مجمع الزوائد ومنبع الفوائد

سیدنا بلال رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” پچھنے لگانے والے اور لگوانے والے کا روزہ ٹوٹ گیا“ ۔
یہ روایت امام أحمد امام بزار نے اور امام طبرانی نے معجم کبیر میں نقل کی ہے ۔ شہر نامی راوی نے سیدنا بلال رضی اللہ عنہ سے ملاقات نہیں کی ہے ۔

سیدنا اسامہ بن زید رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پچھنے لگانے والے اور لگوانے والے کا روزہ ٹوٹ گیا “ ۔
یہ روایت امام أحمد نے اور امام بزار نے نقل کی ہے ، اور حسن نامی راوی تدلیس کرنے والا ہے ایک قول کے مطابق اس نے سیدنا اسامہ رضی اللہ عنہ سے سماع نہیں کیا ہے ۔

سیدنا معقل بن سنان اشجعی رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم میرے پاس سے گزرے میں اس وقت پچھنے لگوا رہا تھا یہ رمضان کے مہینے کی اٹھارہ تاریخ کی بات ہے نبی اکرم صلی اللہ علیہ وسلم نے ارشاد فرمایا : پچھنے لگانے والے اور لگوانے والے کا روزہ ٹوٹ گیا ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی عطاء بن سائب ہے ، جو اختلاط کیا شکار ہو گیا تھا ۔

سیدنا معقل بن یسار رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم میرے پاس سے گزرے میں اس وقت پچھنے لگوا رہا تھا یہ رمضان کے مہینے کی اٹھارہ تاریخ کی بات ہے نبی اکرم صلی اللہ علیہ وسلم نے ارشاد فرمایا : پچھنے لگانے والے اور لگوانے والے کا روزہ ٹوٹ گیا ۔
یہ روایت امام بزار نے اور امام طبرانی نے معجم کبیر میں نقل کی ہے ۔ اس کی سند میں ایک راوی عطاء بن سائب ہے ، جو اختلاط کا شکار ہو گیا تھا ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کے حوالے سے اور سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کے حوالے سے یہ بات نقل کرتی ہیں : آپ نے ارشاد فرمایا : ” پچھنے لگانے والے اور لگوانے والے کا روزہ ٹوٹ گیا “ ۔
یہ روایت امام ابویعلیٰ امام بزار نے صرف سیدہ عائشہ رضی اللہ عنہا کے حوالے سے نقل کی ہے ۔ امام طبرانی نے اسے معجم کبیر میں اور معجم اوسط میں نقل کیا ہے ۔

سیدنا علی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پچھنے لگانے والے اور لگوانے والے کا روزہ ٹوٹ گیا “ ۔
یہ روایت امام بزار نے اور امام طبرانی نے معجم اوسط میں نقل کی ہے ۔ اس کی سند میں ایک راوی حسن ہے ، اور وہ تدلیس کرنے والا ہے ، لیکن وہ ثقہ ہے ۔ سیدہ عائشہ رضی اللہ عنہا سے منقول حدیث میں ایک راوی مثنی بن صباح ہے ، جس کے بارے میں کلام کیا گیا ہے اس کی توثیق بھی کی گئی ہے ۔

سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پچھنے لگانے والے اور لگوانے والے کا روزہ ٹوٹ گیا “ ۔
یہ روایت امام بزار نے اور امام طبرانی نے معجم اوسط میں نقل کی ہے ۔ وہ فرماتے ہیں : سلام ابومنذر نامی راوی مطر کے حوالے سے اسے نقل کرنے میں منفرد ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” پچھنے لگانے والے اور لگوانے والے کا روزہ ٹوٹ گیا“ ۔
یہ روایت امام بزار نے اور امام طبرانی نے معجم کبیر میں نقل کی ہے ۔ امام بزار کے رجال کی توثیق کی گئی ہے صرف فطر بن خلیفہ کا معاملہ مختلف ہے اس کے بارے میں کلام کیا گیا ہے ویسے وہ ثقہ ہے ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پچھنے لگانے والے اور لگوانے والے کا روزہ ٹوٹ گیا “ ۔
یہ روایت امام بزار نے اور امام طبرانی نے معجم کبیر میں نقل کی ہے ۔ اس کی سند میں ایک راوی یعلی بن عباد ہے ، اور وہ ضعیف ہے ۔

