مجمع الزوائد ومنبع الفوائد

سیدنا ابواسید رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : میرے ماں باپ آپ پر قربان ہوں میں نے بازار میں ایک جگہ دیکھی ہے اگر آپ اسے ملاحظہ فرما لیں ( تو مناسب ہو گا ) نبی اکرم صلی اللہ علیہ وسلم نے فرمایا : ٹھیک ہے پھر آپ اس کے ساتھ اٹھ کر گئے یہاں تک کہ بازار کی جگہ پر تشریف لے آئے جب آپ نے وہ جگہ دیکھی تو آپ کو وہ جگہ پسند آئی آپ نے اپنا پاؤں وہاں رکھا اور فرمایا : تمہارے بازار کی جگہ اچھی ہے یہ نہ تو ناقص ہو گی اور نہ ہی اس پر خراج عائد ہو گا “ ۔ علامہ ہیثمی فرماتے ہیں : ) میں یہ کہتا ہوں : امام ابن ماجہ نے
یہ روایت اس سیاق کے بغیر نقل کی ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی حسن بن علی بن حسن ابوحسن براد ہے میں نے کسی کو اس کے حالات بیان کرتے ہوئے نہیں پایا ہے ۔

سیدنا جبیر بن مطعم رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! شہروں میں کون سا حصہ سب سے زیادہ برا ہے ؟ نبی اکرم صلی اللہ علیہ وسلم نے فرمایا : مجھے نہیں معلوم پھر جب سیدنا جبرائیل علیہ اسلام آپ کے پاس آئے تو آپ نے فرمایا : جبرائیل شہروں میں کون سا حصہ زیادہ برا ہے ؟ انہوں نے عرض کی : مجھے نہیں معلوم میں اس بارے میں اپنے پروردگار سے دریافت کروں گا راوی بیان کرتے ہیں : پھر سیدنا جبرائیل علیہ السلام چلے گئے پھر جتنا اللہ کو منظور تھا اتنی دیر کے بعد وہ آئے اور بولے : اے سیدنا محمد ( صلی اللہ علیہ وسلم ) آپ نے مجھ سے دریافت کیا تھا شہروں میں کون سا حصہ زیادہ برا ہے ؟ تو میں نے بتایا تھا کہ مجھے نہیں معلوم ، میں نے اپنے پروردگار سے سوال کیا کہ شہروں میں کون سا حصہ زیادہ برا ہے ؟ تو اس نے فرمایا : وہاں کے بازار ۔
یہ روایت امام أحمد امام ابویعلیٰ نے اور امام طبرانی نے معجم کبیر میں اسی طرح نقل کی ہے ۔

امام بزار نے سیدنا جبیر رضی اللہ عنہ کے حوالے سے یہ بات نقل کی ہے : ایک شخص نے دریافت کیا : شہروں کا کون سا حصہ اللہ تعالیٰ کے نزدیک زیادہ پسندیدہ ہے اور شہروں کا کون سا حصہ اللہ تعالیٰ کے نزدیک سب سے زیادہ ناپسندیدہ ہے ؟ نبی اکرم صلی اللہ علیہ وسلم نے فرمایا : مجھے نہیں معلوم میں اس بارے میں جبرائیل سے دریافت کروں گا جب سیدنا جبرائیل علیہ السلام آپ کے پاس آئے تو انہوں نے آپ کو بتایا کہ اللہ تعالیٰ کے نزدیک سب سے زیادہ پسندیدہ حصہ مساجد ہیں اور اللہ تعالیٰ کے نزدیک سب سے زیادہ ناپسندیدہ حصہ بازار ہیں “ ۔ امام أحمد امام ابویعلیٰ اور امام بزار کے رجال صحیح کے رجال ہیں صرف عبداللہ بن محمد بن عقیل کا معاملہ مختلف ہے وہ حسن الحدیث ہے اور اس کے بارے میں کلام کیا گیا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے سیدنا جبرائیل علیہ السلام سے دریافت کیا : زمین کا کون سا حصہ زیادہ بہتر ہے ؟ انہوں نے جواب دیا مجھے نہیں معلوم نبی اکرم صلی اللہ علیہ وسلم نے فرمایا : تم اس بارے میں اپنے پروردگار سے دریافت کرنا تو سیدنا جبرائیل رو پڑے اور بولے : اے سیدنا محمد صلی اللہ علیہ وسلم کیا ہم اس سے سوال کریں گے ؟ وہ جو چاہتا ہے ہمیں اس کے بارے میں بتا دیتا ہے پھر وہ آسمان کی طرف بلند ہوئے پھر وہ نبی اکرم صلی اللہ علیہ وسلم کے پاس آئے اور بولے : زمین کا سب سے بہترین حصہ زمین میں موجود اللہ کے گھر ( یعنی مساجد ) ہیں ۔ نبی اکرم صلی اللہ علیہ وسلم نے دریافت کیا : اور زمین کا کون سا حصہ زیادہ برا ہے ؟ وہ پھر آسمان کی طرف چلے گئے ، پھر واپس آئے اور بتایا : زمین کا سب سے برا حصہ ، بازار ہیں “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عبید بن واقد ہے اور وہ ضعیف ہے ۔

