودا جائز ہو گا اور شرط باطل ہو گی پھر میں ابن شبرمہ کے پاس آیا میں نے ان سے یہ سوال کیا ، تو انہوں نے فرمایا : سودا بھی جائز ہو گا اور شرط بھی جائز ہو گی ۔ میں نے کہا: سبحان اللہ ! کیا بات ہے ؟ عراق کے تین فقہاء ایک ہی مسئلے کے بارے میں میرے سامنے مختلف آراء پیش کر رہے ہیں میں امام ابوحنیفہ کے پاس آیا میں نے انہیں اس بارے میں بتایا تو انہوں نے فرمایا : مجھے نہیں معلوم ان دونوں نے کس بنیاد پر یہ فتوی دیا ہے ؟ عمرو بن شعیب نے اپنے والد کے حوالے سے اپنے دادا کے حوالے سے مجھے یہ حدیث بیان کی ہے کہ نبی اکرم صلی اللہ علیہ وسلم نے سودا کرنے میں شرط رکھنے سے منع کیا ہے ، تو سودا بھی باطل ہو گا اور شرط بھی باطل ہو گی ۔ عبدالوارث کہتے ہیں : پھر میں ابن ابولیلیٰ کے پاس آیا اور انہیں یہ بات بتائی تو انہوں نے بتایا کہ مجھے نہیں معلوم کہ ان دونوں نے کس بنیاد پر یہ فتوی دیا ہے ؟ ہشام بن عروہ نے اپنے والد کے حوالے سے سیدہ عائشہ رضی اللہ عنہا کے حوالے سے یہ حدیث مجھے بیان کی ہے ۔ وہ فرماتی ہیں : نبی اکرم صلی اللہ علیہ وسلم نے مجھے یہ حکم دیا تھا کہ میں بریرہ کو خرید کر اسے آزاد کر دوں ( این ابولیلی نے کہا: ) تو یہ سودا جائز ہے اور شرط باطل ہے ۔ عبدالوارث کہتے ہیں : میں ابن شبرمہ کے پاس آیا اور انہیں اس بارے میں بتایا تو انہوں نے فرمایا : مجھے نہیں معلوم کہ ان دونوں نے کس بنیاد پر یہ فتویٰ دیا ہے ؟ مسعر بن کدام نے محارب بن دثار کے حوالے سے سیدنا جابر بن عبداللہ رضی اللہ عنہ کا یہ بیان نقل کیا ہے ۔ نبی اکرم صلی اللہ علیہ وسلم نے ایک اونٹنی بھیجی ( یا فروخت کی ) تو یہ شرط عائد کی کہ مدینہ منورہ تک اس پر سواری کی جائے گی ( این شبرمہ نے کہا: ) تو یہاں سودا بھی جائز ہے اور شرط بھی جائز ہے ۔
یہ روایت امام طبرانی نے معجم اوسط میں نقل کی ہے اور سیدنا عبداللہ بن عمرو رضی اللہ عنہ سے منقول روایت کی سند میں کلام پایا جاتا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سیدنا عتاب بن اسید رضی اللہ عنہ سے فرمایا : میں تمہیں اللہ والے لوگوں ( یعنی اہل مکہ ) کی طرف بھیجنے لگا ہوں تم انہیں ایسا سودا کرنے سے منع کر دینا جو قبضے میں نہ لیا گیا ہو اور اس چیز کے منافع سے منع کر دینا جس کے ضمان کے وہ پابند نہ ہوں اور ایک شرط میں دو شرطیں عائد کرنے سے اور بیع اور قرض سے اور بیع اور سلف سے منع کر دینا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی یحیی بن صالح ایلی ہے امام ذہبی کہتے ہیں : یحیی بن بکیر نے اس کے حوالے سے منکر روایات نقل کی ہیں ۔ علامہ ہیثمی فرماتے ہیں : میں یہ کہتا ہوں : ذہبی کے علاوہ میں نے کسی اور کو اس کے بارے میں کلام کرتے ہوئے نہیں پایا ہے اس روایت کے بقیہ رجال صحیح کے رجال ہیں ۔

سیدنا حکیم بن حزام رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے سودے میں چار چیزوں سے منع کیا ہے سلف اور بیع ، ایک سودے میں دو شرطیں ، ایسی چیز فروخت کرنا جو میرے پاس نہ ہو اور ایسا منافع جس کے ضمان کی پابندی نہ ہو “ ۔ ( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس کا کچھ حصہ نقل کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی علاء بن خالد واسطی ہے ، جسے ابن حبان نے ثقہ قرار دیا ہے اور موسیٰ بن اسماعیل نے اسے ضعیف کہا: ہے ۔

سیدنا عتاب بن اسید رضی اللہ عنہ بیان کرتے ہیں : جب نبی اکرم صلی اللہ علیہ وسلم نے انہیں اہل مکہ کا امیر مقرر کیا ، تو ان سے فرمایا کیا میں تمہیں جس بات کی ہدایت کروں گا تم میری طرف سے اپنی قوم کو اس کی تبلیغ کر دو گے ؟ تم ان سے یہ کہنا کہ تم میں سے کوئی ایک شخص بیع اور سلف کو جمع نہ کرے اور تم میں سے کوئی ایک شخص دھوکے کا سودا نہ کرے اور تم میں سے کوئی ایک شخص کوئی ایسی چیز فروخت نہ کرے جو اس کے پاس نہ ہو “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی موسیٰ بن عبیدہ ربذی ہے اور وہ ضعیف ہے ۔

سیدنا عبداللہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں دو قسم کے روزوں ، دو قسم کی نمازوں دو قسم کے لباس دو قسم کے کھانوں دو قسم کے نکاح اور دو قسم کے سودوں سے منع کیا ہے جہاں تک دو روزوں کا تعلق ہے ، تو وہ عیدالفطر اور عیدالاضحی کے دن ( کا روزہ ) ہے جہاں تک دو نمازوں کا تعلق ہے ، تو صبح کی نماز کے بعد سورج نکلنے تک ادا کی جانے والی نماز ہے اور عصر کی نماز کے بعد سورج کے غروب ہونے تک والی نماز ہے جہاں تک دو لباسوں کا تعلق ہے ، تو ایک صورت یہ ہے کہ آدمی نے ایک کپڑے کو احتباء کے طور پر لپیٹا ہوا ہو اور اس کی شرمگاہ اور آسمان کے درمیان کوئی کپڑا نہ ہو اور جہاں تک دو قسم کے کھانوں کا تعلق ہے ، تو یہ ہے کہ آدمی بائیں ہاتھ سے کھائے جبکہ اس کا دایاں ہاتھ ٹھیک ہو اور یہ کہ آدمی ٹیک لگا کر کھائے جہاں تک دو قسم کے سودوں کا تعلق ہے ، تو ایک صورت یہ ہے کہ آدمی یہ کہے کہ تم مجھے یہ چیز فروخت کر دو اور میں تمہیں فروخت کر دوں گا جہاں تک دو قسم کے نکاح کا تعلق ہے ، تو فاحشہ عورت سے نکاح کرنا اور خالہ یا پھوپھی پر نکاح کرنا ( یعنی بیوی کی بھانجی یا بھتیجی کے ساتھ نکاح کرنا ) ۔ ( علا ہیثمی فرماتے ہیں : ) ” اطراف “ کے مصنف نے اس کی نسبت امام نسائی رحمہ اللہ کی طرف کی ہے میں نے سنن نسائی میں یہ روایت نہیں دیکھی ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