مجمع الزوائد ومنبع الفوائد

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” خواتین کو جنازے کے ساتھ جانے میں اجر نہیں ملے گا “ ۔
یہ روایت امام طبرانی نے معجم اوسط میں نقل کی ہے ، اور اس میں مجہول راوی پائے جاتے ہیں ۔

سیدنا انس بن مالک رضی اللہ عنہ بیان کرتے ہیں : ہم لوگ نبی اکرم صلی اللہ علیہ وسلم کے ساتھ ایک جنازے میں نکلے آپ نے خواتین کو ملاحظہ فرما کر دریافت کیا : تم اسے کندھا دو گی ؟ انہوں نے عرض کی : جی نہیں نبی اکرم صلی اللہ علیہ وسلم نے دریافت کیا : کیا تم اسے دفن کرو گی ؟ انہوں نے عرض کی : جی نہیں نبی اکرم صلی اللہ علیہ وسلم نے ارشاد فرمایا : پھر تم ایسی حالت میں واپس جاؤ کہ تمہیں گناہ ہوا ہو تمہیں اجر نصیب نہ ہو ۔
یہ روایت امام ابویعلیٰ نے نقل کی ہے ۔ اس کی سند میں ایک راوی حارث بن زیاد ہے ۔ امام ذہبی فرماتے ہیں وہ ضعیف ہے ۔

مفضل بن فضالہ بیان کرتے ہیں : میں نے ربیعہ معافری سے ” کدی “ کے بارے میں دریافت کیا ، تو انہوں نے فرمایا : میرا خیال ہے وہاں قبرستان تھا راوی کہتے ہیں : جب میں نے ربیعہ کو دیکھا کہ وہ اس بارے میں شک کا شکار ہے تو میری ملاقات یزید بن ابوحبیب سے ہوئی یزید بن حبیب نے یہ بات بیان کی نبی اکرم صلی اللہ علیہ وسلم ایک شخص کے جنازے میں موجود تھے ، جب اسے رکھا گیا تاکہ آپ اس کی نماز جنازہ ادا کریں تو آپ نے ایک خاتون کو ملاحظہ فرمایا آپ نے اس عورت کے بارے میں دریافت کیا ، تو عرض کی گئی : یا رسول اللہ ! یہ مرحوم کی بہن ہے نبی اکرم صلی اللہ علیہ وسلم نے اس عورت سے فرمایا تم واپس چلی جاؤ آپ نے اس وقت تک نماز جنازہ شروع نہیں کی جب تک وہ عورت اوجھل نہیں ہو گئی ۔ یزید نامی راوی بیان کرتے ہیں : سیدہ ام سلمہ رضی اللہ عنہا سیدنا ابوسلمہ رضی اللہ عنہ کے جنازے میں شریک ہوئی تھیں ۔
یہ روایت امام ابویعلیٰ نے ایک حدیث کے آخر میں نقل کی ہے ، جس کو انہوں نے ذکر کیا ہے ، اور اس کے رجال ثقہ ہیں تاہم اس کی سند منقطع ہے ۔

سیدنا اسامہ بن شریک رضی اللہ عنہ بیان کرتے ہیں : میں اس وقت نبی اکرم صلی اللہ علیہ وسلم کے ساتھ تھا ، جب آپ کے سامنے ایک جنازہ لایا گیا تاکہ آپ اس کی نماز جنازہ ادا کریں آپ نے توجہ کی ، تو آپ کو ایک عورت آتی ہوئی نظر آئی آپ نے ارشاد فرمایا : اسے واپس کر دو تو لوگوں نے اسے کئی مرتبہ واپس کیا یہاں تک کہ وہ نظروں سے اوجھل ہو گئی جب آپ نے دیکھا کہ وہ نگاہوں سے اوجھل ہو گئی ہے ، تو پھر آپ نے نماز جنازہ کی تکبیر کہی ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی محمد بن عبداللہ عرزمی ہے ، اور وہ ضعیف ہے ۔

حنش بن معتمر اپنے والد کا یہ بیان نقل کرتے ہیں : نبی اکرم صلی اللہ علیہ وسلم ایک نماز جنازہ ادا کرنے لگے تھے اسی دوران ایک خاتون انگیٹھی لے کر آئی وہ جنازے میں شامل ہونا چاہتی تھی ۔ نبی اکرم صلی اللہ علیہ وسلم نے اسے بلند آواز میں ( پکار کر واپس جانے کے لئے کہا: ) یہاں تک کہ جب وہ مدینہ منورہ کی عمارات میں داخل ہو گئی ( تو آپ نے نماز جنازہ پڑھائی ) “ ۔
یہ روایت امام طبرانی نے معجم کبیر میں نقل کی ہے ۔ حنش نامی راوی کا ذکر کرتے ہوئے میں نے کسی کو نہیں پایا ہے ۔

سیدنا عبدالرحمن بن ابزی رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ ایک جنازے میں شریک ہوا جب آپ نماز جنازہ شروع کرنے لگے تو آپ نے توجہ کی ، تو ایک عورت موجود تھی آپ کے حکم کے تحت اسے وہاں سے بھجوا دیا گیا یہاں تک کہ وہ نگاہوں سے اوجھل ہو گئی تو پھر آپ آگے بڑھے آپ نے نماز جنازہ میں چار تکبیریں کہیں ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن سالم ہے ، اور وہ ضعیف ہے ۔