سیدنا سلمان فارسی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم بازار میں داخل ہونے والے سب سے پہلے فرد نہ بننا اور وہاں سے نکلنے والے سب سے آخری فرد نہ بننا ، ( کیونکہ ) اس ( بازار ) میں شیطان انڈے دیتا اور بچے دیتا ہے “ ۔ ایک روایت میں یہ الفاظ ہیں : ” وہ معرکہ ( یعنی میدان جنگ ) ہے “ راوی کو شک ہے شاید یہ الفاظ ہیں : ” شیطان کے بیٹھنے کی جگہ ہے ، اور یہیں وہ اپنا جھنڈا نصب کرتا ہے “ ۔
یہ روایت امام طبرانی نے معجم کبیر میں نقل کی ہے پہلی روایت میں ایک راوی قاسم بن یزید ہے اگر تو یہ جرمی ہے ، تو پھر یہ ثقہ ہے اس روایت کے بقیہ رجال صحیح کے رجال ہیں دوسری روایت میں ایک راوی یزید بن سفیان ہے اور وہ ضعیف ہے ۔

سیدنا سلمان فارسی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص ( صبح کے وقت ) صبح کی نماز کے لئے جاتا ہے اسے ایک چوتھائی ایمان عطا کر دیا جاتا ہے اور جو شخص صبح کے وقت بازار کی طرف جاتا ہے اسے شیطان کا جھنڈا دے دیا جاتا ہے اور یہ جھنڈا صبح کے وقت سب سے پہلے جانے والے شخص اور شام کے وقت سب سے آخر میں آنے والے شخص کے ساتھ ہوتا ہے “ ۔ علامہ ہیثمی فرماتے ہیں : ) میں یہ کہتا ہوں : امام ابن ماجہ نے اس روایت کا کچھ حصہ نقل کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبیس بن میمون ہے اور وہ ضعیف اور متروک ہے ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” شیاطین اپنے جھنڈے لے کر بازاروں کی طرف جاتے ہیں اور پہلے داخل ہونے والے شخص کے ساتھ ( بازار میں ) داخل ہوتے ہیں اور آخری نکلنے والے شخص کے ساتھ ( بازار سے ) نکلتے ہیں “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبدالوہاب بن ضحاک ہے اور وہ متروک ہے ۔

یزید بن معاویہ بیان کرتا ہے : سیدنا عبداللہ بن مسعود رضی اللہ عنہ بازار کی طرف گئے وہاں ایک شخص یہ کہہ رہا تھا ۔ کچھ لوگوں کا بازار میں جھگڑا ہو گیا ہے میں نے آج کے دن کی طرح کبھی بھی گمراہ کرنے والا فتنہ نہیں دیکھا تو سیدنا عبداللہ رضی اللہ عنہ نے فرمایا : یہ گمراہ کرنے والا فتنہ نہیں ہے بلکہ یہ شیطان کا سینگ ہے ۔
یہ روایت امام طبرانی نے معجم کبیر میں نقل کی ہے اور یزید بن معاویہ اس بات کا اہل نہیں ہے کہ اس سے روایت نقل کی جائے ۔

بلاد بن عصمہ بیان کرتے ہیں : ایک مرتبہ میں سیدنا عبداللہ رضی اللہ عنہ کے ساتھ چلتا ہوا جا رہا تھا اسی دوران میں نے کچھ لوگوں کو دیکھا میں چلا گیا جب میں واپس آیا تو انہوں نے فرمایا : تم بازار کے ہجوم یا بوجھ ) سے بچ کے رہو ! کیونکہ وہ شیطان کا ہجوم ( یا بوجھ ) ہوتا ہے ۔
یہ روایت امام طبرانی نے معجم کبیر میں نقل کی ہے اور اس میں مجہول راوی ہیں ۔