مجمع الزوائد ومنبع الفوائد

عمر بن عبدالرحمن بن حارث بن ہشام بیان کرتے ہیں : سیدنا ابوبصرہ غفاری رضی اللہ عنہ کی ملاقات سیدنا ابوہریرہ رضی اللہ عنہ سے ہوئی وہ طور سے آ رہے تھے ۔ انہوں نے دریافت کیا : آپ کہاں سے آ رہے ہو ؟ انہوں نے فرمایا : میں طور سے آ رہا ہوں میں نے وہاں نماز ادا کی تھی ۔ انہوں نے فرمایا : اگر میں نے آپ کے روانہ ہونے سے پہلے آپ کو پا لیا ہوتا تو آپ نے سفر پر نہیں جانا تھا کیونکہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” صرف تین مساجد کی طرف سفر کیا جائے مسجد حرام میری یہ مسجد اور مسجد اقصی “ ۔
یہ روایت امام أحمد نے نقل کی ہے اور امام بزار نے اس کی مانند نقل کی ہے اور امام طبرانی نے معجم کبیر اور معجم اوسط میں نقل کی ہے امام أحمد کے رجال ثقہ اور ثبت ہیں ۔

سیدنا جابر رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” جن چیزوں کی طرف سواریوں پر سوار ہو کے جایا جاتا ہے ان میں سب سے بہتر سیدنا ابراہیم علیہ السلام کی مسجد ہے اور میری مسجد ہے “ ۔
یہ روایت امام أحمد نے نقل کی ہے اور امام طبرانی نے معجم اوسط میں نقل کی ہے اور اس کی سند حسن ہے ۔

شہر بیان کرتے ہیں : میں نے سیدنا ابوسعید خدری رضی اللہ عنہ کو سنا ان کے سامنے کوہ طور کا ذکر کیا گیا تو انہوں نے یہ بات بتائی نبی اکرم صلی اللہ علیہ وسلم نے ارشاد فرمایا ہے ” کسی مسجد میں نماز پڑھنے کی غرض سے سواریوں پر پالان نہ باندھے جائیں البتہ مسجد حرام مسجد اقصی اور میری اس مسجد کا معاملہ مختلف ہے ( یعنی ان کی طرف سفر کیا جا سکتا ہے ) اور کسی بھی مسلمان عورت کے لئے یہ مناسب نہیں ہے کہ وہ اپنے گھر سے سفر کرنے کے لئے نکلے البتہ اگر شوہر ساتھ ہو یا کوئی اور محرم ساتھ ہو ، تو حکم مختلف ہے اور دن کی دو گھڑیوں میں نماز ادا کرنا مناسب نہیں ہے فجر کی نماز کے بعد ، جب تک سورج نکل نہیں آتا اور دو دنوں میں روزہ رکھنا مناسب نہیں ہے جب رمضان کے روزے ختم ہوتے ہیں ( یعنی عیدالفطر کے دن ) اور قربانی کے دن “ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں
یہ روایت اس کی مانند منقول ہے لیکن میں نے اسے یہاں نقل کیا ہے کیونکہ اس کے الفاظ غریب ہیں ۔
یہ روایت امام أحمد نے نقل کی ہے شہر نامی راوی کے بارے میں کلام کیا گیا ہے اور اس کی نقل کردہ حدیث حسن ہے ۔

سیدنا علی رضی اللہ عنہ نے نبی اکرم صلی اللہ علیہ وسلم کا یہ فرمان نقل کیا ہے : ” سفر صرفتین مساجد کی طرف کیا جائے گا میری یہ مسجد ، مسجد حرام اور مسجد اقصیٰ ، کوئی عورت دو دن سے زیادہ کا سفر نہ کرے البتہ اگر اس کا شوہر یا کوئی محرم ساتھ ہو ، تو حکم مختلف ہے سال میں دو دن روزے نہ رکھے جائیں عیدالفطر اور عیدالاضحی کے دن اور دو وقت میں نماز نہ پڑھی جائے فجر کی نماز کے بعد ، جب تک سورج طلوع نہیں ہو جاتا اور عصر کے بعد ، جب تک سورج غروب نہیں ہو جاتا “ ۔
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی ابراہیم بن اسماعیل بن یحیی کہیلی ہے اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” سفر صرف تین مساجد کی طرف کیا جائے مسجد خیف ، مسجد حرام اور میری مسجد “ ۔ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے تا ہم اس میں مسجد خیف کا ذکر نہیں ہے ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی خثیم بن مروان ہے اور وہ ضعیف ہے ۔

سیدنا عمر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” صرف تین مساجد کی طرف سفر کیا جائے مسجد حرام ، میری یہ مسجد اور مسجد اقصی “ ۔
یہ روایت امام بزار نے نقل کی ہے اور اس کے رجال صحیح کے رجال ہیں البتہ امام بزار نے یہ کہا: ہے : حبان بن ہلال نے اس میں غلطی کی ہے ۔

سیدنا جابر رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” جس طرف سواریوں پر سوار ہو کر سفر کیا جاتا ہے ان میں سب سے بہتر سیدنا ابراہیم علیہ السلام کی مسجد ہے اور سیدنا محمد صلی اللہ علیہ وسلم کی مسجد ہے “ ۔
یہ روایت امام بزار نے نقل کی ہے اس کی سند میں ایک راوی عبدالرحمن بن ابوزناد ہے ، جسے ایک سے زیادہ افراد نے ثقہ قرار دیا ہے اور ایک جماعت نے اسے ضعیف کہا: ہے اس روایت کے بقیہ رجال صحیح کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں نبی اکرم صلی اللہ علیہ وسلم نے ارشاد فرمایا : ” میں انبیاء کے سلسلے کو ختم کرنے والا ہوں اور میری یہ مسجد انبیاء کی مساجد کے سلسلے کو ختم کرنے والی ہے اس بات کی سب سے زیادہ حق دار مساجد کہ جن کی زیارت کی جائے اور جن کی طرف سفر کیا جائے وہ مسجد حرام ہے اور میری مسجد ہے میری مسجد میں ایک نماز ادا کرنا اس کے علاوہ کسی بھی مسجد میں ایک ہزار نمازیں ادا کرنے سے زیادہ فضیلت رکھتا ہے البتہ مسجد حرام کا معاملہ مختلف ہے “ ۔
یہ روایت امام بزار نے نقل کی ہے اس کی سند میں ایک راوی موسیٰ بن عبیدہ ہے اور وہ ضعیف ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” صرف تین مساجد کی طرف سفر کیا جائے مسجد حرام ، مسجد مدینہ اور مسجد بیت المقدس “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال ثقہ ہیں ۔

سیدنا ابوالجعد ضمری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” صرف تین مساجد کی طرف سفر کیا جائے مسجد حرام ، میری یہ مسجد اور مسجد اقصی “ ۔
یہ روایت امام طبرانی نے معجم کبیر اور معجم اوسط میں نقل کی ہے اور اس کے رجال صحیح کے رجال ہیں
یہ روایت امام بزار نے بھی نقل کی ہے ۔