مجمع الزوائد ومنبع الفوائد

سیدنا عبداللہ بن یزید خطمی رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ہر نیکی صدقہ ہے “ ۔
یہ روایت امام أحمد نے نقل کی ہے ، اور امام طبرانی نے معجم کبیر میں نقل کی ہے ۔ امام أحمد کے رجال ثقہ ہیں ۔

سیدنا جابر بن عبداللہ رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر نیکی صدقہ ہے ، اور نیکی میں یہ بات بھی شامل ہے کہ تم خندہ پیشانی کے ساتھ اپنے بھائی سے ملو اور اپنے ڈول میں سے اس کے برتن میں پانی ڈال دو “ ۔ امام أحمد کی نقل کردہ حدیث یہاں ختم ہو جاتی ہے ۔

امام ابویعلیٰ نے سیدنا جابر رضی اللہ عنہ کے حوالے سے
یہ روایت نقل کی ہے : وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ہر نیکی جو تم کسی خوشحال یا غریب شخص کے ساتھ کرتے ہو ، تو وہ قیامت کے دن تمہارے لئے صدقہ شمار ہو گی “ ۔

امام ابویعلیٰ نے سیدنا جابر رضی اللہ عنہ کے حوالے سے ایک اور روایت نقل کی ہے : نبی اکرم صلی اللہ علیہ وسلم نے ارشاد فرمایا : ” ہر نیکی صدقہ ہے آدمی اپنے اہل خانہ پر اور اپنے مال ( یعنی غلاموں وغیرہ ) پر جو خرچ کرتا ہے وہ اس کے لئے صدقہ کے طور پر نوٹ کیا جاتا ہے آدمی جس کے ذریعے اپنی عزت کو بچاتا ہے وہ اس کے لئے صدقہ کے طور پر نوٹ کیا جاتا ہے “ ۔ نبی اکرم صلی اللہ علیہ وسلم نے ارشا فرمایا ہے : ” مومن کا ہر وہ خرچ جو معصیت میں نہ ہو ، تو اللہ تعالیٰ کے ذمہ یہ بات لازم ہے کہ اس کی جگہ اسے مزید عطا کرے البتہ اس خرچ کا معاملہ مختلف ہے ، جو تعمیر میں استعمال ہوتا ہے “ ۔ مسور بیان کرتے ہیں : محمد بن منکدر نے کہا: ہم نے سیدنا جابر بن عبداللہ رضی اللہ عنہما سے دریافت کیا : نبی اکرم صلی اللہ علیہ وسلم کے اس فرمان سے کیا مراد ہے ؟ ” جس کے ذریعے آدمی اپنی عزت کو محفوظ رکھتا ہے “ ۔ انہوں نے جواب دیا : یہ کہ آدمی کسی شاعر یا زبان دراز شخص کو کچھ دے دے سیدنا جابر رضی اللہ عنہ یہ فرماتے ہیں گویا نبی اکرم صلی اللہ علیہ وسلم یہ کہنا چاہ رہے تھے کہ آدمی اس کی بدزبانی سے بچ کے رہے ۔
( علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت کا ایک حصہ منقول ہے ۔ یہ طویل روایت امام ابویعلیٰ نے نقل کی ہے ۔ امام أحمد نے اسے اختصار کے ساتھ نقل کیا ہے جیسا کہ پہلے گزر چکی ہے ۔ امام أحمد کی سند میں ایک راوی منکدر بن محمد بن منکدر ہے ، جسے امام أحمد اور دیگر حضرات نے ” ثقہ “ قرار دیا ہے ۔ امام نسائی رحمہ اللہ اور دیگر حضرات نے اسے ” ضعیف“ قرار دیا ہے ۔ امام ابویعلیٰ کی سند میں ایک راوی مسور بن صلت ہے ، اور وہ ضعیف ہے ۔

سیدنا نبیط بن شریط رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” ہر نیکی صدقہ ہے “ ۔
یہ روایت امام طبرانی نے معجم صغیر میں نقل کی ہے ، اور اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہر نیکی صدقہ ہے خواہ وہ خوشحال شخص کے ساتھ کی جائے یا غریب شخص کے ساتھ کی جائے “ ۔
یہ روایت امام طبرانی نے معجم کبیر میں نقل کی ہے ، اور امام بزار نے نقل کی ہے ۔ اس کی سند میں ایک راوی صدقہ بن موسیٰ دقیقی ہے ، اور وہ ضعیف ہے ۔

سیدنا ابومسعود انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر نیکی صدقہ ہے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

عدی بن ثابت نے اپنے والد کے حوالے سے اپنے دادا کا یہ بیان نقل کیا ہے : نبی اکرم صلی اللہ علیہ وسلم نے ارشاد فرمایا : ” ہر نیکی صدقہ ہے “ ۔
یہ روایت امام طبرانی نے معجم کبیر میں نقل کی ہے ۔ ثابت نامی راوی کے حوالے سے اس کے بیٹے عدی کے علاوہ اور کسی نے روایت نقل نہیں کی ہے اس کے بقیہ رجال کی توثیق کی گئی ہے ۔

ابومالک اشجعی اپنے والد کے حوالے سے یہ بات نقل کرتے ہیں : نبی اکرم صلی اللہ علیہ وسلم نے ارشاد فرمایا : ” ہر نیکی صدقہ ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں راویوں کی ایک جماعت ایسی ہے ، جن سے میں واقف نہیں ہوں ۔