مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں : انہوں نے عرض کی : یا رسول اللہ ! وہ کون سی چیز ایسی ہے ، جسے نہ دینا جائز نہیں ہے نبی اکرم صلی اللہ علیہ وسلم نے ارشاد فرمایا : پانی ، نمک اور آگ سیدہ عائشہ رضی اللہ عنہا نے عرض کی : پانی کی ، تو بات سمجھ آتی ہے نمک اور آگ کا کیا معاملہ ہے ؟ نبی اکرم صلی اللہ علیہ وسلم نے فرمایا : جو شخص نمک دیتا ہے گویا کہ وہ اس پوری چیز کو صدقہ کر دیتا ہے ، جس کو نمک کے ذریعے تیار کیا ( یعنی پکایا ) گیا ہو ، اور جو شخص آگ دیتا ہے گویا کہ وہ اس ساری چیز کو صدقہ کر دیتا ہے ، جس کو آگ نے پکایا ہو جو شخص کسی مسلمان کو پانی کا ایک گھونٹ پلاتا ہے ایک ایسی جگہ پر جہاں پانی دستیاب ہوتا ہو تو گویا وہ ایک غلام کو آزاد کرتا ہے ، اور جو شخص کسی مسلمان کو پانی کا ایک گھونٹ ایسی جگہ پر پلاتا ہے جہاں پانی دستیاب نہ ہو ، تو گویا اس نے اسے زندگی دی ۔
( علامہ ہیثمی فرماتے ہیں : ) میں یہ کہتا ہوں : یہ روایت امام بن ماجہ نے اختصار کے ساتھ نقل کی ہے ۔یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی زہیر بن مرزوق ہے ۔ امام بخاری رحمہ اللہ فرماتے ہیں یہ مجہول ہے ، اور منکرالحدیث ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کی ازواج مشکیزے میں پانی لایا کرتی تھیں اور نبی اکرم صلی اللہ علیہ وسلم کے اصحاب کو پانی پلایا کرتی تھیں ۔
یہ روایت امام ابویعلیٰ نے نقل کی ہے ، اور اس کے رجال ثقہ ہیں ۔