مجمع الزوائد ومنبع الفوائد

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اہل مدینہ پر ایسا زمانہ آئے گا کہ لوگ یہاں سے مختلف علاقوں کی طرف چلے جائیں گے وہ خوشحالی تلاش کریں گے انہیں خوشحالی مل جائے گی اور وہ لوگ آئیں گے اور اپنے اہل خانہ کو ساتھ لے کر خوشحالی کی طرف چلے جائیں گے حالانکہ مدینہ منورہ ان کے لئے زیادہ بہتر تھا اگر انہیں علم ہوتا “ ۔
یہ روایت امام أحمد اور امام بزار نے نقل کی ہے امام بزار کے رجال صحیح کے رجال ہیں ۔

سیدنا ابوایوب انصاری رضی اللہ عنہ کے غلام افلح بیان کرتے ہیں : ان کا گزر سیدنا زید بن ثابت رضی اللہ عنہ اور سیدنا ابوایوب انصاری رضی اللہ عنہ کے پاس سے ہوا یہ دونوں صاحبان مسجد جنائز میں تشریف فرما تھے ان دونوں میں سے ایک نے دوسرے سے کہا: کیا آپ کو وہ حدیث یاد ہے ، جو اللہ کے رسول نے اس مسجد میں ہمیں بیان کی تھی جس میں اب اس وقت ہم موجود ہیں تو دوسرے صاحب نے جواب دیا : جی ہاں ! وہ مدینہ منورہ کے بارے میں تھی میں نے آپ کو یہ ارشاد فرماتے ہوئے سنا : ” عنقریب لوگوں پر ایسا زمانہ آئے گا کہ اس زمانے میں ان کے لئے زمین کے مختلف حصے فتح کر دیے جائیں گے تو لوگ نکل کر ان علاقوں کی طرف جائیں گے وہ وہاں خوشحالی آرام اور کھانا پینا پائیں گے پھر وہ حج یا عمرے کے لئے جاتے ہوئے اپنے بھائیوں کے پاس سے گزریں گے اور یہ کہیں گے : تم یہ پریشان زندگی اور شدید بھوک میں کیوں ٹھہرے ہوئے ہو ؟ نبی اکرم صلی اللہ علیہ وسلم نے ارشاد فرمایا : تو کچھ لوگ چلے جائیں گے اور کچھ وہیں رہ جائیں گے یہ بات آپ نے چند مرتبہ ارشاد فرمائی ( اور پھر فرمایا ) مدینہ ان کے لئے زیادہ بہتر ہے ، جو شخص یہاں کی تنگی اور شدت پر صبر سے کام لیتے ہوئے یہیں ٹھہرا رہے یہاں تک کہ اس کا انتقال ہو جائے تو قیامت کے دن میں اس کا گواہ ( راوی کو شک ہے شاید یہ الفاظ ہیں : ) اس کی شفاعت کرنے والا ہوؤں گا“ ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا ابواسید ساعدی رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ سیدنا حمزہ بن عبدالمطلب رضی اللہ عنہ کی قبر ( یعنی میت ) کے پاس موجود تھا لوگ ان کے چہرے پر چادر ڈالتے تھے تو ان کے پاؤں کھل جاتے تھے لوگ اس چادر کو کھینچ کر پاؤں پر ڈالتے تھے تو چہرہ ظاہر ہو جاتا تھا نبی اکرم صلی اللہ علیہ وسلم نے ارشاد فرمایا : یہ چادر ان کے چہرے پر ڈال دو اور ان کے پاؤں پر اس درخت ( کے پتے ) رکھ دو راوی بیان کرتے ہیں : پھر نبی اکرم صلی اللہ علیہ وسلم نے اپنا سر اٹھایا تو آپ کے اصحاب رو رہے تھے نبی اکرم صلی اللہ علیہ وسلم نے ارشاد فرمایا : ” لوگوں پر ایسا زمانہ آئے گا کہ وہ خوشحال علاقوں کی طرف نکل جائیں گے اور وہاں کھانا لباس اور سواریاں پائیں گے یہاں ایک لفظ کے بارے میں راوی کو شک ہے ) پھر وہ اپنے اہل خانہ کو خط لکھیں گے کہ ہماری طرف آ جاؤ کیونکہ حجاز کی سرزمین تو قحط سالی والی ہے حالانکہ مدینہ ان کے لئے زیادہ بہتر ہو گا اگر ان کو علم ہو “ ۔
یہ روایت امام طبرانی نے معجم کبیر میں نقل کی ہے اور اس کی سند حسن ہے ۔