مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے بیت اللہ کی طرف بکریاں ہدی کے طور پر بھیجی تھیں ۔
یہ روایت امام أحمد نے اور امام بزار نے نقل کی ہے ۔ امام أحمد کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے ایک سو اونٹ ہدی کے طور پر بھیجے تھے جن پر کپڑا ڈالا گیا تھا اور جن کے گلے میں ہار ڈالے گئے تھے ۔
یہ روایت امام بزار نے نقل کی ہے ۔ اس کی سند میں ایک راوی حجاج بن ارطاۃ ہے وہ ثقہ ہے ، لیکن تدلیس کرنے والا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے اپنے حج کے موقع پر ایک سو اونٹوں کی قربانی کی تھی آپ نے ان میں سے تینتیس اونٹوں کو اپنے دست مبارک کے ذریعے قربان کیا تھا پھر آپ نے سیدنا علی رضی اللہ عنہ کو یہ حکم دیا تھا ، تو انہوں نے باقی رہ جانے والے اونٹوں کو قربان کیا تھا نبی اکرم صلی اللہ علیہ وسلم نے ارشاد فرمایا : تم ان کے گوشت اور ان پر موجود کپڑے اور ان کی کھالوں کو لوگوں کے درمیان تقسیم کر دو اور گوشت بنانے والے کو اس میں کچھ بھی ( معاوضے کے طور پر ) نہ دینا اور ہر اونٹ میں سے تھوڑا سا گوشت ہمارے لئے لے لینا پھر اس سارے گوشت کو ایک ہی ہنڈیا میں پکانا تاکہ ہم اس کا گوشت کھائیں اور اس کا شوربا پیئیں ، تو انہوں نے ایسا ہی کیا تھا ۔
یہ روایت امام أحمد نے نقل کی ہے ، اور اس کی سند میں ایک راوی ایسا ہے جس کا نام بیان نہیں کیا گیا ہے ۔

سیدنا عبداللہ بن عمر رضی اللہ عنہما بیان کرتے ہیں : ہم لوگ نبی اکرم صلی اللہ علیہ وسلم کے زمانہ اقدس میں ہوتے تھے تو ہمارے درمیان ہدی اونٹ اور گائے ہوتے تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی جابر جعفی ہے ، جس کے بارے میں بہت زیادہ کلام کیا گیا ہے ثوری اور شعبہ نے اسے ” ثقہ “ قرار دیا ہے ۔