مجمع الزوائد ومنبع الفوائد

ابوعبداللہ جو سیدنا عبداللہ بن عمرو رضی اللہ عنہ کے غلام ہیں وہ بیان کرتے ہیں : سیدنا عبداللہ بن عمرو رضی اللہ عنہ نے ہمیں حدیث بیان کی ہم اس وقت بیت اللہ کا طواف کر رہے تھے ۔ انہوں نے بتایا نبی اکرم صلی اللہ علیہ وسلم نے ارشاد فرمایا ہے ” کوئی بھی دن ایسے نہیں ہیں جن میں کوئی عمل کرنا اللہ تعالیٰ کے نزدیک ان ایام ( میں عمل کرنے ) سے زیادہ محبوب ہو عرض کی گئی اللہ کی راہ میں جہاد کرنا بھی نہیں ؟ نبی اکرم صلی اللہ علیہ وسلم نے ارشاد فرمایا : اللہ کی راہ میں جہاد کرنا بھی نہیں البتہ اس شخص کا معاملہ مختلف ہے ، جو اپنی جان اور مال کو لے کر نکلتا ہے اور پھر واپس نہیں آتا یہاں تک کہ اس کا خالص خون بہا دیا جاتا ہے ( یعنی وہ جام شہادت نوش کر لیتا ہے “ ۔ عبدہ نامی راوی کہتے ہیں : اس سے مراد ( ذوالج کے پہلے ) دس دن ہیں ۔

ایک روایت میں یہ الفاظ ہیں : میں نبی اکرم صلی اللہ علیہ وسلم کے پاس موجود تھا اعمال کا ذکر کیا گیا تو آپ نے ارشاد فرمایا : کوئی بھی دن ایسے نہیں ہیں جن میں کوئی عمل کرنا اللہ تعالیٰ کے نزدیک اس ( عشرے میں عمل کرنے ) سے زیادہ محبوب ہو “ اس کے بعد راوی نے حسب سابق حدیث ذکر کی ہے ۔
یہ روایت امام أحمد نے نقل کی ہے اور امام طبرانی نے معجم کبیر میں نقل کی ہے یہ دونوں روایات دو اسناد کے ساتھ منقول ہیں جن میں سے ایک کے رجال ثقہ ہیں ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی بھی دن ایسے نہیں ہے جن میں عمل کرنا ( ذوالحج کے پہلے ) عشرے کے دنوں سے زیادہ فضیلت رکھتا ہو عرض کی گئی اللہ کی راہ میں جہاد کرنا بھی نہیں ؟ نبی اکرم صلی اللہ علیہ وسلم نے فرمایا : اللہ کی راہ میں جہاد کرنا بھی نہیں “ ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ کے نزدیک کوئی بھی دن ( ذوالحج کے پہلے عشرے کے دنوں ) سے زیادہ عظمت والے نہیں ہیں اور ( ذوالج کے پہلے ) عشرے کے دنوں میں عمل کرنے سے زیادہ اللہ تعالیٰ کے نزدیک اور کوئی عمل زیادہ پسندیدہ نہیں ہے ، تو تم لوگ ان دنوں میں بکثرت تسبیح پڑھو لا الہ الا اللہ پڑھو الحمد للہ پڑھو اللہ اکبر پڑھو “ ۔ ( علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اختصار کے ساتھ منقول ہے ، جس میں صرف تسبیح وغیرہ کا ذکر ہے ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” دنیا کے دنوں میں سب سے زیادہ فضیلت والے عشرے کے دن ہیں ( راوی کہتے ہیں ) یعنی ذوالحج کے ( پہلے عشرے کے دن ہیں ) عرض کی گئی : اتنے دن اللہ کی راہ میں ( بسر کرنا بھی زیادہ فضیلت نہیں رکھتا ) آپ نے ارشاد فرمایا : اتنے ہی دن اللہ کی راہ میں ( بسر کرنا بھی اتنی فضیلت ) نہیں رکھتا البتہ اس شخص کا معاملہ مختلف ہے ، جو اپنے چہرے کو مٹی میں خاک آلود کر لیتا ہے ( یعنی شہید ہو جاتا ہے ) نبی اکرم صلی اللہ علیہ وسلم نے عرفہ کے دن کا ذکر کرتے ہوئے یہ ارشاد فرمایا : یہ فخر کے اظہار کا دن ہے ۔ اس کے بعد راوی نے پوری حدیث ذکر کی ہے ، جو طویل روایت کے طور پر پہلے گزر چکی ہے ۔
یہ روایت امام بزار نے نقل کی ہے اور اس کی سند حسن ہے اور اس کے رجال ثقہ ہیں ۔

