مجمع الزوائد ومنبع الفوائد

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” ہر بندے کے تین دوست ہوتے ہیں ایک دوست یہ کہتا ہے ، جو تم نے خرچ کیا وہ تمہارا ہوا جو تم نے روک لیا وہ تمہارا نہ ہوا یہ آدمی کا مال ہے ۔ ۔ ۔ ۔ ۔ ۔ ۔ ۔ ۔ ۔ “ ۔ ( علامہ ہیثمی فرماتے ہیں : ) میں یہ کہتا ہوں ، اس کے بعد راوی نے پوری حدیث ذکر کی ہے ، جو مکمل روایت کے طور پر زہد سے متعلق باب میں آئے گی ، اگر اللہ نے چاہا ۔
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ان میں سے بعض کے بارے میں کلام کیا گیا ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ تعالیٰ اپنے بندوں میں سے دو بندوں کو زندہ کرے گا جنہیں اس نے بکثرت مال اور اولاد عطا کی ہو گی ان میں سے ایک سے دریافت کرے گا : اے فلاں بن فلاں وہ عرض کرے گا : اے میرے پروردگار ! میں حاضر ہوں سعادت مندی تیری طرف سے حاصل ہو سکتی ہے پروردگار فرمائے گا کیا میں نے تمہیں بکثرت مال اور اولاد عطا نہیں کیے تھے وہ عرض کرے گا جی ہاں اے میرے پروردگار ! پروردگار فرمائے گا میں نے جو تمہیں عطا کیا تھا تم نے اس کے بارے میں کیا طرز عمل اختیار کیا وہ جواب دے گا میں نے اسے اپنی اولاد کے لئے چھوڑ دیا اس اندیشے کے تحت کہ کہیں ان کو غربت لاحق نہ ہو جائے تو پروردگار فرمائے گا اگر تم علم رکھتے ہوتے تو تم تھوڑا ہنستے اور زیادہ روتے ان کے بارے میں تمہیں جس کا اندیشہ تھا وہ میں نے ان پر نازل کر دی ہے پھر پروردگار دوسرے شخص سے فرمائے گا : اے فلاں بن فلاں وہ عرض کرے گا میں حاضر ہوں اے میرے پروردگار ! اور سعادت مندی تیری طرف سے حاصل ہو سکتی ہے پروردگار اس سے دریافت کرے گا کیا میں نے تمہیں بکثرت مال اور اولاد عطا نہیں کیے تھے وہ عرض کرے گا جی ہاں اے میرے پروردگار ! پروردگار فرمائے گا میں نے جو تمہیں دیا تھا اس کے بارے میں تم نے کیا طرز عمل اختیار کیا وہ عرض کرے گا میں نے اسے تیری فرمانبرداری کے کام میں خرچ کیا ، اور اپنے بعد اپنی اولاد کے لئے میں نے تیرے کرم پر بھروسہ کیا ، تو پروردگار فرمائے گا اگر تم علم رکھتے ہوتے تو تم زیادہ ہنستے اور تھوڑا روتے ( مطبوعہ متن میں یہ الفاظ اسی طرح ہیں لیکن شاید یہاں یہ عبارت ہونی چاہیے تھی : اگر تم علم رکھتے ہوتے ، تو تم تھوڑا ہنستے اور زیادہ روتے ) ، جس چیز کے بارے میں تم نے ان لوگوں کے حوالے سے توقع رکھی تھی ، وہ میں نے ان پر نازل کر دی ہے ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی یوسف بن سفر ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : ایک دن نبی اکرم صلی اللہ علیہ وسلم اپنے اصحاب کے پاس تشریف