مجمع الزوائد ومنبع الفوائد

سیدنا جابر رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب سیدنا آدم علیہ السلام کے پہلے بچے کا انتقال ہوا تو سیدنا آدم علیہ السلام نے اپنی زوجہ سیدہ حواء رضی اللہ عنہا سے کہا: تمہارا بیٹا مر گیا ہے ۔ انہوں نے دریافت کیا : موت کیا ہوتی ہے ؟ سیدنا آدم علیہ السلام نے فرمایا : اب یہ نہ کچھ کھائے گا ، اور نہ کچھ پیئے گا نہ پکڑے گا نہ چلے گا جب سیدنا آدم علیہ السلام نے یہ بات کہی تو سیدہ حواء رضی اللہ عنہا نے چیخ ماری تو سیدنا آدم علیہ السلام نے کہا: اب تم پر اور تمہاری بیٹیوں پر رونا دھونا مقرر ہو گیا ہے ، اور میں اور میرے بیٹے اس سے لاتعلق ہوں گے تو اس کے بعد خواتین ( کسی میت پر زیادہ ) روتی پیٹتی ہیں “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی حسین بن سیار ہے ، اور وہ متروک ہے ۔

سیدنا ابوامامہ رضی اللہ عنہ نے سیدنا عمرو بن عبسہ رضی اللہ عنہ کے حوالے سے یہ بات نقل کی ہے : میں نے ان سے کہا: آپ ہمیں کوئی ایسی حدیث بیان کیجئے جو آپ نے نبی اکرم صلی اللہ علیہ وسلم کی زبانی سنی ہو اس میں کوئی کمی اور کوئی وہم باقی نہ ہو ، تو انہوں نے بتایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس شخص کے اسلام میں ( یعنی مسلمان ہونے کے دوران ) تین بچے پیدا ہوں اور پھر وہ بالغ ہونے سے پہلے فوت ہو جائیں تو اللہ تعالیٰ ان بچوں پر اپنی رحمت کی وجہ سے اس شخص کو جنت میں داخل کرے گا ، اور جو شخص ( کسی بھی چیز کا ) جوڑا اللہ کی راہ میں خرچ کرے گا ، تو جنت کے آٹھ دروازوں میں سے وہ جس بھی دروازے سے چاہے گا اللہ تعالیٰ اسے جنت میں داخل کر دے گا “ ۔
یہ روایت امام أحمد نے نقل کی ہے ۔ امام طبرانی نے اسے معجم کبیر میں اختصار کے ساتھ نقل کیا ہے ، اور اس میں صرف خرچ کرنے کا حصہ نقل کیا ہے ، اور انہوں نے یہ الفاظ نقل کیے ہیں : ” اللہ تعالیٰ اسے اور ان لوگوں کو اپنی رحمت کی وجہ سے جنت میں داخل کر دے گا “ ۔ اس روایت کی سند حسن ہے ۔

سیدنا عقبہ بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جس کے تین سگے بچے فوت ہو جائیں اور وہ اللہ کی راہ میں اللہ تعالیٰ کی ذات سے ان کے بارے میں ثواب کی امید رکھے اُس کے لئے جنت واجب ہو جائے گی “ ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ امام طبرانی کے رجال ثقہ ہیں ۔

محمد بن سیرین بیان کرتے ہیں : ایک خاتون نے ہمیں حدیث بیان کی وہ خاتون ہمارے ہاں آیا کرتی تھی اس کی نام ماویہ تھا اس کا بچہ نہیں بچتا تھا وہ خاتون عبیداللہ بن معمر قرشی کے پاس آئی ان کے پاس ایک صحابی موجود تھے ان صحابی نے یہ بات بیان کی کہ ایک مرتبہ ایک خاتون اپنے بچے کو ساتھ لے کر نبی اکرم صلی اللہ علیہ وسلم کی خدمت میں حاضر ہوئی اس نے عرض کی : یا رسول اللہ ! آپ اللہ تعالیٰ سے دعا کیجئے کہ وہ اس بچے کو میرے لئے رہنے دے کیونکہ اس سے پہلے میرے تین بچے فوت ہو چکے ہیں ۔ نبی اکرم صلی اللہ علیہ وسلم نے دریافت کیا : کیا تمہارے اسلام قبول کرنے کے بعد ؟ اس نے عرض کی : جی ہاں ۔ نبی اکرم صلی اللہ علیہ وسلم نے دریافت کیا : کیا تمہارے اسلام قبول کرنے کے بعد ؟ اس نے عرض کی : جی ہاں ۔ نبی اکرم صلی اللہ علیہ وسلم نے دریافت کیا : کیا تمہارے اسلام قبول کرنے کے بعد ؟ اس نے عرض کی : جی ہاں ۔ نبی اکرم صلی اللہ علیہ وسلم نے ارشاد فرمایا : یہ ایک مضبوط ڈھال ہے ۔ ماویہ نامی خاتون بیان کرتی ہیں : عبیداللہ بن معمر نے کہا: اے ماویہ تم اس بات کو سن لو محمد بن سیرین بیان کرتے ہیں : ماویہ نامی خاتون عبیداللہ بن معمر کے پاس سے نکلیں تو انہوں نے ہمیں یہ حدیث بیان کی ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں صرف ابن سیرین کی استانی ” ماویہ “ نامی خاتون کا معاملہ مختلف ہے ۔

