مجمع الزوائد ومنبع الفوائد

سیدنا جابر رضی اللہ عنہ بیان کرتے ہیں : انصار کا قبیلہ آیا ان لوگوں کو بنو سلمہ کہا: جاتا تھا یہ سیدنا معاذ رضی اللہ عنہ کے گروہ سے تعلق رکھتے تھے ۔ نبی اکرم صلی اللہ علیہ وسلم نے ارشاد فرمایا : اے بنوسلمہ تمہارا سردار کون ہے ۔ لوگوں نے جواب دیا : جد بن قیس اور ہم اسے بخیل سمجھتے ہیں تو نبی اکرم صلی اللہ علیہ وسلم نے فرمایا : بخل سے زیادہ بڑی بیماری اور کون سی ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابوربیع سمان ہے ، اور وہ ضعیف ہے ۔
( علامہ ہیثمی فرماتے ہیں : ) میں یہ کہتا ہوں ، اس نوعیت کی دیگر احادیث مناقب سے متعلق باب میں آگے آئیں گی ، اگر اللہ نے چاہا ۔

ابوصالح نے ایک صحابی کا یہ بیان نقل کیا ہے ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! میرے باغ میں فلاں شخص کا کھجور کا درخت ہے آپ اسے حکم دیں کہ وہ اسے فروخت کر دے یا وہ مجھے ہبہ کر دے وہ شخص آیا تو نبی اکرم صلی اللہ علیہ وسلم نے اسے فرمایا تم ایسا کرو اس کے بدلے میں تمہیں کھجور کا درخت مل جائے گا اس نے یہ بات نہیں مانی تو نبی اکرم صلی اللہ علیہ وسلم نے فرمایا : یہ سب سے بڑا بخیل ہے ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا جابر رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : میرے باغ میں فلاں شخص کا ایک گچھہ ہے وہ شخص مجھے تکلیف دیتا ہے ، اور اس کا کھجوروں کا گچھہ موجود ہونا مجھے گراں گزرتا ہے نبی اکرم صلی اللہ علیہ وسلم نے اس شخص کو پیغام بھیج کر بلوایا اور فرمایا : تم اپنا گچھہ جو فلاں شخص کے باغ میں موجود ہے وہ مجھے فروخت کر دو اس نے کہا: جی نہیں نبی اکرم صلی اللہ علیہ وسلم نے فرمایا : وہ تم مجھے ہبہ کر دو اس نے کہا: جی نہیں نبی اکرم صلی اللہ علیہ وسلم نے فرمایا : جنت میں کھجوروں کے گچھے کے عوض میں تم مجھے وہ فروخت کر دو اس نے عرض کی : جی نہیں ، یا رسول اللہ ! نبی اکرم صلی اللہ علیہ وسلم نے فرمایا : میں نے تم سے زیادہ بخیل شخص کوئی نہیں دیکھا البتہ اس شخص کا معاملہ مختلف ہے ، جو سلام کرنے میں بخل سے کام لیتا ہے ۔
یہ روایت امام أحمد اور امام بزار نے نقل کی ہے ۔ اس کی سند میں ایک راوی عبداللہ بن محمد بن عقیل ہے اس کے بارے میں کلام کیا گیا ہے ، اور اس کی توثیق کی گئی ہے ۔

سیدنا ابوالقین رضی اللہ عنہ کے بارے میں منقول ہے : وہ نبی اکرم صلی اللہ علیہ وسلم کے پاس سے گزرے ان کے پاس کچھ کھجوریں تھیں نبی اکرم صلی اللہ علیہ وسلم ان کی طرف بڑھے تاکہ مٹھی بھر کھجوریں ان سے لیں اور اپنے اصحاب کے سامنے پھیلا دیں ، تو انہوں نے اپنی چادر کا کنارہ اپنے پیٹ اور سینے کے ساتھ ملا لیا نبی اکرم صلی اللہ علیہ وسلم نے ارشاد فرمایا : اللہ تعالی تمہارے بخل میں اضافہ کرے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سعید بن جمہان ہے ، جسے ایک جماعت نے ” ثقہ “ قرار دیا ہے اس کے بارے میں اختلاف کیا گیا ہے اس کے بقیہ رجال ثقہ ہیں ۔ ( علامہ ہیثمی فرماتے ہیں : ) میں یہ کہتا ہوں ، اس باب کی احادیث کے بقیہ طرق زہد سے متعلق باب میں آئیں گے ۔