مجمع الزوائد ومنبع الفوائد

سیدنا عمرو بن امیہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” آدمی اپنی بیوی کو جو دیتا ہے وہ صدقہ ہوتا ہے “ ۔
یہ روایت امام أحمد نے نقل کی ہے ۔ اس کی سند میں ایک راوی محمد بن ابوحمید ہے ، اور وہ ضعیف ہے ۔

سیدنا عرباض بن ساریہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” آدمی جب اپنی بیوی کو پانی پلاتا ہے ، تو اسے اس کا اجر ملے گا“ ۔ راوی بیان کرتے ہیں : میں اپنی بیوی کے پاس آیا میں نے اسے پانی پلایا اور اسے وہ حدیث بیان کی جو میں نے نبی اکرم صلی اللہ علیہ وسلم کی زبانی سنی تھی ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی سفیان بن حسین ہے ، زہری سے اس کے روایت کرنے میں ضعف پایا جاتا ہے ، اور یہ روایت بھی ان میں سے ایک ہے ۔

سیدنا مقدام بن معدیکرب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو چیز تم خود کو کھلاتے ہو وہ تمہارے لئے صدقہ ہے ، جو تم اپنی اولاد کو کھلاتے ہو وہ تمہارے لئے صدقہ ہے ، جو تم اپنی بیوی کو کھلاتے ہو وہ تمہارے لئے صدقہ ہے ، اور جو تم اپنے خادم کو کھلاتے ہو وہ تمہارے لئے صدقہ ہے “ ۔
یہ روایت امام أحمد نے نقل کی ہے ، اور اس کے رجال ثقہ ہیں ۔ ( علامہ ہیثمی فرماتے ہیں : ) میں یہ کہتا ہوں ، اس نوعیت کی دیگر احادیث مختلف طرق کے ساتھ نکاح سے متعلق باب میں آگے آئیں گی ، اگر اللہ نے چاہا ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” جس شخص کی دو بیٹیاں ہوں یا دو بہنیں ہوں یا دو پھوپھیاں ہوں یا دو خالائیں ہوں اور وہ ان کی کفالت کرے تو اس شخص کے لئے جنت کے آٹھ دروازے کھول دیے جائیں گے اے اللہ کے بندو ! تم اس کی مدد کرو اے اللہ کے بندو ! تم اسے دو اے اللہ کے بندو ! تم اسے قرض دو “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عمر بن حبیب عدوی ہے ، اور وہ متروک ہے ۔

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آدمی اپنے آپ پر اپنی اولاد پر اپنے اہل خانہ پر اپنے رشتے داروں پر اپنے قریبی عزیزوں پر جو بھی خرچ کرتا ہے وہ صدقہ ہوتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مسور بن صلت ہے ، اور وہ متروک ہے ۔

سیدنا معاذ بن جبل رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اس نے عرض کی : یا رسول اللہ ! اللہ تعالیٰ نے جو کچھ مجھے عطا کیا ہے اس میں سے جو اضافی چیز ہے وہ میں کسے دوں ؟ نبی اکرم صلی اللہ علیہ وسلم نے ارشاد فرمایا : تم اپنی ماں سے آغاز کرو پھر اپنے باپ اپنی بہن اپنے بھائی اور درجہ بدرجہ قریبی عزیزوں کو دو اور تم پڑوسیوں اور حاجت مندوں کو نہ بھول جانا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عباد بن أحمد عرزمی ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اوپر والا ہاتھ نیچے والے ہاتھ سے زیادہ فضیلت رکھتا ہے ، اور تم اس سے آغاز کرو جس کی تم کفالت کرتے ہو تمہاری ماں تمہارا باپ تمہاری بہن اور تمہارا بھائی اور ( پھر ) درجہ بدرجہ قریبی عزیز “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا صعصعہ بن ناجیہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کی خدمت میں حاضر ہوا میں نے عرض کی : یا رسول اللہ ! بعض اوقات میرے پاس اضافی چیز ہوتی ہے ، جسے میں نے کسی مشکل یا مسافر کے لئے سنبھال کے رکھا ہوتا ہے ، تو نبی اکرم صلی اللہ علیہ وسلم نے ارشاد فرمایا : تم اپنی ماں اپنے باپ اپنی بہن اپنے بھائی اور درجہ بدرجہ قریبی عزیزوں ( پر اضافی رقم خرچ کرو ) “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ایسا ہے ، جس سے میں واقف نہیں ہوں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے آپ پر خرچ کرتا ہے ، تاکہ وہ اس کے ذریعے لوگوں سے مانگنے ) بچ کے رہے تو یہ صدقہ ہے اور جو شخص اپنی بیوی پر اور اپنی اولاد پر اور اپنے اہل خانہ پر خرچ کرتا ہے ، تو یہ صدقہ ہے “ ۔
یہ روایت امام طبرانی نے معجم اوسط اور معجم کبیر میں نقل کی ہے ۔ انہوں نے اسے دو اسناد کے ساتھ نقل کیا ہے ، جن میں سے ایک کی سند حسن ہے ۔

سیدنا عبداللہ بن ابواوفی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آدمی کا اپنے اہل خانہ پر خرچ کرنا صدقہ ہے “ ۔
یہ روایت امام طبرانی نے معجم اوسط اور معجم اور کبیر میں نقل کی ہے ۔ اس کی سند میں ایک راوی محمد بن کثیر کوفی ہے ، اور وہ ضعیف ہے ۔ ( علامہ ہیثمی فرماتے ہیں : ) میں یہ کہتا ہوں : خرچ کرنے سے متعلق دیگر احادیث نکاح سے متعلق باب میں آگے آئیں گی ۔