مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اس میں کوئی حرج نہیں ہے کہ کوئی شخص ایسے کپڑے میں احرام باندھ لے ، جسے زعفران کے ذریعے رنگا گیا ہو ، لیکن اسے دھو لیا گیا ہو ، اور اس میں سے نشان جسم کی طرف سرایت نہ کرے ، یا خوشبو کا نشان موجود نہ ہو “ ۔
یہ روایت امام ابویعلیٰ اور امام بزار نے نقل کی ہے ۔ اس کی سند میں ایک راوی حسین بن عبداللہ بن عبیداللہ ہے ، اور وہ ضعیف ہے ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص تہبند کو نہیں پاتا اور اس نے احرام باندھا ہوا ہو وہ شلوار کو پا لیتا ہے ، تو وہ اس کو پہن لے اور جو شخص جوتے نہیں پاتا وہ موزے پہن لے ، لیکن وہ ٹخنوں کے نیچے سے انہیں کاٹ لے “ ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا عبداللہ بن عامر بن ربیعہ رضی اللہ عنہ بیان کرتے ہیں : سیدنا عمر بن خطاب رضی اللہ عنہ نے نصف رات کے وقت ابن مغترف ( راوی کو شک ہے ، یا شاید یہ الفاظ ہیں : ) ابن غرف نے یہ آواز سنی جو حدی پڑھ رہا تھا ہم اس وقت مکہ میں جا رہے تھے سیدنا عمر رضی اللہ عنہ نے اپنی سواری کو بٹھایا اور لوگوں کے ساتھ آ کے شامل ہوئے وہ سیدنا عبدالرحمن بن عوف رضی اللہ عنہ کے ساتھ تھے ، جب صبح صادق ہو گئی تو سیدنا عمر رضی اللہ عنہ نے کہا: اب تو تم ( حدی پڑھنے سے ) خاموش ہو جاؤ صبح صادق ہو گئی ہے تم لوگ اللہ کا ذکر کرو راوی بیان کرتے ہیں : پھر سیدنا عمر رضی اللہ عنہ نے سیدنا عبدالرحمن رضی اللہ عنہ کو موزے پہنے ہوئے دیکھا تو دریافت کیا : کیا آپ نے موزے پہنے ہوئے ہیں ؟ سیدنا عبدالرحمن بن عوف رضی اللہ عنہ نے جواب دیا : میں نے ان دونوں کو اس ہستی کے ساتھ پہنا تھا جو آپ سے زیادہ بہتر ہیں ( راوی کو شک ہے شاید یہ الفاظ ہیں : ) نبی اکرم صلی اللہ علیہ وسلم کے ساتھ پہنا تھا ، تو سیدنا عمر رضی اللہ عنہ نے فرمایا : میں آپ کو تاکید کرتا ہوں کہ آپ انہیں اتار دیں کیونکہ مجھے یہ اندیشہ ہے کہ لوگ آپ کی طرف دیکھیں گے اور پھر آپ کی پیروی کریں گے ۔

ایک روایت میں یہ الفاظ ہیں : ” میں نے ان دونوں کو نبی اکرم صلی اللہ علیہ وسلم کے ساتھ پہنا تھا “ یعنی یہ الفاظ کسی شک کے بغیر ہیں ۔
یہ روایت امام أحمد نے نقل کی ہے ۔ اس کی سند میں ایک راوی عاصم بن عبیداللہ ہے ، اور وہ ضعیف ہے ۔