مجمع الزوائد ومنبع الفوائد

سیدنا معاذ بن جبل رضی اللہ عنہ کے بارے میں یہ بات منقول ہے ان کے ایک صاحبزادے فوت ہو گئے تو نبی اکرم صلی اللہ علیہ وسلم نے ان کو خط لکھ کے ان کے صاحبزادے کے حوالے سے ان کے ساتھ تعزیت کی آپ نے انہیں خط میں یہ لکھا : ” اللہ تعالیٰ کے نام سے برکت حاصل کرتے ہوئے جو بڑا مہربان نہایت رحم کرنے والا ہے یہ اللہ کے رسول سیدنا محمد ( صلی اللہ علیہ وسلم ) کی طرف سے معاذ بن جبل کے نام ہے تم کو سلام ہو میں تمہارے سامنے اس اللہ کی حمد بیان کرتا ہوں جس کے علاوہ کوئی اور معبود نہیں ہے اما بعد اللہ تعالیٰ تمہیں عظیم اجر عطا کرے تمہیں صبر عطا کرے اور ہمیں اور تمہیں شکر کی توفیق عطا کرے کیونکہ ہماری جانیں ہمارے اموال اور ہمارے اہل خانہ اللہ تعالیٰ کا عطیہ ہیں اور اس کی طرف سے عارضی طور پر دی ہوئی چیز ہیں اللہ تعالیٰ نے تمہیں اس بچے کے حوالے سے خوشی اور سرور بخشا تھا اور پھر اسے تم سے واپس لے لیا جو بہت سے اجر کے ہمراہ ہے ، جو درود رحمت اور ہدایت کی شکل میں ہے اگر تم اس پر ثواب کی امید رکھتے ہو ، تو صبر سے کام لو اور تمہاری گریہ وزاری تمہارے اجر کو ضائع نہ کر دے کہ بعد میں تم ندامت کا شکار ہو جاؤ تم یہ جان لو کہ آہ وفغاں مردے کو واپس نہیں لاتی ہے ، اور غم کو ختم نہیں کرتی ہے ، جو کچھ نازل ہونا ہے وہ ہو کے رہے گا والسلام“ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی مجاشع بن عمرو ہے ، اور وہ ضعیف ہے ۔

سیدنا انس رضی اللہ عنہ روایت کرتے ہیں جب نبی اکرم صلی اللہ علیہ وسلم کا وصال ہوا تو آپ کے اصحاب آپ کے اردگرد غمگین بیٹھے ہوئے تھے اسی دوران ایک طویل القامت شخص آیا جس کا چہرہ روشن تھا اور زبان فصیح تھی اس نے تہبند باندھا ہوا تھا اور چادر اوڑھی ہوئی تھی کندھے کے بال زیادہ تھے ، اور سینے کے بال بھی زیادہ تھے وہ نبی اکرم صلی اللہ علیہ وسلم کے اصحاب کو پھلانگتا ہوا آگے آیا اور دروازے کی چوکھٹ کے پاس کھڑا ہو گیا وہ گھڑی بھر تک روتا رہا پھر اس نے یہ کہا: ہر مصیبت کے حوالے سے اللہ تعالٰی سے ہی مدد حاصل کی جا سکتی ہے ، اور ہر ہلاک ہونے والے کی جگہ وہی کفایت کرتا ہے ، اور ہر فوت ہونے والی چیز کا عوض عطا کرتا ہے ، تو تم لوگ اللہ تعالیٰ کی طرف رجوع کرو اس کی طرف رغبت رکھو کیونکہ مصیبت زدہ وہ شخص ہوتا ہے ، جسے ثواب نصیب نہ ہو حاضرین نے کہا: کیا تم لوگ ان صاحب کو جانتے ہو ؟ ان لوگوں نے دائیں بائیں دیکھا تو انہیں کوئی نظر نہ آیا تو سیدنا ابوبکر رضی اللہ عنہ نے بتایا : یہ نبی اکرم صلی اللہ علیہ وسلم کے بھائی سیدنا خضر علیہ السلام تھے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عباد بن عبدالصمد ابومعمر ہے ، جسے امام بخاری رحمہ اللہ نے ” ضعیف“ قرار دیا ہے ۔

سیدنا ابی بن کعب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم کسی شخص کو زمانہ جاہلیت کے طریقے کے مطابق تعزیت کرتے ہوئے دیکھو ، تو اس پر سختی ( سے ناراضگی ) کا اظہار کرو ، اور کنایہ نہ کرو “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