مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے نجاشی کی نماز جنازہ ادا کی تھی ۔
یہ روایت امام أحمد نے نقل کی ہے ۔ اس کی سند میں ایک ایسا شخص ہے ، جس کا نام بیان نہیں کیا گیا ہے ۔

سیدنا سعید بن زید رضی اللہ عنہ بیان کرتے ہیں : نبی اکرم صلی اللہ علیہ وسلم نے نجاشی کی نماز جنازہ ادا کی تھی ۔
یہ روایت امام ابویعلیٰ نے نقل کی ہے ۔ اس کی سند میں ایک راوی خدیج بن معاویہ ہے ، اور اس کے بارے میں کلام کیا گیا ہے ۔

سیدنا انس بن مالک رضی اللہ عنہ بیان کرتے ہیں : سیدنا جبرائیل علیہ السلام نازل ہوئے انہوں نے بتایا : معاویہ بن معاویہ لیثی کا انتقال ہو گیا ہے کیا آپ اس کی نماز جنازہ ادا کرنا پسند کریں گے ؟ نبی اکرم صلی اللہ علیہ وسلم نے جواب دیا : جی ہاں ۔ راوی بیان کرتے ہیں : تو انہوں نے اپنا پر زمین پر مارا تو راستے میں موجود ہر درخت اور ہر ٹیلہ ہٹ گیا راوی بیان کرتے ہیں : انہوں نے مرحوم کی چارپائی کو اٹھایا تو نبی اکرم صلی اللہ علیہ وسلم اسے دیکھ رہے ، اور آپ نے تکبیر کہی آپ کے پیچھے دو صفیں فرشتوں کی تھیں ہر صف میں ستر ہزار فرشتے تھے ۔ نبی اکرم صلی اللہ علیہ وسلم نے دریافت کیا : اے جبرائیل اس کو اللہ تعالیٰ کی بارگاہ میں یہ مقام کس وجہ سے ملا ہے ؟ انہوں نے جواب دیا : اس کے سورت اخلاص سے محبت کرنے کی وجہ سے اور اس کے جاتے ہوئے آتے ہوئے کھڑے ہوئے بیٹھے ہوئے ہر حال میں اس ( سورت اخلاص ) کو تلاوت کرنے کی وجہ سے ۔
یہ روایت امام ابویعلیٰ نے نقل کی ہے ، اور امام طبرانی نے اسے معجم کبیر میں نقل کیا ہے ۔ امام ابویعلیٰ کی سند میں ایک راوی محمد بن ابراہیم بن العلاء ہے ، اور وہ انتہائی ضعیف ہے ۔ امام طبرانی کی سند میں ایک راوی محبوب بن ہلال ہے ۔ امام ذہبی کہتے ہیں : یہ معروف نہیں ہے ، اور اس کی نقل کردہ حدیث منکر ہے ۔

سیدنا ابوامامہ رضی اللہ عنہ بیان کرتے ہیں : سیدنا جبرائیل علیہ السلام نبی اکرم صلی اللہ علیہ وسلم کے پاس آئے نبی اکرم صلی اللہ علیہ وسلم اس وقت تبوک میں موجود تھے انہوں نے کہا: اے سیدنا محمد ! آپ معاویہ بن معاویہ مزنی کے جنازے میں شریک ہوں تو نبی اکرم صلی اللہ علیہ وسلم نکلے سیدنا جبرائیل علیہ السلام ستر ہزار فرشتوں کے ہمراہ نکلے تھے انہوں نے اپنا دایاں پاؤں مارا تو وہ جھک گئے انہوں نے اپنا بایاں پاؤں زمین پر مارا تو وہ جھک گئی یہاں تک کہ نبی اکرم صلی اللہ علیہ وسلم مکہ اور مدینہ کو دیکھ سکتے تھے ، یہاں تک کہ نبی اکرم صلی اللہ علیہ وسلم نے ان صاحب کی نماز جنازہ ادا کی سیدنا جبرائیل اور فرشتوں نے بھی ادا کی جب یہ لوگ اس سے فارغ ہوئے تو نبی اکرم صلی اللہ علیہ وسلم نے فرمایا : اے جبرائیل ! معاویہ بن معاویہ مزنی کو یہ مقام کس وجہ سے نصیب ہوا ہے ؟ انہوں نے جواب دیا : سورت اخلاص کھڑے ہو کر بیٹھ کر سوار ہو کر پیدل چلتے ہوئے ( ہر حال میں پڑھنے کی وجہ سے یہ مقام ملا ہے ) ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی نوح بن عمر ہے ۔ ابن حبان کہتے ہیں : یہ بات کہی جاتی ہے اس نے یہ حدیث چوری کی ہے ۔ ( علامہ ہیثمی فرماتے ہیں : ) میں یہ کہتا ہوں : یہ چیز حدیث میں کمزوری کا باعث نہیں بن سکتی اس کی سند میں ایک راوی بقیہ ہے ، اور وہ تدلیس کرنے والا ہے اس روایت میں اس کے علاوہ اور کوئی علت نہیں ہے ۔

