مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! کون سا عمل زیادہ فضیلت رکھتا ہے آپ نے ارشاد فرمایا : اللہ پر ایمان رکھنا اور اللہ کی راہ میں جہاد کرنا اس نے عرض کی : اگر میں اس کی استطاعت نہ رکھوں نبی اکرم صلی اللہ علیہ وسلم نے فرمایا : تم کام کرنے والے کی مدد کرو یا کسی اپاہج کے لئے کچھ کر کے دے دو اس نے عرض کی : اگر میں اس کی بھی استطاعت نہ رکھوں نبی اکرم صلی اللہ علیہ وسلم نے فرمایا : تم اپنے شر کو روک کے رکھو یہ صدقہ ہو گا ، جو تم اپنی ذات کی طرف سے کرو گے “ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : اللہ کے نبی نے ایک حدیث ارشاد فرمائی ہمیں اسلام کی معرفت نصیب ہونے کے بعد کسی بھی چیز کے حوالے سے اتنی خوشی نہیں ہوئی جتنی اس بات پر خوشی ہوئی آپ نے ارشاد فرمایا : ” مومن کو اس بات پر بھی اجر ملتا ہے کہ وہ راستے سے تکلیف دہ چیز کو ہٹا دے یا راستے کے بارے میں کسی کی رہنمائی کر دے یا کسی ایسے شخص کا مفہوم واضح کر دے جو صحیح طرح سے کلام نہ کر سکتا ہو ، یا دودھ عطیہ کر دے ، یہاں تک کہ اسے اس سامان کے بارے میں بھی اجر ملتا ہے ، جو اس نے اپنے کپڑے کے اندر جیب میں رکھا ہوتا ہے پھر جب وہ اس کو چھوتا ہے ، تو اس کے ہاتھ کو وہ نہیں ملتا ( یعنی گم ہو چکا ہوتا ہے ) “ ۔

یہ روایت امام ابویعلیٰ نے اور امام طبرانی نے معجم اوسط میں اور امام بزار نے نقل کی ہے ، اور انہوں نے یہ الفاظ زائد نقل کیے ہیں : ” آدمی کو اپنی بیوی کے ساتھ وظیفہ زوجیت ادا کرنے پر بھی اجر ملتا ہے یہاں تک کہ اسے اس سامان کا بھی اجر ملتا ہے ، جو اس کے کپڑے کے ایک کنارے پر موجود ہو وہ اس کو چھوئے اس کی جگہ پر گرہ لگا دے یا اس کی مانند کوئی اور بات کہی ہے ( اور پھر وہ سامان نہ ملے ) تو اس کے دل کو اس کے حوالے سے جو پریشانی لاحق ہوتی ہے پھر اللہ تعالیٰ وہ سامان واپس بھی کر دے تو اس کے لئے اس ( پریشانی ) کا اجر نوٹ کرتا ہے “ ۔
اس روایت کی سند میں ایک راوی منهال بن خلیفہ ہے اسے ابوحاتم نے امام ابوداؤد نے اور امام بزار نے ” ثقہ“ قرار دیا ہے ویسے اس کے بارے میں کلام کیا گیا ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارا اپنے بھائی کے ساتھ خندہ پیشانی سے ملنا تمہارے لئے صدقہ کے طور پر نوٹ کیا جاتا ہے تمہارا اپنے ڈول کے ذریعے اپنے بھائی کے ڈول میں پانی ڈال دینا تمہارے لئے صدقہ کے طور پر نوٹ کیا جاتا ہے تمہارا راستے سے تکلیف دہ چیز کو ہٹا دینا تمہارے لئے صدقہ کے طور پر نوٹ کیا جاتا ہے تمہارا نیکی کا حکم دینا صدقہ ہے تمہارا برائی سے منع کرنا صدقہ ہے تمہارا گمشدہ شخص کی رہنمائی کرنا تمہارے لئے صدقہ کے طور پر نوٹ کیا جاتا ہے “ ۔
یہ روایت امام بزار نے اور امام طبرانی نے معجم اوسط میں نقل کی ہے ۔ اس کی سند میں ایک راوی یحیی بن ابوعطاء ہے ، اور وہ مجہول ہے ۔

سیدنا ابوذر غفاری رضی اللہ عنہ بیان کرتے ہیں : میں نے عرض کی : یا رسول اللہ ! کون کون سی چیز بندے کو جہنم سے نجات دلوا سکتی ہے ؟ نبی اکرم صلی اللہ علیہ وسلم نے ارشاد فرمایا : اللہ پر ایمان رکھنا میں نے عرض کی : یا رسول اللہ ! ایمان کے ساتھ عمل بھی ہونا چاہیے نبی اکرم صلی اللہ علیہ وسلم نے ارشاد فرمایا : اللہ تعالیٰ نے جو رزق عطا کیا ہے اس میں سے آدمی کوئی چیز دے دے میں نے عرض کی : یا رسول اللہ ! اس بارے میں آپ کی کیا رائے ہے کہ اگر کوئی شخص فقیر ہو ، اور اس کے پاس دینے کے لئے گنجائش نہ ہو نبی اکرم صلی اللہ علیہ وسلم نے فرمایا : وہ نیکی کا حکم دے اور وہ برائی سے منع کرے راوی کہتے ہیں : میں نے عرض کی : یا رسول اللہ ! اس بارے میں آپ کی کیا رائے ہے کہ اگر وہ اس لائق نہ ہو کہ وہ نیکی کا حکم دے سکے یا برائی سے منع کر سکے نبی اکرم صلی اللہ علیہ وسلم نے فرمایا : وہ کسی اپاہج کے لئے کوئی کام کر دے میں نے عرض کی : اس بارے میں آپ کی کیا رائے ہے کہ اگر وہ خود اپاہج ہو ، اور وہ کوئی کام نہ کر سکتا ہو نبی اکرم صلی اللہ علیہ وسلم نے فرمایا : وہ مغلوب کی مدد کر دے میں نے عرض کی : اگر وہ خود کمزور ہو ، اور کسی مغلوب کی مدد نہ کر سکتا ہو نبی اکرم صلی اللہ علیہ وسلم نے ارشاد فرمایا : تم کیا چاہتے ہو کہ تم اپنے ساتھی میں کوئی بھلائی نہ رہنے دو ؟ وہ لوگوں کو تکلیف پہنچانے سے بچا رہے میں نے عرض کی : اگر وہ ایسا کرے گا ، تو وہ جنت میں داخل ہو گا نبی اکرم صلی اللہ علیہ وسلم نے ارشاد فرمایا : جو بھی مسلمان ان کاموں میں سے جو بھی کام کرے گا ، تو وہ کام اس شخص کا ہاتھ پکڑ کر اسے جنت میں داخل کروا دے گا ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں اس سے پہلے اس کے مختلف طرق گزر چکے ہیں ۔