مجمع الزوائد ومنبع الفوائد

سیدنا عبدالرحمن بن ابوسبرہ رضی اللہ عنہ بیان کرتے ہیں : میں اور میرے والد نبی اکرم صلی اللہ علیہ وسلم کی خدمت میں حاضر ہوئے نبی اکرم صلی اللہ علیہ وسلم نے میرے والد سے دریافت کیا : یہ تمہارا بیٹا ہے ۔ انہوں نے عرض کی : جی ہاں ۔ نبی اکرم صلی اللہ علیہ وسلم نے دریافت کیا : اس کا نام کیا ہے ۔ انہوں نے عرض کی : حباب نبی اکرم صلی اللہ علیہ وسلم نے فرمایا : تم اس کا نام حباب نہ رکھو کیونکہ حباب شیطان ہوتا ہے پھر نبی اکرم صلی اللہ علیہ وسلم نے میرے والد سے دریافت کیا : تمہارا کتنا مال ہے ۔ انہوں نے عرض کی : میرے پاس مال کی مختلف قسمیں ہیں جنہیں میں صدقہ بھی کرتا ہوں غلام بھی آزاد کرتا ہوں سواری کے لئے بھی دے دیتا ہوں ، لیکن جب میں اس میں سے خرچ کرتا ہوں تو وہ چلا جاتا ہے پھر میں اس کو قید کر دیتا ہوں تو نبی اکرم صلی اللہ علیہ وسلم نے ارشاد فرمایا کیا تم یہ بات نہیں جانتے کہ ایک فرشتہ آسمان میں پکار کر کہتا ہے : ” اے اللہ ! خرچ کرنے والے کو اس کی جگہ عطا فرما جو شخص مال کو روک کے رکھتا ہے اس کے مال کو ضائع کر دے “ ۔ راوی کہتے ہیں : میں نے عرض کی : یا رسول اللہ ! مجھے وتر میں کیا پڑھنا چاہیے ؟ نبی اکرم صلی اللہ علیہ وسلم نے ارشاد فرمایا : سورت الاعلی سورت الکافرون اور سورت اخلاص ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سوید بن عبدالعزیز ہے ، اور وہ ضعیف ہے ۔

سیدہ عائشہ صدیقہ رضی اللہ عنہا کے بارے میں یہ منقول ہے کہ ایک مانگنے والے نے ان سے مانگا انہوں نے خادم کو حکم دیا اس خادم نے اسے کوئی چیز نکال کے دے دی تو نبی اکرم صلی اللہ علیہ وسلم نے سیدہ عائشہ رضی اللہ عنہا سے فرمایا : اے عائشہ ! تم شمار نہ کرو ! ورنہ اللہ تعالٰی بھی تمہیں شمار کر کے دے گا ۔
یہ روایت امام أحمد نے نقل کی ہے ، اور اس کے رجال ثقہ ہیں ۔