سیدہ ام سلیم رضی اللہ عنہ جو سیدنا انس بن مالک رضی اللہ عنہ کی والدہ ہیں وہ بیان کرتی ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جس بھی دو مسلمان ( میاں بیوی ) کے تین بچے بالغ ہونے سے پہلے فوت ہو جائیں تو اللہ تعالیٰ ان بچوں پر اپنی رحمت کے فضل سے ان ( میاں بیوی ) کو جنت میں داخل کرے گا “ ۔
یہ روایت امام أحمد نے نقل کی ہے ، اور امام طبرانی نے معجم کبیر میں نقل کی ہے ۔ اس کی سند میں ایک راوی عمر بن عاصم انصاری ہے میں نے کسی کو اسے ” ثقہ “ قرار دیتے ہوئے یا اسے ” ضعیف “ قرار دیتے ہوئے نہیں پایا ہے ۔ اس روایت کے بقیہ رجال ” صحیح“ کے رجال ہیں ۔

ایک خاتون جن کا نام سیدہ رجاء رضی اللہ عنہا تھا وہ بیان کرتی ہیں : ایک مرتبہ میں نبی اکرم صلی اللہ علیہ وسلم کے پاس موجود تھی اسی دوران ایک خاتون اپنے بچے کو لے کر آپ کی خدمت میں حاضر ہوئی اس نے عرض کی : یا رسول اللہ ! آپ اللہ تعالیٰ سے اس بچے کے بارے میں میرے لئے برکت کی دعا کر دیں کیونکہ میرے تین بچے فوت ہو چکے ہیں ۔ نبی اکرم صلی اللہ علیہ وسلم نے دریافت کیا : کیا تمہارے اسلام قبول کرنے کے بعد ( تمہارے تین بچے فوت ہوئے ہیں ؟ ) اس نے عرض کی : جی ہاں ۔ نبی اکرم صلی اللہ علیہ وسلم نے ارشاد فرمایا : یہ ایک مضبوط ڈھال ہے تو ایک صاحب نے مجھ سے کہا: اے رجاء ! تم سن لو نبی اکرم صلی اللہ علیہ وسلم کیا ارشاد فرما رہے ہیں ۔
یہ روایت امام أحمد نے اور امام طبرانی نے معجم کبیر میں نقل کی ہے ، تاہم انہوں نے اس خاتون کا نام رحماء بیان کیا ہے ۔ اس روایت کے رجال ” صحیح“ کے رجال ہیں ۔

سیدنا عثمان بن ابوالعاص رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایسا شخص مضبوط ڈھال حاصل کر لیتا ہے ، جس کے اسلام قبول کرنے کے بعد ( یا مسلمان ہونے کے عالم میں ) تین بچے فوت ہو جائیں “ ۔
یہ روایت امام ابویعلیٰ نے نقل کی ہے ، اور امام بزار نے نقل کی ہے ، تاہم انہوں نے لفظ ” موٹی ڈھال “ نقل کیا ہے اسے امام طبرانی نے معجم کبیر میں نقل کیا ہے ۔ اس کی سند میں ایک راوی عبدالرحمن بن اسحاق ابوشیبہ ہے ، اور وہ ضعیف ہے ۔

عبدالرحمن بن عائذ بیان کرتے ہیں : شرحبیل بن سمط نے سیدنا عمرو بن عبسہ رضی اللہ عنہ سے کہا: کیا آپ مجھے کوئی ایسی حدیث بیان کریں گے جو آپ نے نبی اکرم صلی اللہ علیہ وسلم کی زبانی سنی ہو ؟ تو انہوں نے جواب دیا : جی ہاں ۔ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” اللہ تعالیٰ فرماتا ہے : میری محبت ان لوگوں کے لئے ثابت ہو جاتی ہے ، جو میری خاطر ایک دوسرے کے ساتھ مل کر صف بناتے ہیں اور میری محبت ان لوگوں کے لئے ثابت ہو جاتی ہے ، جو میری خاطر ایک دوسرے سے محبت کرتے ہیں جو بھی مؤمن مرد یا مومن عورت اپنے تین سگے بچے جو ابھی بالغ نہ ہوئے ہوں ان کے انتقال کا سامنا کرتے ہیں تو اللہ تعالیٰ ان بچوں پر اپنی رحمت کے فضل کی وجہ سے اس ( مومن مرد یا عورت ) کو جنت میں داخل کر دے گا “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی منبہ بن عثمان ہے میں نے کسی کو اس کے حالات بیان کرتے ہوئے نہیں پایا ہے ۔

