مجمع الزوائد ومنبع الفوائد

سیدنا ابوذر غفاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” زمزم کھانے کی جگہ ہے اور بیمار کے لئے شفاء ہے “ ۔
( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا یہ حصہ منقول ہے ” کھانے کی جگہ ( کفایت کرنے والی چیز ) ہے ۔
یہ روایت امام بزار نے اور امام طبرانی نے معجم صغیر میں نقل کی ہے امام بزار کے رجال صحیح کے رجال ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” روئے زمین پر موجود سب سے بہتر پانی آب زمزم ہے ، جس میں کھانے کی جگہ کفایت کرنے کی صلاحیت ہے اور بیمار کے لئے شفاء ہے اور روئے زمین پر سب سے برا پانی اس وادی کا پانی ہے ، جس کا نام برہوت ہے ، جو حضرموت میں ہے وہ کیڑوں میں سے ٹڈی کے پاؤں کی طرح کی جگہ ہے صبح کے وقت وہاں پانی ہوتا ہے اور شام کے وقت ذرا سی تری بھی نہیں ہوتی ہے “ ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ابن حبان نے اسے صحیح قرار دیا ہے ۔

ابوطفیل نے سیدنا عبداللہ بن عباس رضی اللہ عنہما کے بارے میں یہ بات نقل کی ہے میں نے انہیں یہ فرماتے ہوئے سنا ہے : ہم اسے یعنی آب زمزم کو شباعہ ( سیر کر دینے والی چیز ) کا نام دیتے تھے اور ہم اسے پاتے تھے کہ وہ عیال کے لئے بہترین مدد ہے ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مسافر شخص سب سے پہلے پینے والا ہو گا “ ۔ رادی کہتے ہیں : یعنی آب زمزم کو ۔
یہ روایت امام طبرانی نے معجم صغیر میں نقل کی ہے اور اس کے رجال ثقہ ہیں ۔

سائب کے بارے میں یہ بات منقول ہے وہ یہ فرماتے تھے کہ سیدنا عباس رضی اللہ عنہ کے سقایہ سے پیؤ کیونکہ یہ سنت ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ایسا ہے ، جس کا نام بیان نہیں کیا گیا ہے اس کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے سہیل بن عمرو سے آب زمزم طلب کیا تھا ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عبداللہ بن مومل مخزومی ہے ، جسے ابن سعد اور ابن حبان نے ثقہ قرار دیا ۔ قرار دیا ہے وہ فرماتے ہیں : یہ غلطی کر جاتا ہے ایک جماعت نے اسے ضعیف قرار دیا ہے ۔

سیدنا ابوطفیل رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ آب زمزم کے پاس تشریف لائے ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عبداللہ بن مومل مخزومی ہے ، جسے ابن سعد اور ابن حبان نے ثقہ قرار دیا ہے وہ فرماتے ہیں : یہ غلطی کر جاتا ہے اور ایک جماعت نے اسے ضعیف قرار دیا ہے ۔

حبیب بن ابوثابت بیان کرتے ہیں : میں نے عطاء سے دریافت کیا : کیا میں آب زمزم اٹھا کے ساتھ لے جاؤں ؟ انہوں نے جواب دیا اللہ کے رسول بھی اسے اٹھا کے ساتھ لے کر گئے تھے سیدنا امام حسن رضی اللہ عنہ بھی اسے اٹھا کے ساتھ لے کر گئے تھے سیدنا امام حسین رضی اللہ عنہ بھی اٹھا کے اسے ساتھ لے کر گئے تھے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی ایسا ہے ، جس سے میں واقف نہیں ہوں ۔

سیدنا ابوطفیل رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ آب زمزم کے پاس تشریف لائے آپ نے ارشاد فرمایا : تم لوگ پانی نکالو اور پلاؤ اگر مجھے یہ اندیشہ نہ ہوتا کہ اس کے حوالے سے تم مغلوب ہو جاؤ گے ( یعنی ہجوم زیادہ ہو جائے گا ) تو میں بھی نکالتا ۔
یہ روایت امام بزار نے نقل کی ہے اس کی سند میں ایک راوی محمد بن مہزم شعاب بصری ہے ، جس کے حوالے سے ابوداؤد طیالسی اور عبدالصمد بن عبدالوارث اور دیگر حضرات نے روایات نقل کی ہیں اسے زمام بھی کہا: گیا ہے ابن ماکولا نے اس کا ذکر لفظ مہزم کی شکل میں کیا ہے ، جس میں ” م “ پزیر ہے ” ز “ پر زبر ہے اور اس پر تخفیف ہے یحیی بن معین اور امام ابوحاتم نے اسے ثقہ قرار دیا ہے ۔

سیدنا عثمان غنی رضی اللہ عنہ بیان کرتے ہیں : نبی اکرم صلی اللہ علیہ وسلم زمزم کے پاس تشریف لائے آپ نے فرمایا : تم پانی نکالو اگر اس بات کا اندیشہ نہ ہوتا کہ تم اس کے حوالے سے مغلوب ہو جاؤ گے ( یعنی ہجوم زیادہ ہو جائے گا ) تو میں بھی پانی نکالتا ۔
یہ روایت امام بزار نے نقل کی ہے اس کی سند میں ایک راوی سعید بن عبدالملک بن واقد ہے ابوحاتم کہتے ہیں : محدثین نے اس کے بارے میں کلام کیا ہے وہ فرماتے ہیں : میں نے دیکھا ہے کہ اس نے جو احادیث روایت کی ہیں ان میں منکر روایات ہیں ۔

سیدنا عبداللہ بن عباس رضی اللہ عنہما بیان کرتے ہیں : جناب ابوطالب زمزم ( کے کنویں کو ) ٹھیک کر رہے تھے اور نبی اکرم صلی اللہ علیہ وسلم پتھر منتقل کر رہے تھے آپ ان دنوں نوجوان تھے ۔
یہ روایت امام بزار نے نقل کی ہے اس کی سند میں ایک راوی نضر ابوعمر ہے اور وہ متروک ہے ۔