مجمع الزوائد ومنبع الفوائد

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تین چیزیں میری امت میں قیامت قائم ہونے تک مسلسل رہیں گی نوحہ کرنا نسب پر فخر کرنا اور ستاروں پر اعتماد کرنا “ ۔
یہ روایت امام ابویعلیٰ نے نقل کی ہے ، اور اس کے رجال ثقہ ہیں ۔

سیدنا جنادہ بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” تین چیزیں زمانہ جاہلیت سے تعلق رکھتی ہیں جنہیں اہل اسلام کبھی ترک نہیں کریں گے ستاروں کی مدد سے بارش نازل ہونے کی امید رکھنا نسب میں طعن کرنا اور میت پر نوحہ کرنا “ ۔
یہ روایت امام بزار نے اور امام طبرانی نے معجم کبیر میں مصعب بن عبیداللہ بن جنادہ کے حوالے سے ان کے والد کے حوالے سے ان کے دادا سے نقل کی ہے ۔ میں نے کسی کو مصعب یا ان کے دادا کے حالات بیان کرتے ہوئے نہیں پایا ہے ۔

سیدنا عوف بن مالک مزنی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تین چیزیں زمانہ جاہلیت سے تعلق رکھتی ہیں جنہیں لوگ نہیں چھوڑیں گے ( راوی کو شک ہے شاید یہ الفاظ ہیں : ) لوگ انہیں ترک نہیں کریں گے نسب میں طعن کرنا نوحہ کرنا اور ان کا یہ کہنا کہ فلاں ستارے کی وجہ سے اور فلاں ستارے کی وجہ سے ہم پر بارش نازل ہوئی ہے “ ۔
یہ روایت امام بزار نے نقل کی ہے ۔ امام طبرانی نے معجم کبیر میں نقل کی ہے ۔ اس کی سند میں ایک راوی کثیر بن عبداللہ مزنی ہے ، اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میری امت میں چار چیزیں ایسی ہیں جنہیں وہ ترک نہیں کریں گے حسب میں فخر کرنا سب میں طعن کرنا ، نوحہ کرنا قیامت کے دن نوحہ کرنے والی عورت کو اٹھایا جائے گا جب کہ اس عورت نے نوحے کے حوالے سے ( دنیا میں ) توبہ نہیں کی ہو گی ، تو اس پر قطران ( تارکول ، یا کولتار کی مانند ایک چیز جو بعض درختوں سے بنائی جاتی ہے ) کی قمیص ہو گی “ ( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں اختصار کے ساتھ منقول ہے ۔
یہ روایت امام بزار نے نقل کی ہے ، اور اس کی سند حسن ہے ۔

سیدنا عباس بن عبدالمطلب رضی اللہ عنہ بیان کرتے ہیں : نبی اکرم صلی اللہ علیہ وسلم نے میرا ہاتھ پکڑا اور ارشاد فرمایا : اے عباس ! آپ کی قوم تین چیزیں ترک نہیں کرے گی نسب میں طعن کرنا ، نوحہ کرنا اور ستاروں کی مدد سے بارش کے نزول کا خواہاں ہونا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حسن بن دینار ہے ، اور وہ ضعیف ہے ۔

سیدنا سلمان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین چیزیں زمانہ جاہلیت سے تعلق رکھتی ہیں حسب میں فخر کرنا ، نسب میں طعن کرنا اور نوحہ کرنا“ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبدالغفور ابوصباح ہے ، اور وہ ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم نے مکہ فتح کر لیا تو ابلیس رونے لگا اس کے لشکر کے افراد اس کے گرد اکھٹے ہو گئے انہوں نے کہا: تم لوگ اس بات سے مایوس ہو جاؤ کہ تم سیدنا محمد صلی اللہ علیہ وسلم کی امت کو آج کے دن کے بعد شرک کی طرف لوٹا دو گے ، لیکن تم انہیں ان کے دین کے حوالے سے آزمائش کا شکار کر دو گے اور ان کے درمیان نوحہ کو پھیلا دینا “ ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” فرشتے نوحہ کرنے والی عورت اور رونے والی عورت پر رحمت نازل نہیں کرتے ہیں “ ۔
یہ روایت امام أحمد نے اور امام ابویعلیٰ نے نقل کی ہے ۔ اس کی سند میں ایک راوی ابومرایہ ہے میں نے کسی کو اس کی توثیق یا اس پر جرح کرتے ہوئے نہیں پایا ہے ۔ اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے نوحہ کرنے والی عورت اور اسے غور سے سننے والی عورت پر لعنت کی ہے آپ نے ارشاد فرمایا : خواتین کا جنازے میں کوئی حصہ نہیں ہے ۔
یہ روایت امام بزار نے اور امام طبرانی نے معجم کبیر میں نقل کی ہے ۔ اس کی سند میں ایک راوی صباح ابوعبداللہ ہے ، میں نے کسی کو اس کا ذکر کرتے ہوئے نہیں پایا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” دو قسم کی آوازیں دنیا اور آخرت میں ملعون ہیں نعمت کے وقت باجے کی آواز اور مصیبت کے وقت رونے کی آواز “ ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو بھی نوحہ کرنے والی عورت توبہ کیے بغیر مر جائے گی تو اللہ تعالیٰ اسے آگ کی بنی ہوئی قمیص پہنائے گا ، اور قیامت کے دن اسے لوگوں کے سامنے کھڑا کر دے گا “ ۔
یہ روایت امام ابویعلیٰ نے نقل کی ہے ، اور اس کی سند حسن ہے ۔

- سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” قیامت کے دن نوحہ کرنے والی عورتوں کی جہنم میں دو صفیں ہوں گی ایک صف اہل جہنم کے دائیں طرف ہو گی ، اور ایک صف اہل جہنم کے بائیں طرف ہو گی ، اور وہ اہل جہنم پر یوں بھونکیں گی جس طرح کتے بھونکتے ہیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی سلیمان بن داؤد یمامی ہے ، اور وہ ضعیف ہے ۔

سیدنا عبداللہ بن عمر رضی اللہ عنہما فرماتے ہیں : اللہ کے رسول نے نوحہ کرنے والی اور ( نوحہ کو ) غور سے سننے والی عورت پر لعنت کی ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حسن بن عطیہ ہے ، اور وہ ضعیف ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” نوحہ کرنے والی عورتوں پر ، قطران ( تارکول کی مانند ایک چیز ) کی قمیص ہو گی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی اسماعیل بن عیاش ہے ۔

سیدنا ابوامامہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” نوحہ کرنے والی عورت قیامت کے دن جنت اور جہنم کے درمیان موجود راستے پر ہو گی اس کی قمیص ، قطران تارکول کی مانند ایک چیز ) ہو گی ، اور اس کے چہرے ( یا اس کے وجود ) کو آگ نے ڈھانپ لیا ہو گا ، جبکہ اس نے ( مرنے سے پہلے دنیا میں ) توبہ نہیں کی ہو گی “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبیداللہ بن زحر ہے ، اور وہ ضعیف ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کے حوالے سے یہ بات نقل کرتے ہیں : آپ نے نوحہ کرنے سے منع کیا ہے ۔
یہ روایت امام بزار نے نقل کی ہے ۔ اس کی سند میں ایک راوی عیسیٰ بن ابوعیسی حناط ہے ، اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم پر نوحہ نہیں کیا گیا تھا ۔
یہ روایت امام بزار نے نقل کی ہے ۔ اس کی سند میں ایک راوی محمد بن عمرو ہے اس کے بارے میں کلام کیا گیا ہے ، اور اس کی حدیث حسن ہے ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو سنا آپ سیدنا ابوسلمہ رضی اللہ عنہ کی عیادت کر رہے تھے انہیں تکلیف لاحق تھی ۔ نبی اکرم صلی اللہ علیہ وسلم نے سیدہ ام سلمہ رضی اللہ عنہا کی آواز سنی جو رو رہی تھیں تو نبی اکرم صلی اللہ علیہ وسلم نے جب سیدہ ام سلمہ رضی اللہ عنہا کے رونے کی آواز سنی کہ وہ اللہ کی کتاب کی یہ آیت پڑھتے ہوئے رو رہی تھیں ۔ ” اور موت کی بیہوشی حق کے ساتھ آ گئی یہ وہ چیز ہے جس سے تم بھاگتے تھے “ ۔ نبی اکرم صلی اللہ علیہ وسلم ٹھہر گئے پھر آپ اندر داخل ہوئے پھر آپ نے سلام کیا ، پھر آپ نے فرمایا : اے ام سلمہ اللہ تعالیٰ تمہارا نگہبان ہو گا جب آپ واپس تشریف لے گئے تو آپ کے ساتھ سیدنا ابوبکر رضی اللہ عنہ تھے انہوں نے عرض کی : یا رسول اللہ ! میں نے آپ کو دیکھا کہ آپ نے اندر داخل ہونے کو ناپسند کیا کیونکہ وہ لوگ نوحہ کر رہے تھے ۔ نبی اکرم صلی اللہ علیہ وسلم نے ارشاد فرمایا : میں ایسے کسی گھر میں داخل نہیں ہوتا ، جس میں نوحہ ہو رہا ہو ، یا سیاہ کتا ہو ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ایوب بن نہیک ہے ، جسے ایک جماعت نے ” ضعیف “ قرار دیا ہے ۔ ابن حبان نے اسے ” ثقہ “ قرار دیا ہے ، اور یہ بات بیان کی ہے : وہ غلطی کرتا ہے ۔

