مجمع الزوائد ومنبع الفوائد

سیدنا سابط رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب کسی شخص کو کوئی مصیبت لاحق ہو ، تو وہ اس مصیبت کو یاد کر لے جو میرے حوالے سے ہے کیونکہ وہ سب سے بڑی مصیبت ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ابوبردہ عمرو بن یزید ہے ، جسے ابن حبان نے ” ثقہ “ قرار دیا ہے ، اور دیگر حضرات نے اسے ” ضعیف “ قرار دیا ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم جنت البقیع میں ایک خاتون کے پاس سے گزرے جو ایک قبر کے پاس بیٹھی ہوئی رو رہی تھی ۔ نبی اکرم صلی اللہ علیہ وسلم نے اس سے فرمایا : اے اللہ کی کنیز ! تم اللہ تعالی سے ڈرو اور صبر سے کام لو اس عورت نے کہا: اے اللہ کے بندے ! میرا بچہ فوت ہو گیا ہے نبی اکرم صلی اللہ علیہ وسلم نے فرمایا : اے اللہ کی کنیز ! تم اللہ سے ڈرو اور صبر سے کام لو اس عورت نے کہا: اے اللہ کے بندے ! اگر تمہیں یہ مصیبت لاحق ہوئی ہوتی تو تم مجھے معذور سمجھتے ۔ نبی اکرم صلی اللہ علیہ وسلم نے فرمایا : اے اللہ کی کنیز ! تم اللہ سے ڈرو اور صبر سے کام لو اس عورت نے کہا: اے اللہ کے بندے ! تمہیں بات پتہ چل گئی ہے اب تم میرے پاس سے چلے جاؤ راوی بیان کرتے ہیں : تو نبی اکرم صلی اللہ علیہ وسلم تشریف لے گئے ، آپ کے اصحاب میں سے ایک شخص آپ کے پیچھے آ رہا تھا وہ عورت کے پاس ٹھہرا اس نے اس عورت سے دریافت کیا : جو صاحب ابھی گئے ہیں انہوں نے تم سے کیا کہا: تھا اس عورت نے کہا: انہوں نے مجھے یہ یہ کہا: تھا اس شخص نے کہا: کیا تم انہیں پہچانتی ہو ؟ اس عورت نے جواب دیا : جی نہیں اس شخص نے کہا: وہ اللہ کے رسول تھے راوی بیان کرتے ہیں : تو وہ عورت تیزی سے اٹھ کر آئی اور بولی: میں صبر سے کام لیتی ہوں میں صبر سے کام لیتی ہوں یا رسول اللہ ! نبی اکرم صلی اللہ علیہ وسلم نے ارشاد فرمایا : صبر صدمے کے آغاز میں ہوتا ہے صبر صدمے کے آغاز میں ہوتا ہے “ ۔
یہ روایت امام ابویعلیٰ نے نقل کی ہے ۔ امام بزار نے اس روایت کا ایک حصہ نقل کیا ہے ۔ اس کی سند میں ایک راوی بکر بن اسود ابوعبیدہ ناجی ہے ، اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا فضل بن عباس رضی اللہ عنہ کو حکم دیا کہ وہ آپ کے وضو کا پانی تیار کریں ، پھر نبی اکرم صلی اللہ علیہ وسلم قضائے حاجت کے لئے تشریف لے گئے جب آپ قضائے حاجت کے لئے تشریف لے جاتے تھے تو دور چلے جاتے تھے ، یہاں تک کہ آنکھوں سے اوجھل ہو جاتے تھے ، جب نبی اکرم صلی اللہ علیہ وسلم نے قضائے حاجت کر لی اور آپ واپس تشریف لا رہے تھے تو آپ کا گزر ایک خاتون کے پاس سے ہوا جو اپنے ایک مردہ کی قبر پر بیٹھی ہوئی تھی اور آہ وزاری کر رہی تھی ۔ نبی اکرم صلی اللہ علیہ وسلم اس عورت کے پاس ٹھہر گئے وہ عورت آپ کو پہچانتی نہیں تھی ۔ نبی اکرم صلی اللہ علیہ وسلم نے اس سے فرمایا تم اللہ تعالیٰ سے ڈرو اور صبر سے کام لو اس عورت نے کہا: اے اللہ کے بندے ! تم جاؤ اور جا کے اپنا کام کرو نبی اکرم صلی اللہ علیہ وسلم نے تین مرتبہ اس سے بات کی اور پھر آپ تشریف لے گئے آپ نے سیدنا فضل سے وضو کا پانی حاصل کیا سیدنا فضل اٹھ کر اس عورت کے پاس گئے اور اس سے کہا: اللہ کے رسول نے تمہیں کیا کہا: تھا ، تو وہ عورت کھڑی ہوئی اور بولی: ہائے بربادی یہ اللہ کے رسول تھے میں نے تو انہیں پہچانا ہی نہیں پھر وہ جلدی سے چلتی ہوئی آئی اور مسجد کے دروازے کے پاس نبی اکرم صلی اللہ علیہ وسلم تک پہنچ گئی اس نے عرض کی : یا رسول اللہ ! اللہ کی قسم میں نے آپ کو پہچانا نہیں تھا نبی اکرم صلی اللہ علیہ وسلم نے اس سے فرمایا صبر صدمے کے آغاز میں ہوتا ہے یہ بات آپ نے تین مرتبہ ارشاد فرمائی “ ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا ایک حصہ سیدنا انس رضی اللہ عنہ کے حوالے سے منقول ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یوسف بن عطیہ سعدی ہے ، اور وہ متروک اور ضعیف ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” صبر صدمے کے آغاز میں ہوتا ہے “ ۔
یہ روایت امام بزار نے نقل کی ہے ۔ اس کی سند میں ایک راوی واقدی ہے اس کے بارے میں بہت زیادہ کلام کیا گیا ہے اس کی توثیق بھی کی گئی ہے ۔