سیدنا عبدالرحمن بن بشیر انصاری رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کے تین بچے فوت ہو جائیں جو ابھی بالغ نہ ہوئے ہوں تو وہ شخص صرف راستے کو عبور کرنے والے کے طور پر جہنم پر وارد ہو گا “ ۔ راوی کہتے ہیں : اس سے مراد یہ ہے کہ وہ پل صراط سے گزرتے ہوئے اس پر وارد ہو گا ۔ اس کے رجال کی توثیق کی گئی ہے صرف امام أحمد کے استاد أحمد بن مسعود مقدسی کا معاملہ مختلف ہے میں نے کسی کو اس کے حالات بیان کرتے ہوئے نہیں پایا ہے ۔

سیده حبیبه رضی اللہ عنہا نامی خاتون بیان کرتی ہیں : وہ سیدہ عائشہ صدیقہ رضی اللہ عنہا کے پاس موجود تھیں نبی اکرم صلی اللہ علیہ وسلم تشریف لائے آپ سیدہ عائشہ رضی اللہ عنہا کے پاس تشریف لائے آپ نے ارشاد فرمایا : جن بھی مسلمان میاں بیوی کے تین بچے بالغ ہونے سے پہلے فوت ہو جائیں تو انہیں قیامت کے دن لایا جائے گا یہاں تک کہ جنت کے دروازے پر کھڑا کیا جائے گا ، تو ان سے کہا: جائے گا تم لوگ جنت میں داخل ہو جاؤ تو وہ کہیں گے جی نہیں جب تک ہمارے ماں باپ داخل نہیں ہوتے تو ان سے کہا: جائے گا تم اور تمہارے ماں باپ جنت میں داخل ہو جاؤ ۔
یہ روایت امام طبرانی نے معجم کبیر میں نقل کی ہے ۔ اس کے رجال ” صحیح “ کے رجال ہیں صرف یزید بن ابوبکرہ کا معاملہ مختلف ہے ۔ ابن حبان نے اسے ” ثقہ “ قرار دیا ہے ۔ انہوں نے اس روایت کو ایک اور سند کے ساتھ دوبارہ بھی نقل کیا ہے ، اور اس کے رجال ثقہ ہیں اور اس کی سند میں یزید بن ابوبکرہ نامی راوی نہیں ہے باقی اللہ بہتر جانتا ہے ۔

زہیر بن علقمہ بیان کرتے ہیں : انصار سے تعلق رکھنے والی ایک خاتون نبی اکرم صلی اللہ علیہ وسلم کی خدمت میں اپنے بیٹے کے حوالے سے حاضر ہوئی جس کا انتقال ہو گیا تھا لوگوں نے اس خاتون کو ڈانٹا تو اس نے عرض کی : یا رسول اللہ ! میرے دو بیٹے اس سے پہلے فوت ہو چکے ہیں جو میرے اسلام قبول کرنے کے بعد فوت ہوئے ہیں اور اس کے علاوہ ہیں تو نبی اکرم صلی اللہ علیہ وسلم نے ارشاد فرمایا : تم نے جہنم سے بچنے کے لئے مضبوط بچاؤ ( رکاوٹ ) تیار کر لی ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔
( علامہ ہیثمی فرماتے ہیں : ) میں یہ کہتا ہوں ، اس کے بعد والے باب میں آگے چل کر ایک اور حدیث آئے گی ، اگر اللہ نے چاہا ۔

سنان جو سیدنا واثلہ رضی اللہ عنہ کے غلام ہیں وہ بیان کرتے ہیں : ریان کے صاحبزادے کا انتقال ہو گیا سیدنا واثلہ رضی اللہ عنہ اس کی آخری رسومات میں شریک ہوئے جب وہ قبرستان سے واپس آئے ، تو سیدنا واثلہ رضی اللہ عنہ دمشق کے دروازے کے پاس بیٹھ گئے جب ریان ان کے پاس سے گزرے تو سیدنا واثلہ رضی اللہ عنہ نے کہا: اے ابوسعید اللہ تعالیٰ تمہاری مصیبت کو ختم کرے اور تمہارے مرحوم کی مغفرت کرے میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص تین بچے دفن کر دیتا ہے اللہ تعالیٰ اس شخص پر جہنم کو حرام کر دیتا ہے “ ۔
یہ روایت امام طبرانی نے معجم کبیر میں نقل کی ہے ، اور سنان نامی راوی مجہول ہے ۔