مجمع الزوائد ومنبع الفوائد

سیدنا امام حسین بن علی رضی اللہ عنہما نبی اکرم صلی اللہ علیہ وسلم تک ” مرفوع “ حدیث کے طور پر یہ بات نقل کرتے ہیں : آپ نے ارشاد فرمایا : ” دھوکہ ہو جانا ، نہ تو قابل تعریف ہے اور نہ ہی اجر کا باعث ہے “ ۔
یہ روایت امام ابویعلیٰ نے نقل کی ہے اس کی سند میں ایک راوی ابوہشام قناد ہے ۔ امام ذہبی فرماتے ہیں : یہ معروف نہیں ہے تاہم میں نے امام ذہبی کے علاوہ کسی اور کا اس کے بارے میں کوئی کلام نہیں دیکھا ہے ۔

سیدنا امام حسن بن علی رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” دھوکہ دیا جانا نہ تو قابل تعریف ہے اور نہ ہی اجر کا باعث ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی محمد بن ہشام ہے بظاہر یہ لگتا ہے کہ یہ محمد بن ہشام بن عروہ ہے ۔ ” میزان “ میں ایسے کسی شخص کا ذکر نہیں ہے ، جس کا نام محمد بن ہشام ہو اور وہ ضعیف ہو اس روایت کے بقیہ حال ثقہ ہیں ۔

سیدنا ابوامامہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” مسترسل ( یعنی جو سودا کرتے ہوئے قیمت کو مجہول رکھے ، اُس ) کا غبن ، ( یعنی دھوکہ ) حرام ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی موسیٰ بن عمیرنا بینا ہے اور وہ انتہائی ضعیف ہے ۔