سیدنا ابورافع رضی اللہ عنہ کے بارے میں یہ بات منقول ہے ، وہ سیدنا ابوموسیٰ کے پاس آئے جو رات کے وقت پچھنے لگوا رہے تھے تو سیدنا ابورافع رضی اللہ عنہ نے کہا: اگر دن کے وقت لگوا لیتے تو مناسب تھا سیدنا ابوموسی رضی اللہ عنہ نے کہا: تم مجھے یہ کہہ رہے ہو کہ میں دن کے وقت خون بہاؤں جبکہ میں نے روزہ رکھا ہوا ہو جبکہ نبی اکرم صلی اللہ علیہ وسلم نے یہ بات ارشاد فرمائی ہے : ” پچھنے لگانے والے اور لگوانے والے کا روزہ ٹوٹ گیا “ ۔
یہ روایت امام بزار نے اور امام طبرانی نے معجم کبیر میں نقل کی ہے ۔ اس کے رجال ” صحیح “ کے رجال ہیں صرف امام بزار کے استاد کا معاملہ مختلف ہے وہ ثقہ ہے اس کے بارے میں کسی نے کلام نہیں کیا ہے ، ( لیکن وہ صیح کے رجال میں سے نہیں ہے ) ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” پچھنے لگانے والے اور لگوانے والے کا روزہ ٹوٹ گیا“ ۔
یہ روایت امام بزار نے نقل کی ہے ۔ اس کی سند میں ایک راوی مالک بن سلیمان ہے محدثین نے اس حدیث کے حوالے سے اسے ” ضعیف“ قرار دیا ہے ۔

سیدنا عبداللہ بن عمر رضی اللہ عنہما روایت کرتے ہیں نبی اکرم صلی اللہ علیہ وسلم نے ارشاد فرمایا : ” پچھنے لگانے والے اور لگوانے والے کا روزہ ٹوٹ گیا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حسن بن ابوجعفر جعفری ہے اس کے بارے میں کلام کیا گیا ہے ، ویسے اس کی توثیق کی گئی ہے ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ابوطیبہ کو یہ حکم دیا کہ وہ سورج غروب ہونے کے وقت پچھنے لگانے کے آلات رکھ دے پھر آپ نے اسے حکم دیا کہ وہ افطار کرنے والے کے ساتھ افطاری کر لے پھر اس نے پچھنے لگوائے پھر آپ نے اس سے دریافت کیا : تمہار اخراج کتنا ہے ؟ اس نے جواب دیا : دو صاع نبی اکرم صلی اللہ علیہ وسلم نے ایک صاع معاف کر دیا ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا ابوسعید خدری رضی اللہ عنہ بیان کرتے ہیں : روزے دار کے پچھنے لگوانے کو اس لئے مکروہ قرار دیا گیا ہے کیونکہ اس سے کمزوری آتی ہے ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے روزے کی حالت میں احرام باندھے ہوئے پچھنے لگوائے تھے ۔ آپ پر بے ہوشی طاری ہو گئی تو اس لئے روزے دار شخص کے لئے پچھنے لگوانے کو مکروہ قرار دیا گیا ہے ۔ ( علامہ ہیثمی فرماتے ہیں : ) میں یہ کہتا ہوں ان کے حوالے سے ” صحیح “ میں ایک حدیث منقول ہے نبی اکرم صلی اللہ علیہ وسلم نے پچھنے لگوائے تھے ۔ آپ اس وقت روزہ دار تھے ، اور احرام باندھے ہوئے تھے اس روایت میں انہوں نے اس کے مکروہ ہونے کو ذکر نہیں کیا ہے ۔
یہ روایت امام أحمد امام ابویعلیٰ امام بزار اور امام طبرانی نے معجم کبیر میں نقل کی ہے ۔ اس کی سند میں ایک راوی نصر بن باب ہے ، جس کے بارے میں بہت زیادہ کلام کیا گیا ہے ۔ امام أحمد نے اسے ” ثقہ “ قرار دیا ہے ۔