مجمع الزوائد ومنبع الفوائد

سیدنا عثمان بن عفان رضی اللہ عنہ کے بارے میں یہ بات منقول ہے ۔ انہوں نے جنازہ دیکھا تو وہ کھڑے ہو گئے پھر انہوں نے یہ بات بیان کی کہ میں نے نبی اکرم صلی اللہ علیہ وسلم کو دیکھا کہ آپ نے جنازے کو دیکھا تو اس کے لئے کھڑے ہو گئے تھے ۔
یہ روایت امام أحمد اور امام بزار نے نقل کی ہے ۔ اس کی سند میں ایک راوی موسیٰ بن عمران بن مناح ہے میں نے کسی کو اس کے ایسے حالات بیان کرتے ہوئے نہیں پایا جو شفاء بخش ہوں ( یعنی ضرورت پوری کر دیں ) ۔

سیدنا عبداللہ بن عمرو رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم سے سوال کیا اس نے عرض کی : یا رسول اللہ ہمارے پاس سے کافر کا جنازہ بھی گزرتا ہے ، تو کیا ہم اس کے لئے بھی کھڑے ہوں ؟ نبی اکرم صلی اللہ علیہ وسلم نے ارشاد فرمایا : جی ہاں ۔ تم اس کے لئے کھڑے ہو کیونکہ تم اس جنازے کے لئے کھڑے نہیں ہوتے ہو تم اس ذات کے لئے کھڑے ہوتے ہو جو ارواح کو قبض کرتی ہے “ ۔
یہ روایت امام أحمد امام بزار اور امام طبرانی نے معجم کبیر میں نقل کی ہے ۔ امام أحمد کے رجال ثقہ ہیں ۔

سیدنا ابوسعید بن زید رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس سے ایک جنازہ گزرا تو آپ اس کے لئے کھڑے ہوئے تھے ۔
یہ روایت امام أحمد نے نقل کی ہے ۔ اس کی سند میں ایک راوی جابر جعفی ہے اس کے بارے میں بہت زیادہ کلام کیا گیا ہے ، اور اس کی توثیق بھی کی گئی ہے ۔

سیدنا سعید بن زید رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس سے ایک جنازہ گزرا تو آپ کھڑے ہوئے ۔
یہ روایت امام بزار نے نقل کی ہے ۔ وہ یہ فرماتے ہیں ہمارے علم کے مطابق
یہ روایت سیدنا سعید بن زید رضی اللہ عنہ کے حوالے سے صرف اسی سند کے ساتھ منقول ہے بعض حضرات نے یہ بات بیان کی ہے یہ سیدنا ابوسعید بن زید رضی اللہ عنہ سے منقول ہے ۔ اس کی سند میں ایک راوی جابر جعفی ہے ، اور اس کے بارے میں کلام کیا گیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس سے ایک یہودی کا جنازہ گزرا آپ کھڑے ہو گئے عرض کی گئی : یا رسول اللہ ! یہ ایک یہودی کا جنازہ ہے نبی اکرم صلی اللہ علیہ وسلم نے فرمایا : موت کی پریشانی ہوتی ہے ۔
یہ روایت امام أحمد نے نقل کی ہے ، اور اس کی سند حسن ہے ۔
( علامہ ہیثمی فرماتے ہیں : ) میں یہ کہتا ہوں : سیدنا ابوہریرہ رضی اللہ عنہ کے حوالے سے امام نسائی رحمہ اللہ نے روایت نقل کی ہے جو جنازے کے لئے کھڑے ہونے کے بارے میں ہے ، اور وہ اس روایت کے علاوہ ہے ۔