لائے آپ کے ہاتھ میں سونے کا ایک ٹکڑا تھا آپ نے سیدنا عبداللہ بن عمر رضی اللہ عنہما سے فرمایا محمد اپنے پروردگار کی بارگاہ میں کیا عرض کرے گا : اگر وہ ایسی حالت میں مر گیا کہ اس کے پاس یہ ہوا پھر نبی اکرم صلی اللہ علیہ وسلم نے وہاں سے اٹھنے سے پہلے اسے تقسیم کر دیا آپ نے ارشاد فرمایا : مجھے یہ بات پسند نہیں ہے کہ ” محمد ( صلی اللہ علیہ وسلم ) کے اصحاب “ کے پاس ( مطبوعہ متن میں اسی طرح مذکور ہے لیکن شاید یہاں لفظ ” اصحاب “ زائد ہے ، اصل عبارت یوں ہونی چاہیے : ” محمد ( صلی اللہ علیہ وسلم ) کے پاس “ ) اس پہاڑ جتنا سونا یا چاندی ہو ، آپ نے اُحد پہاڑ کی طرف اشارہ کر کے یہ بات ارشاد فرمائی : اور پھر وہ اسے اللہ کی راہ میں خرچ کر دے اور اس میں سے ایک دینار چھوڑ دے ( یعنی ایک دینار چھوڑنا بھی پسند نہیں ہے ) ۔ سیدنا عبداللہ بن عباس رضی اللہ عنہما فرماتے ہیں جب نبی اکرم صلی اللہ علیہ وسلم کا وصال ہوا تو آپ نے کوئی دینار کوئی درہم کوئی غلام یا کوئی کنیز ( ترکہ میں ) نہیں چھوڑا آپ نے اپنی زرہ ترکہ میں چھوڑی تھی وہ جو کے تیس صاع کے عوض میں ایک یہودی شخص کے پاس رہن رکھی ہوئی تھی آپ ان جو کو خود کھاتے تھے ، اور اپنے اہل خانہ کو کھلایا کرتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے اُحد پہاڑ کی طرف توجہ کی اور یہ ارشاد فرمایا : ” اس ذات کی قسم جس کے دست قدرت میں میری جان ہے مجھے یہ بات پسند نہیں ہے کہ اُحد پہاڑ آل محمد کے لئے سونے کا ہو جائے اور میں اسے اللہ کی راہ میں خرچ کروں اور پھر جس دن میں مروں تو میں نے اس میں سے دو دینار چھوڑے ہوئے ہوں البتہ ان دو دیناروں کا معاملہ مختلف ہے ، جنہیں میں نے اپنا ذمہ لازم کسی قرض کی ادائیگی کے لئے رکھا ہوا ہو “ ۔
یہ روایت امام طبرانی نے معجم کبیر میں نقل کی ہے ۔ اس کے رجال ثقہ ہیں اس روایت کو امام أحمد نے بھی نقل کیا ہے ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم ارشاد فرماتے تھے : میں اس بالا خانے میں داخل ہوتا ہوں اور میں اس میں صرف اندیشے کے تحت داخل ہوتا ہوں کہ کہیں اس میں کوئی ایسا مال موجود نہ ہو کہ جب میں مر جاؤں تو میں نے اسے کہیں خرچ نہ کیا ہوا ہو “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم ہم سے یہ فرماتے تھے : اللہ کی قسم ! مجھے یہ بات پسند نہیں ہے کہ میرے لئے اُحد پہاڑ سارے کا سارا سونے کا ہو جائے اور پھر میں اسے وراثت میں چھوڑ جاؤں ۔
یہ روایت امام طبرانی نے معجم کبیر میں نقل ہے ، اور اس کی سند میں ضعف پایا جاتا ہے ۔