سیدنا عبداللہ بن عمرو رضی اللہ عنہ بیان کرتے ہیں : ایک مرتبہ میں نبی اکرم صلی اللہ علیہ وسلم کے ساتھ چلتا ہوا جا رہا تھا اسی دوران میں نے کسی رونے والی کی آواز سنی نبی اکرم صلی اللہ علیہ وسلم نے فرمایا : تم جاؤ اور جا کر دیکھو کہ کیا ہوا ہے ؟ لوگوں نے عرض کی : سیدنا عبداللہ بن رواحہ رضی اللہ عنہ کا انتقال ہو گیا ہے نبی اکرم صلی اللہ علیہ وسلم نے فرمایا : وہ نہیں مرا ہے ، جب ان صاحب کو ہوش آیا جن پر پہلے بے ہوشی طاری تھی اور انہیں یہ بات بتائی گئی کہ نبی اکرم صلی اللہ علیہ وسلم آپ کے پاس آئے ہیں تو وہ نبی اکرم صلی اللہ علیہ وسلم سے ملے انہوں نے عرض کی : یا رسول اللہ ! مجھ پر بے ہوشی طاری ہوئی عورتوں نے چیخ کر کہنا شروع کیا ہائے زبردست آدمی ہائے پہاڑ تو ایک فرشتہ جس کے پاس گرز تھا اس نے اس گرز کو میری دونوں ٹانگوں کے درمیان رکھا اور بولا: جس طرح یہ عورت کہہ رہی ہے تم بھی اس طرح کہتے ہو ؟ میں نے کہا: جی نہیں اگر میں یہ کہہ دیتا جی ہاں تو اس نے مجھے ( گرز ) مار دینا تھا ۔
یہ روایت امام طبرانی نے معجم کبیر میں نقل کی ہے ۔ اعمش نامی راوی نے سیدنا عبداللہ بن عمرو رضی اللہ عنہ سے سماع نہیں کیا ہے محمد بن جابر حنفی نامی راوی کے بارے میں کلام کیا گیا ہے ۔

حسن بصری بیان کرتے ہیں : سیدنا معاذ بن جبل رضی اللہ عنہ پر بے ہوشی طاری ہوئی تو ان کی بہن نے یہ کہنا شروع کر دیا : ہائے پہاڑ یا اس کی مانند کوئی اور کلمہ کہا: جب انہیں ہوش آیا تو انہوں نے فرمایا : آج تم مجھے مسلسل اذیت پہنچا رہی ہو اس خاتون نے کہا: مجھ کو غم لاحق ہو ، اگر میں آپ کو اذیت پہنچاؤں تو سیدنا معاذ رضی اللہ عنہ نے فرمایا : ایک فرشتہ جو زبردست ڈانٹ پھٹک کرنے والا تھا جب بھی تم کہتی تھی یہ ایسا ہے ، تو وہ فرشتہ مسلسل یہ کہتا تھا کیا تم ایسے ہو ، تو میں کہتا تھا جی نہیں ۔
یہ روایت امام طبرانی نے معجم کبیر میں نقل کی ہے ۔ حسن بصری نے سیدنا معاذ رضی اللہ عنہ کا زمانہ نہیں پایا ہے ۔

مصعب بن نوح بیان کرتے ہیں : میں نے اپنی کچھ بوڑھی خواتین کو پایا جنہوں نے نبی اکرم صلی اللہ علیہ وسلم کے دست اقدس پر بیعت کی تھی وہ بیان کرتی ہیں : ایک مرتبہ ہم ( خواتین ) نبی اکرم صلی اللہ علیہ وسلم کی خدمت میں حاضر ہوئیں تو آپ نے ہم سے یہ عہد لیا کہ تم نوحہ نہیں کرو گی ۔ اس کے بعد راوی نے پوری حدیث ذکر کی ہے ۔
یہ روایت امام أحمد نے نقل کی ہے ، اور اس کے رجال ثقہ ہیں ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” میت کو اس چیز کی وجہ سے عذاب دیا جاتا ہے ، جو اس پر نوحہ کیا جاتا ہے “ ۔
یہ روایت امام بزار نے اور امام أحمد نے نقل کی ہے ۔ اس کی سند میں ایک راوی عمر بن ابراہیم عبدی ہے ، اس کے بارے میں کلام کیا گیا ہے ، اور وہ ثقہ ہے ۔

نبی اکرم صلی اللہ علیہ وسلم کی زوجہ محترمہ سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” کفار قریش میں سے ایک کافر مر گیا اس کے اہل خانہ اس پر رو رہے تھے ، اور یہ کہہ رہے تھے کھانا کھلانے والا جو ہنڈیاں کھلاتا تھا اور لڑائی کرنے والا جو ایسا تھا ، تو اللہ تعالیٰ نے ان لوگوں کے کہی ہوئی بات کی وجہ سے اس کے عذاب میں اضافہ کر دیا “ ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