مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم میں سے کوئی ایک شخص قربانی کرے تو وہ اپنی قربانی میں سے ( یعنی اس کا گوشت ) کھائے “ ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر شخص کو اپنی قربانی ( کا گوشت ) کھانا چاہیئے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبداللہ بن خراش ہے ، جسے ابن حبان نے ثقہ قرار دیا ہے وہ بیان کرتے ہیں : یہ بعض اوقات غلطی کر جاتا ہے جمہور نے اسے ضعیف کہا: ہے ۔

عبداللہ بن عطاء بن ابراہیم نے اپنی والدہ اور اپنی نانی ( یا دادی ) ام عطاء کے حوالے سے یہ بات بیان کی ہے وہ دونوں خواتین بیان کرتی ہیں یہ منظر اس وقت بھی ہماری نگاہ میں ہے کہ ہم سیدنا زبیر بن عوام رضی اللہ عنہ کو دیکھ رہی تھیں جب وہ اپنے سفید خچر پر سوار ہو کر آئے اور بولے : اے اُم عطاء نبی اکرم صلی اللہ علیہ وسلم نے مسلمانوں کو اس بات سے منع کر دیا ہے کہ وہ تین دن سے زیادہ اپنی قربانی کے گوشت کو کھائیں میں نے دریافت کیا : میرے ماں باپ ( نبی اکرم صلی اللہ علیہ وسلم پر ) قربان ہوں ہمیں جو تحفے کے طور پر جو گوشت دیا جاتا ہے اس کا کیا کریں ؟ تو انہوں نے فرمایا : جو چیز تمہیں تحفے کے طور پر دی جاتی ہے تم اسے استعمال کر سکتے ہو ۔
یہ روایت امام أحمد نے اور امام ابویعلیٰ نے اور امام طبرانی نے معجم کبیر میں نقل کی ہے عبداللہ بن عطاء نامی شخص کو ابوحاتم نے ثقہ قرار دیا ہے یحیی بن معین نے اسے ضعیف کہا: ہے اس روایت کے بقیہ رجال ثقہ ہیں ۔