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس سات دینار تھے جنہیں آپ نے سیدہ عائشہ رضی اللہ عنہ کے پاس رکھوایا ہوا تھا جب آپ بیمار ہو گئے تو آپ نے فرمایا : اے عائشہ ! وہ سونا علی کے پاس بھجوا دو پھر آپ پر بے ہوشی طاری ہو گئی ۔ سیدہ عائشہ رضی اللہ عنہا نبی اکرم صلی اللہ علیہ وسلم کی بیماری کی وجہ سے مشغول رہیں یہاں تک کہ نبی اکرم صلی اللہ علیہ وسلم نے چند مرتبہ یہ کہا: ہر مرتبہ نبی اکرم صلی اللہ علیہ وسلم پر بے ہوشی طاری ہو جاتی تھی اور سیدہ عائشہ رضی اللہ عنہا نبی اکرم صلی اللہ علیہ وسلم کے ساتھ مصروف رہتی تھیں آخر کار نبی اکرم صلی اللہ علیہ وسلم نے ان دیناروں کو سیدنا علی رضی اللہ عنہ کو بھجوا دیا سیدنا علی رضی اللہ عنہ نے انہیں صدقہ کر دیا تو پیر کی رات نبی اکرم صلی اللہ علیہ وسلم پر طبیعت کی زیادہ خرابی کا غلبہ ہوا سیدہ عائشہ رضی اللہ عنہا نے اپنا چراغ نبی اکرم صلی اللہ علیہ وسلم کی ایک زوجہ محترمہ کے ہاں بھجوایا اور یہ کہا: کہ آپ ہمارے چراغ میں اپنا کچھ تیل ڈال دیں کیونکہ نبی اکرم صلی اللہ علیہ وسلم کی طبیعت زیادہ خراب ہو گئی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔ ( ہیثمی فرماتے ہیں : ) میں یہ کہتا ہوں ، اس نوعیت سے متعلق دیگر احادیث زہد سے متعلق باب میں آگے آئیں گی ، اگر اللہ نے چاہا ۔

سعید بن عامر بن حذیم بیان کرتے ہیں : سیدنا عمر رضی اللہ عنہ کو یہ اطلاع ملی کہ وہ صاحب اپنے گھر میں ضرورت کی کوئی چیز ذخیرہ نہیں کرتے ہیں سیدنا عمر رضی اللہ عنہ نے ان صاحب کو دس ہزار ( درہم یا دینار ) بھجوائے انہوں نے وہ لے لیے اور انہیں مختلف تھیلوں میں ڈالنا شروع کیا ان کی اہلیہ نے ان سے دریافت کیا : آپ یہ کہاں لے کے جائیں گے انہوں نے جواب دیا : میں انہیں لے کر ان افراد کے پاس جاؤں گا ، جو ان کے بارے میں ہمارے لئے زیادہ فائدہ مند ثابت ہوں گے میں ان میں سے صرف تھوڑی سی چیز رہنے دوں گا جب وہ چیز ختم ہو گئی جو ان لوگوں کے پاس موجود تھی تو ان کی اہلیہ نے ان سے کہا: اب آپ اپنے کچھ دوستوں کے پاس جائیں جنہیں آپ نے وہ چیزیں دی تھیں جو آپ کو فائدہ دلایا کرتے تھے تو اس فائدے میں سے آپ حاصل کر لیں وہ اس خاتون کے ساتھ مسلسل بحث مباحثہ کرتے رہے یہاں تک کہ یہ بات طویل ہو گئی تو انہوں نے یہ بات ارشاد فرمائی میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اگر ایک حور اپنی ایک انگلی کو ظاہر کر دے تو اس کی خوشبو کو ہر ذی روح محسوس کرے گا ، تو کیا میں تمہارے لئے ان حوروں کو چھوڑ دوں ؟ اللہ کی قسم ! تم خواتین اس بات کی زیادہ حق دار ہو کہ میں اُن حوروں کی خاطر تمہیں چھوڑ دوں “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں جنت کی صفت سے متعلق باب میں اس کے مختلف طرق آئیں گے ۔

