مجمع الزوائد ومنبع الفوائد

سیدہ ام عباس بیان کرتی ہیں : سیدہ ام سعد نے یہ کہنا شروع کیا : ام سعد کے لئے بربادی ہے ، سعد بہادر اور مضبوط تھا ، تو نبی اکرم صلی اللہ علیہ وسلم نے ارشاد فرمایا : تم اس سے زیادہ نہ کہنا ، تم اس سے زیادہ نہ کہنا ، اللہ کی قسم ! میں یہ جانتا ہوں کہ وہ اللہ کے معاملے میں احتیاط کرنے والا تھا اور اللہ کے معاملے میں قوی تھا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی مسلم ملائی ہے ، اور وہ ضعیف ہے ۔

انہوں نے یہ روایت محمد بن اسحاق کے حوالے سے نقل کی ہے : وہ یہ کہتے ہیں : جب اُن کی لاش کو اٹھایا گیا ، تو ام سعد نے روتے ہوئے یہ کہا: ام سعد کے لئے بربادی ہے ، سعد بہادر اور مضبوط تھا اور سردار تھا ، جس کے ذریعے بچاؤ کیا جاتا تھا ، نبی اکرم صلی اللہ علیہ وسلم نے ارشاد فرمایا : ہر رونے والی جھوٹ بولتی ہے ، البتہ سعد پر رونے والی کا معاملہ مختلف ہے ۔

سیدہ ام سلمہ رضی اللہ عنہا بیان کرتی ہیں : انہوں نے عرض کی : یا رسول اللہ ! بنو مخزوم کی خواتین ولید بن ولید بن مغیرہ پر ماتم کرنے کے لئے تیار ہوئی ہیں تو نبی اکرم صلی اللہ علیہ وسلم نے انہیں اجازت دے دی تو ایک خاتون نے روتے ہوئے یہ شعر کہا: ” میں ولید بن ولید بن مغیرہ پر رو رہی ہوں ، میں ولید بن ولید پر رو رہی ہوں ، جو خاندان کا بھائی ( یعنی ایک اہم فرد ) تھا “ ۔
یہ روایت امام طبرانی نے معجم صغیر اور معجم اوسط میں نقل کی ہے ، اس کی سند میں ایک راوی ثابت ابوحمزہ ثمالی ہے وہ ضعیف ہے ۔