مجمع الزوائد ومنبع الفوائد

سیدنا ابومحذورہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اذان کا منصب ہمیں اور ہمارے موالی کو دیا تھا سقایہ کا منصب بنو ہاشم کو دیا تھا اور حجابہ کا منصب بنوعبددار کو دیا تھا ۔
یہ روایت امام أحمد نے اور امام طبرانی نے معجم اوسط اور معجم کبیر میں نقل کی ہے اس کی سند میں ایک راوی ہذیل بن بلال اشعری ہے ، جسے امام أحمد اور دیگر حضرات نے ثقہ قرار دیا ہے امام نسائی رحمہ اللہ اور دیگر حضرات نے اسے ضعیف کہا: ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اے بنوطلحہ ! تم اسے حاصل کر لو یہ ہمیشہ اور یکے بعد دیگرے ( تم لوگوں کے پاس رہے گی ) تم سے کوئی ظالم ہی اسے الگ کرے گا “ ۔ راوی کہتے ہیں : اس سے مراد کعبہ کی حجابہ ( یعنی کلید برداری ) کا منصب ہے ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عبداللہ بن مومل ہے ، جسے ابن حبان نے ثقہ قرار دیا ہے وہ کہتے ہیں : یہ غلطی کر جاتا ہے ایک روایت کے مطابق یحیی بن معین نے اسے ثقہ کہا: ہے اور ایک جماعت نے اسے ضعیف قرار دیا ہے ۔

ابوطفیل بیان کرتے ہیں : سیدنا علی رضی اللہ عنہ کا سقایہ کے بارے میں سیدنا عباس رضی اللہ عنہ کے ساتھ جھگڑا ہو گیا تو سیدنا طلحہ بن عبیداللہ ، سیدنا عامر بن مخرمہ بن نوفل اور سیدنا ازہر بن عبدعوف رضی اللہ عنہ نے اس بات کی گواہی دی کہ نبی اکرم صلی اللہ علیہ وسلم نے مکہ کے دن یہ منصب سیدنا عباس رضی اللہ عنہ کے حوالے کیا تھا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی واقدی ہے ، جس کے بارے میں بہت زیادہ کلام کیا گیا ہے ویسے اس کی توثیق کی گئی ہے ۔

عبداللہ بن زریر بیان کرتے ہیں : سیدنا علی رضی اللہ عنہ نے سیدنا عباس رضی اللہ عنہ سے کہا: آپ نبی اکرم صلی اللہ علیہ وسلم سے یہ کہیں کہ وہ آپ کو خزانہ عطا کر دیں سیدنا عباس رضی اللہ عنہ نے نبی اکرم صلی اللہ علیہ وسلم سے یہ درخواست کی ، تو نبی اکرم صلی اللہ علیہ وسلم نے فرمایا : کہ میں آپ کو وہ چیز دوں گا جو آپ لوگوں کے حق میں اس سے زیادہ بہتر ہو گی ، نہ وہ آپ میں کوئی کمی کرے گی اور نہ آپ اس کو کم سمجھیں گے ، پھر نبی اکرم صلی اللہ علیہ وسلم نے انہیں ” سقایہ “ کا منصب دے دیا ۔
یہ روایت امام ابویعلیٰ نے نقل کی ہے
یہ روایت ” مرسل “ ہے عبداللہ بن زریر نامی راوی نے اس واقعہ کا زمانہ نہیں پایا ہے ۔

یہ روایت امام بزار نے عبداللہ بن ابورزین کے حوالے سے ان کے والد کے حوالے سے سیدنا علی رضی اللہ عنہ سے نقل کی ہے وہ بیان کرتے ہیں : میں نے سیدنا عباس رضی اللہ عنہ سے کہا: آپ اللہ کے رسول سے درخواست کریں کہ ہمیں حجابہ عطا کر دیں سیدنا عباس رضی اللہ عنہ نے آپ سے یہ درخواست کی ، تو نبی اکرم صلی اللہ علیہ وسلم نے ارشاد فرمایا : میں تمہیں سقایہ کا منصب دوں گا ، ( نہ ) وہ تم میں کوئی کمی کرے گی اور نہ تم اس کو کم سمجھو گے ۔ سیدنا علی رضی اللہ عنہ کہتے ہیں : میں نے سیدنا عباس رضی اللہ عنہ سے کہا: آپ نبی اکرم صلی اللہ علیہ وسلم سے یہ درخواست کریں کہ وہ آپ کو صدقات وصول کرنے کا عامل مقرر کریں تو نبی اکرم صلی اللہ علیہ وسلم نے ارشاد فرمایا : میں لوگوں کے گناہوں کے دھون کے لئے آپ کو عامل مقرر نہیں کروں گا ۔ اس روایت کے رجال ثقہ ہیں ۔