مالک دار بیان کرتے ہیں ؛ سیدنا عمر بن خطاب رضی اللہ عنہ نے چار سو دینار لئے انہیں ایک تھیلی میں ڈالا اور غلام سے کہا: تم انہیں لے کے ابوعبیدہ بن جراح کے پاس جاؤ اور پھر اس کے گھر میں کچھ دیر تک ٹھہرے رہنا اور اس بات کا جائزہ لینا کہ وہ اس کا کیا کرتا ہے وہ غلام یہ رقم لے کے سیدنا ابوعبیدہ رضی اللہ عنہ کے پاس گیا اور یہ کہا: امیر المؤمنین نے یہ کہا: ہے : انہیں اپنی ضروریات میں خرچ کریں تو سیدنا ابوعبیدہ رضی اللہ عنہ نے فرمایا : اللہ تعالیٰ انہیں ملا کے رکھے اور ان پر رحم کرے پھر انہوں نے فرمایا : اے لڑکی ادھر آؤ یہ سات دینار فلاں شخص کو دے آؤ یہ پانچ فلاں کو دے آؤ یہاں تک کہ انہوں نے وہ ساری رقم خرچ کر دی غلام سیدنا عمر رضی اللہ عنہ کے پاس واپس آیا انہیں اس صورت حال کے بارے میں بتایا جو اس نے پائی تھی پھر سیدنا عمر رضی اللہ عنہ نے اتنی ہی رقم سیدنا معاذ بن جبل رضی اللہ عنہ کے لئے تیار کروائی پھر فرمایا اسے لے کر سیدنا معاذ رضی اللہ عنہ کے پاس جاؤ اور اس کے پاس ٹھہرے رہنا اور اس بات کا جائزہ لینا کہ وہ کیا کرتا ہے وہ غلام اس رقم کو لے کے سیدنا معاذ بن جبل رضی اللہ عنہ کی طرف گیا اور یہ کہا: کہ سیدنا امیر المؤمنین نے یہ آپ کی طرف بھیجا ہے ، اور یہ کہا: ہے کہ اسے اپنی ضروریات میں استعمال کریں تو سیدنا معاذ رضی اللہ عنہ نے کہا: اللہ تعالی ان پر رحم کرے اور انہیں ملا کے رکھے اے لڑکی ادھر آؤ تم فلاں کے گھر میں اتی رقم فلاں کے پاس لے جاؤ اور فلاں کے گھر میں اتنی رقم لے جاؤ سیدنا معاذ رضی اللہ عنہ کی اہلیہ نے جھانک کر یہ کہا: اللہ کی قسم ہم بھی غریب ہیں آپ ہمیں بھی کچھ دے دیں اس وقت تھیلی میں صرف دو دینار باقی بچے تھے تو سیدنا معاذ رضی اللہ عنہ نے وہ دو دینار اس خاتون کو دے دیے وہ غلام سیدنا عمر رضی اللہ عنہ کے پاس واپس آیا اور انہیں اس بارے میں بتایا تو سیدنا عمر رضی اللہ عنہ اس بات پر خوش ہوئے اور فرمایا : یہ لوگ بھائی بھائی ہیں جو ایک دوسرے سے متعلق ہیں ۔
یہ روایت امام طبرانی نے معجم کبیر میں نقل کی ہے ۔ مالک دار نامی شخص سے میں واقف نہیں ہوں ، اس روایت کے بقیہ رجال ثقہ ہیں ۔

عمرو بن حیان طائی بیان کرتے ہیں : رافع بن عمیرہ سنیسی تین مساجد کے اہل افراد کو کھانا فراہم کرتے تھے ، اور انہیں قرطمہ یعنی حیس پلایا کرتے تھے حالانکہ ان کے اپنے پاس ایک قمیص ہوتی تھی وہی رات بسر کرنے کے لئے ہوتی ہے ، اور جمعہ کے لئے ہوتی تھی ۔
یہ روایت امام طبرانی نے معجم کبیر میں نقل کی ہے ۔ عمرو بن حیان نامی راوی سے میں واقف نہیں ہوں ۔