سیدنا ابوسعید خدری رضی اللہ عنہ روایت کرتے ہیں : نبی اکرم نے ارشاد فرمایا : ” اے فاطمہ ! اٹھ کر اپنی قربانی کے جانور کے پاس جاؤ اور ( اس کو ذبح کرنے کے وقت ) اس کے پاس موجود رہو کیونکہ اس کے خون کا جو بھی قطرہ گرے گا اس کے عوض میں تمہیں یہ چیز ملے گی کہ تمہارے گزشتہ گناہوں کی مغفرت ہو جائے گی ۔ انہوں نے عرض کی : یا رسول اللہ ! کیا یہ ہمارے اہل بیت کے لئے مخصوص ہے ؟ یا ہمارے لئے بھی ہے اور مسلمانوں کے لئے بھی ہے ؟ تو نبی اکرم صلی اللہ علیہ وسلم نے ارشاد فرمایا : بلکہ یہ ہمارے لئے بھی ہے اور مسلمانوں کے لئے بھی ہے “ ۔
یہ روایت امام بزار نے نقل کی ہے اس کی سند میں ایک راوی عطیہ بن قیس ہے ، جس کے بارے میں بہت زیادہ کلام کیا گیا ہے ویسے اس کی توثیق کی گئی ہے ۔

سیدنا عمران بن حصین رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے فاطمہ ! اٹھو اور اپنی قربانی کے ( ذبیح کے وقت ) پاس موجود رہو کیونکہ اس کے خون کے پہلے قطرے کے ساتھ تمہارے ہر اُس گناہ کی مغفرت ہو جائے گی جو تم نے کیا ہو گا اور تم یہ پڑھنا : ” بے شک میری نماز اور میری قربانی اور میری زندگی اور میری موت اللہ تعالیٰ کے لئے مخصوص ہے ، جو تمام جہانوں کا پروردگار ہے اس کا کوئی شریک نہیں ہے مجھے اس بات کا حکم دیا گیا ہے اور میں مسلمانوں میں سے ایک ہوں “ ۔ سیدنا عمران رضی اللہ عنہ نے عرض کی : یا رسول اللہ ! کیا یہ آپ کے لئے اور آپ کے اہل بیت کے لئے مخصوص ہے کہ آپ لوگ اس چیز کے اہل ہیں یا یہ مسلمانوں کے لئے عام ہے ؟ نبی اکرم صلی اللہ علیہ وسلم نے ارشاد فرمایا : ( جی نہیں ! ) بلکہ یہ مسلمانوں کے لئے عام ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی ابوحمزہ ثمالی ہے اور وہ ضعیف ہے ۔

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اے لوگو ! قربانی کرو اور اس کے خون کے حوالے سے اس کے ثواب کی امید رکھو کیونکہ خون اگرچہ زمین پر گرتا ہے لیکن وہ اللہ تعالی کی پناہ میں گرتا ہے ( یعنی اس کا اجر نوٹ کر لیا جاتا ہے ) “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی عمرو بن حصین عقیلی ہے اور وہ متروک الحدیث ہے ۔

سیدنا امام حسن بن علی رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنی خوشی کے ساتھ ثواب کی امید رکھتے ہوئے قربانی کرتا ہے ، تو وہ قربانی اس کے لئے جہنم سے بچاؤ کا ذریعہ بن جاتی ہے “ ۔
یہ روایت امام طبرانی نے معجم کبیر میں نقل کی ہے اور اس کی سند میں ایک راوی سلیمان بن عمرو نخعی ہے اور وہ کذاب ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم جس بھی چیز میں کوئی رقم خرچ کرتے ہو اس میں سے کوئی بھی چیز اللہ تعالیٰ کے نزدیک اس قربانی سے زیادہ محبوب نہیں ہے ، جسے عید کے موقع پر قربان کیا جائے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ابراہیم بن یزید خوزی ہے اور وہ ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : قربانی کے دن نبی اکرم صلی اللہ علیہ وسلم نے ارشاد فرمایا : ” آج کے دن میں انسان کوئی ایسا عمل نہیں کرتا جو خون بہانے ( یعنی قربانی کرنے ) سے زیادہ فضیلت رکھتا ہو البتہ اگر صلہ رحمی کی جائے تو اس کا معاملہ مختلف ہے “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی یحیی بن حسن خشنی ہے اور وہ ضعیف ہے ایک جماعت نے اسے ثقہ قرار دیا ہے ۔