سیدنا معاویہ رضی اللہ عنہ بیان کرتے ہیں : نبی اکرم صلی اللہ علیہ وسلم غزوہ تبوک میں شرکت کے لئے گئے ہوئے تھے سیدنا جبرائیل علیہ السلام آپ کی خدمت میں حاضر ہوئے انہوں نے عرض کی : کیا آپ معاویہ بن معاویہ مزنی کے جنازے میں دلچسپی رکھتے ہیں ؟ نبی اکرم صلی اللہ علیہ وسلم نے فرمایا : جی ہاں ۔ سیدنا جبرائیل علیہ السلام نے اپنے ہاتھ کے ذریعے اس طرح اشارہ کیا ، تو سب پہاڑ اور ٹیلے ہٹ گئے نبی اکرم صلی اللہ علیہ وسلم چلتے ہوئے تشریف لائے آپ کے ساتھ سیدنا جبرائیل علیہ السلام تھے ، اور سیدنا جبرائیل علیہ السلام کے ساتھ ستر ہزار فرشتے تھے ۔ نبی اکرم صلی اللہ علیہ وسلم نے معاویہ بن معاویہ کی نماز جنازہ ادا کی نبی اکرم صلی اللہ علیہ وسلم نے سیدنا جبرائیل علیہ السلام سے دریافت کیا : معاویہ اس مقام تک کس وجہ سے پہنچا ہے ؟ انہوں نے جواب دیا : سورت اخلاص کی بکثرت تلاوت کی وجہ سے وہ کھڑے ہو کر بیٹھ کر لیٹ کر اس کو پڑھتا رہتا تھا ، تو اس وجہ سے اس مقام تک پہنچا ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی صدقہ بن ابوسہل ہے ، اور میں اس سے واقف نہیں ہوں ، اس روایت کے بقیہ رجال ثقہ ہیں ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے نجاشی کی نماز جنازہ ادا کی تھی آپ نے اس پر چار تکبیریں کہی تھیں ۔
یہ روایت امام بزار نے نقل کی ہے ، اور امام طبرانی نے معجم اوسط میں نقل کی ہے ۔ امام طبرانی کے رجال ” صحیح“ کے رجال ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کو جب نجاشی کے انتقال کی خبر ملی تو آپ نے نجاشی کی نماز جنازہ ادا کی عرض کی گئی : یا رسول اللہ ! کیا آپ ایک حبشی شخص کی نماز جنازہ ادا کرنے لگے ہیں ؟ تو اللہ تعالیٰ نے یہ آیت نازل کی : اہل کتاب میں سے کچھ لوگ ایسے ہیں جو اللہ تعالیٰ پر ایمان رکھتے ہیں “ ۔
یہ روایت امام بزار نے اور امام طبرانی نے معجم اوسط میں نقل کی ہے ۔ امام طبرانی کے رجال ثقہ ہیں ۔

کثیر بن عبداللہ نے اپنے والد کے حوالے سے اپنے دادا کا یہ بیان نقل کیا ہے : نبی اکرم صلی اللہ علیہ وسلم نے نجاشی کی نماز جنازہ میں پانچ تکبیریں کہی تھیں ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے بھی نقل کی ہے ، تاہم انہوں نے نجاشی کا ذکر نہیں کیا ۔
یہ روایت امام طبرانی نے معجم کبیر اور معجم اوسط میں نقل کی ہے ۔ کثیر نامی راوی ضعیف ہے ۔

