مجمع الزوائد ومنبع الفوائد

سیدنا ہرماس بن زیاد رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مانگنے والے کا حق ہوتا ہے ، اگرچہ وہ گھوڑے پر آئے “ ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی عثمان بن فائد ہے ، اور وہ ضعیف ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم میں سے کسی کو ، سائل کو کچھ دینے میں ( کوئی بھی چیز ) ہرگز رکاوٹ نہ بنے ، ( یہاں ایک لفظ کے بارے میں راوی کو شک ہے ، لیکن مفہوم یہی ہے ) اگرچہ وہ اس کے ہاتھوں میں سونے کے بنے ہوئے کنگن دیکھ لے “ ۔
یہ روایت امام بزار نے نقل کی ہے ، اس کی سند میں ایک راوی حسن بن علی ہاشمی نوفلی ہے ، اور وہ ضعیف ہے ۔ ابن عدی کہتے ہیں : وہ ضعیف ہونے کے زیادہ قریب ہے ، بہ نسبت اس کے کہ وہ سچے ہونے کے قریب ہو ۔