سیدنا ابوموسی اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تمہارے پاس سے کوئی جنازہ گزرے تو خواہ وہ مسلمان ہو ، یا عیسائی ہو ، یا یہودی ہو تم اس کے لئے کھڑے ہو جاؤ کیونکہ ہم اس کے لئے کھڑے نہیں ہوتے ہیں بلکہ ہم اس وجہ سے کھڑے ہوتے ہیں جو فرشتے اس کے ساتھ ہوتے ہیں “ ۔ لیث بیان کرتے ہیں : میں نے مجاہد کو یہ حدیث بیان کی ، تو انہوں نے بتایا : عبداللہ بن سخبرہ ازدی نے مجھے یہ حدیث بیان کی وہ بیان کرتے ہیں : ایک مرتبہ ہم سیدنا علی رضی اللہ عنہ کے ساتھ بیٹھے ہوئے جنازے کا انتظار کر رہے تھے اسی دوران ایک جنازہ گزرا تو ہم کھڑے ہو گئے سیدنا علی رضی اللہ عنہ نے دریافت کیا : تم لوگ کیوں کھڑے ہوئے ہو ؟ ہم نے کہا: یہ اس وجہ سے ہے ، جو ( حدیث ) آپ نے ہمیں بیان کی ہے : اے سیدنا محمد کے اصحاب ! سیدنا علی رضی اللہ عنہ نے دریافت کیا : وہ کون سی حدیث ہے ؟ میں نے کہا: سیدنا ابوموسیٰ اشعری رضی اللہ عنہ نے یہ بات بیان کی ہے نبی اکرم صلی اللہ علیہ وسلم نے ارشاد فرمایا ہے : ” جب تمہارے پاس سے جنازہ گزرے خواہ مسلمان کا ہو ، یا یہودی کا ہو ، یا عیسائی کا ہو تو تم اس کے لئے کھڑے ہو جاؤ کیونکہ ہم اس کے لئے کھڑے نہیں ہوتے بلکہ ہم اس کے ساتھ جانے والے فرشتوں کے لئے کھڑے ہوتے ہیں“ ۔ سیدنا علی صلی اللہ علیہ وسلم نے ارشاد فرمایا : نبی اکرم صلی اللہ علیہ وسلم نے ایسا صرف ایک یہودی کے لئے کیا تھا ، آپ ( امور میں ) اہل کتاب کے ساتھ مشابہت اختیار کرتے تھے ، جب آپ کو اس سے منع کر دیا گیا ، تو آپ باز آ گئے اور اس کے بعد ایسا نہیں کیا ۔
( علامہ ہیثمی فرماتے ہیں : ) میں یہ کہتا ہوں : سیدنا علی رضی اللہ عنہ سے منقول حدیث کو امام نسائی رحمہ اللہ نے اختصار کے ساتھ نقل کیا ہے ۔
یہ روایت امام أحمد نے نقل کی ہے ۔ اس کی سند میں ایک راوی لیث بن ابوسلیم ہے وہ ثقہ ہے ، لیکن تدلیس کرنے والا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کے پاس سے ایک جنازہ گزرا آپ کھڑے ہو گئے اس بارے میں آپ کی خدمت میں عرض کی گئی : تو آپ نے ارشاد فرمایا : موت کی مخصوص گھبراہٹ ہوتی ہے ۔
یہ روایت امام بزاز نے نقل کی ہے ۔ اس کی سند میں ایک راوی قیس بن ربیع اسدی ہے ، اور اس کے بارے میں کلام کیا گیا ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو ایک یہودی کے جنازے کے لئے کھڑے ہوتے ہوئے دیکھا ہے ، جو آپ کے پاس سے گزرا تھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابویحیی قتات ہے ، اور اس کے بارے میں کلام کیا گیا ہے ۔

زید بن وہب بیان کرتے ہیں : ہم سیدنا علی رضی اللہ عنہ کی موجودگی میں جنازے کے لیے قیام کے معاملے میں گفتگو کر رہے تھے تو سیدنا ابومسعود رضی اللہ عنہ نے فرمایا : ہم مسلسل ایسا کرتے رہے ہیں سیدنا علی رضی اللہ عنہ نے فرمایا : تم نے ٹھیک کہا: ہے اس کی وجہ یہ ہے کہ تم یہودی ہو ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم ایک یہودی کے جنازے کی وجہ سے کھڑے ہو گئے تھے جو آپ کے پاس سے گزرا تھا ۔
یہ روایت امام بزار نے نقل کی ہے ، اور اس کی سند حسن ہے ۔

سیدنا امام حسن بن علی رضی اللہ عنہما کے بارے میں یہ بات منقول ہے ان لوگوں کے پاس سے ایک جنازہ گزرا تو کچھ لوگ کھڑے ہو گئے ، لیکن وہ کھڑے نہیں ہوئے انہوں نے فرمایا : تم لوگوں نے ایسا کیوں کیا ہے ؟ نبی اکرم صلی اللہ علیہ وسلم یہودی کی بو سے اذیت محسوس کرتے ہوئے کھڑے ہوئے تھے ۔
( علامہ ہیثمی فرماتے ہیں : ) میں یہ کہتا ہوں : یہ روایت امام نسائی رحمہ اللہ نے اختصار کے ساتھ نقل کی ہے ۔
یہ روایت امام أحمد نے نقل کی ہے ۔ اس کی سند میں ایک راوی حجاج بن ارطاۃ ہے ، اس کے بارے میں کلام کیا گیا ہے ۔

سیدنا امام حسین رضی اللہ عنہما اور سیدنا عبداللہ بن عباس رضی اللہ عنہما یا ان دونوں حضرات میں سے کسی ایک کے حوالے سے یہ بات منقول ہے : وہ فرماتے ہیں : ” ایک یہودی کا جنازہ پاس سے گزرنے پر نبی اکرم صلی اللہ علیہ وسلم کھڑے ہو گئے آپ نے ارشاد فرمایا : اس کی بو نے مجھے اذیت پہنچائی ہے “ ۔
( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عباس رضی اللہ عنہما سے منقول حدیث کو امام نسائی رحمہ اللہ نے نقل کیا ہے ، تاہم اس میں یہ الفاظ نہیں ہیں : ” اس کی بو نے مجھے اذیت پہنچائی ہے “ ۔ جبکہ سیدنا امام حسین رضی اللہ عنہ سے منقول حدیث محدثین میں سے کسی اور نے نقل نہیں کی ہے
یہ روایت امام أحمد نے اور امام طبرانی نے معجم اوسط میں اس کی مانند نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن عیاش بن ابوربیعہ رضی اللہ عنہ بیان کرتے ہیں : نبی اکرم صلی اللہ علیہ وسلم اس جنازے کی وجہ سے کھڑے نہیں ہوئے تھے وہ جنازہ ایک یہودی عورت کا تھا ، اس کی دھونی کی بو کی وجہ سے آپ کھڑے ہوئے تھے ، اور اس وقت تک کھڑے رہے تھے ، جب تک وہ آگے نہیں گزر گیا تھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابوعمرو سدوسی ہے ابوعامر عقدی کے علاوہ اور کسی نے اس سے روایت نقل نہیں کی ہے ۔ اس روایت کے بقیہ رجال ثقہ ہیں ۔