مجمع الزوائد ومنبع الفوائد

سیدنا براء بن عازب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص مدینہ منورہ کو ” یثرب “ کہتا ہے وہ اللہ تعالیٰ سے مغفرت طلب کرے یہ ” طابہ “ ہے ” طابہ “ ہے “ ۔
یہ روایت امام أحمد اور امام ابویعلیٰ نے نقل کی ہے اور اس کے رجال ثقہ ہیں ۔

بذیح بیان کرتے ہیں : عبداللہ بن جعفر خلیفہ عبدالملک بن مروان کے پاس وفد کی شکل میں گئے وہ اس کے پاس گئے تو اس وقت ان کے پاس یحیی بن عبدالحکم موجود تھا یحیی نے ان سے دریافت کیا : تم نے ” خیبہ “ کیسا چھوڑا ہے ؟ اس کی مراد مدینہ منورہ تھی تو عبداللہ بن جعفر نے کہا: اللہ کے رسول نے تو اس کا نام ” طیبہ “ رکھا ہے اور تم اسے ” خیبہ “ کہہ رہے ہو ۔
یہ روایت امام طبرانی نے معجم کبیر میں نقل کی ہے بذیح نامی راوی کے حالات بیان کرتے ہوئے میں نے کسی کو نہیں پایا ہے ۔