مجمع الزوائد ومنبع الفوائد

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جس نے میری قبر کی زیارت کی اس کے لئے میری شفاعت واجب ہو گئی “ ۔
یہ روایت امام بزار نے نقل کی ہے اس کی سند میں ایک راوی عبداللہ بن ابراہیم غفاری ہے اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص میرے پاس میری زیارت کرنے کے لئے آئے اور اس کو میری زیارت کے علاوہ اور کوئی کام نہ ہو ، تو میرے ذمہ یہ بات لازم ہے کہ میں قیامت کے دن اس کی شفاعت کرنے والا بنوں “ ۔
یہ روایت امام طبرانی نے معجم اوسط اور معجم کبیر میں نقل کی ہے اس کی سند میں ایک راوی مسلمہ بن سالم ہے اور وہ ضعیف ہے ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص حج کرے اور میرے مرنے کے بعد میری قبر کی زیارت کرے وہ اس شخص کی مانند ہے ، جس نے میری زندگی میں میری زیارت کی “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی حفص بن ابوداؤد قاری ہے ، جسے امام أحمد نے ثقہ قرار دیا ہے اور ائمہ کی ایک جماعت نے اسے ضعیف قرار دیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص نے میرے مرنے کے بعد میری قبر کی زیارت کی ، تو گویا اس نے میری زندگی میں میری زیارت کی “ ۔
یہ روایت امام طبرانی نے معجم صغیر اور معجم اوسط میں نقل کی ہے اس کی سند میں ایک راوی عائشہ بنت یونس ہیں میں نے کسی کو اس کے حالات بیان کرتے ہوئے نہیں پایا ہے ۔