سیدنا ابوسعید خدری رضی اللہ عنہ بیان کرتے ہیں : جب نبی اکرم صلی اللہ علیہ وسلم کو نجاشی کی وفات کی اطلاع ملی تو آپ نے ارشاد فرمایا : تم لوگ نکلو اور اپنے اس بھائی کی نماز جنازہ ادا کرو جسے تم نے کبھی نہیں دیکھا تو ہم نکلے نبی اکرم صلی اللہ علیہ وسلم آگے ہوئے ہم نے آپ کے پیچھے صفیں بنا لیں ۔ آپ نے نماز ادا کی ہم نے بھی نماز ادا کی جب ہم نماز پڑھ کر فارغ ہوئے تو منافقین نے کہا: تم لوگ ان کی طرف دیکھو کہ یہ نکلے اور انہوں نے ایک عیسائی طاقتور شخص ( یعنی حکمران ) کی نماز جنازہ ادا کی ، جسے انہوں نے کبھی دیکھا بھی نہیں ہے ، تو اللہ تعالیٰ نے یہ آیت نازل کی : ” بے شک اہل کتاب میں سے کچھ لوگ ایسے ہیں ، جو اللہ تعالیٰ پر ایمان رکھتے ہیں ۔ ۔ ۔ ۔ ۔ ۔ ۔ ۔ ۔ ۔ “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبدالرحمن بن ابوزناد ہے ، اور وہ ضعیف ہے ۔

سیدنا جریر رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” نجاشی کا انتقال ہو گیا ہے ، تم لوگ اس کی نماز جنازہ ادا کرو“ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

ابن خارجہ بیان کرتے ہیں : جب نبی اکرم صلی اللہ علیہ وسلم کو نجاشی کے انتقال کی اطلاع ملی تو آپ نے ارشاد فرمایا : تمہارے بھائی کا انتقال ہو گیا ہے ( راوی بیان کرتے ہیں ) ہم لوگ نکلے ہم نے آپ کے پیچھے صفیں بنا لیں اور ہم نے نماز جنازہ ادا کی حالانکہ ہم کچھ نہیں دیکھ رہے تھے ( یعنی میت ہمارے سامنے نہیں تھی ) ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حمران بن اعین ہے ، جسے ابوحاتم نے ” ثقہ “ قرار دیا ہے یحیی بن معین نے اسے ” ضعیف “ قرار دیا ہے ۔ اس روایت کے بقیہ رجال ثقہ ہیں ۔

سیدنا وحشی بن حرب رضی اللہ عنہ بیان کرتے ہیں : جب نجاشی کا انتقال ہوا تو نبی اکرم صلی اللہ علیہ وسلم نے اپنے اصحاب سے ارشاد فرمایا : تمہارے بھائی نجاشی کا انتقال ہو گیا ہے تم لوگ اٹھو اور اس کی نماز جنازہ ادا کرو ایک صاحب نے عرض کی : یا رسول اللہ ! ہم اس کی نماز جنازہ کیسے ادا کر سکتے ہیں جبکہ اس کا انتقال کفر کے عالم میں ہوا ہے ، تو نبی اکرم صلی اللہ علیہ وسلم نے ارشاد فرمایا : کیا تم نے اللہ تعالیٰ کا یہ فرمان نہیں سنا ہے : ” بے شک اہل کتاب میں سے کچھ لوگ ایسے ہیں جو اللہ تعالیٰ پر اور جو تمہاری طرف نازل کیا گیا اس پر اور جو ان کی طرف نازل کیا گیا اس پر ایمان رکھتے ہیں ۔ ۔ ۔ ۔ ۔ ۔ ۔ ۔ ۔ ۔ “ ۔ یہ آیت کے آخر تک ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی سلیمان بن ابوداؤد حرانی ہے ، اور وہ ضعیف ہے ۔

سیدنا حذیفہ بن اسید رضی اللہ عنہ بیان کرتے ہیں : جب نبی اکرم صلی اللہ علیہ وسلم کو نجاشی کے انتقال کی اطلاع ملی تو آپ نے اپنے اصحاب سے فرمایا : تمہارا بھائی نجاشی انتقال کر گیا ہے ، جو شخص اس کی نماز جنازہ ادا کرنا چاہے وہ نماز جنازہ ادا کرے پھر نبی اکرم صلی اللہ علیہ وسلم نے حبشہ کی طرف رخ کیا ، اور اس پر چار مرتبہ تکبیر کہی ۔ ( علامہ ہیثمی فرماتے ہیں : ) میں یہ کہتا ہوں :
یہ روایت امام ابن ماجہ نے بھی نقل کی ہے ، تاہم انہوں نے تکبیر کہنے کا ذکر نہیں کیا ہے ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