مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اللہ تعالیٰ نفس ( یعنی روح ) سے فرماتا ہے : تم نکل جاؤ ! تو وہ عرض کرتی ہے : میں صرف مجبوری کے عالم میں نکلوں گی تو اللہ تعالیٰ فرماتا ہے : تم نکل جاؤ اگرچہ تمہیں ناپسند ہو “ ۔
یہ روایت امام بزار نے نقل کی ہے ، اور اس کے رجال ثقہ ہیں ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن کی موت پیشانی کے پسینے کے ہمراہ ہوتی ہے “ ۔
یہ روایت امام بزار نے نقل کی ہے ۔ اس کی سند میں ایک راوی قاسم بن مطیب ہے ، اور وہ متروک ہے ۔

سیدنا عبداللہ بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن پیشانی کے پسینے کے ہمراہ مرتا ہے “ ۔
یہ روایت امام طبرانی نے معجم اوسط میں نقل کی ہے ، اور معجم کبیر میں ایک طویل حدیث کے ضمن میں نقل کی ہے ۔ اس کے رجال ثقہ ہیں اور صحیح کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مومن کی جان پسینے میں نکلتی ہے ، اور مجھے ایسی موت پسند نہیں ہے ، جو گدھے کی موت کی مانند ہو ، عرض کی گئی : گدھے کی موت کیا ہوتی ہے ؟ نبی اکرم صلی اللہ علیہ وسلم نے فرمایا : اچانک موت ، آپ نے فرمایا : کافر کی روح ، اُس کی باچھوں میں سے نکلتی ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی حسام بن مصک ہے ، اور وہ ضعیف ہے ۔

حارث بن خزرج نے اپنے والد کا یہ بیان نقل کیا ہے : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ( راوی بیان کرتے ہیں : ) ” نبی اکرم صلی اللہ علیہ وسلم نے انصار سے تعلق رکھنے والے ایک شخص کے سرہانے ملک الموت کو دیکھ کر ارشاد فرمایا : اے ملک الموت میرے ساتھی کے ساتھ نرمی کرنا کیونکہ یہ مؤمن ہے ، تو ملک الموت نے کہا: آپ اطمینان سے رہیں اور اپنی آنکھوں کو ٹھنڈا رکھیں آپ یہ بات جان لیں کہ میں ہر مومن کے لئے مہربان ہوں اے سیدنا محمد آپ یہ بات جان لیں کہ جب میں کسی انسان کی روح قبض کرتا ہوں اور اس کے اہل خانہ میں سے کوئی چیخ کر روتا ہے ، تو میں دروازے میں کھڑا ہو جاتا ہوں ۔ میرے ساتھ اس شخص کی روح ہوتی ہے میں دریافت کرتا ہوں : یہ شخص کون ہے ؟ اللہ کی قسم ہم نے اس پر کوئی ظلم نہیں کیا ہم نے اس کے مخصوص وقت سے پہلے اس کی روح کو قبض نہیں کیا اس کی متعین مقدار سے جلدی نہیں کی ، تو اس کی روح قبض کرنے میں ہمارا کیا گناہ ہے اگر تم لوگ اس چیز سے راضی ہو جو اللہ تعالیٰ نے طے کیا ہے ، تو تمہیں اجر نصیب ہو گا ، اور اگر تم غمگین ہوتے ہو ، اور ناراض ہوتے ہو ، تو تم پر بوجھ آئے گا ہمیں اس حوالے سے کوئی عتاب نہیں کیا جا سکتا کیونکہ ہم نے تو تمہارے پاس یکے بعد دیگرے آتے رہنا ہے ، تو تم احتیاط کرو احتیاط کرواے سیدنا محمد ( صلی اللہ علیہ وسلم ) ! ہر گھر خواہ وہ بالوں سے بنا ہوا ہو ، یا کچی مٹی سے بنا ہوا ہو نیک آدمی کا ہو ، یا گناہ گار کا ہو نرم جگہ پر ہو ، یا پہاڑ پر ہو میں ہر گھرانے میں روزانہ چکر لگاتا ہوں یہاں تک کہ میں ان کے چھوٹے اور بڑوں کو خود ان سے بھی زیادہ بہتر طور پر جانتا ہوں اللہ کی قسم ! اے سیدنا محمد ( صلی اللہ علیہ وسلم ) ! اگر میں کسی مکھی کی روح قبض کرنے کا ارادہ کروں تو میں اس کی بھی قدرت نہیں رکھتا جب تک اللہ تعالیٰ اس کی روح قبض کرنے کی اجازت نہیں دیتا ۔
جعفر بن محمد ( شاید اس سے مراد امام جعفر صادق ہیں : ) یہ فرماتے ہیں : مجھ تک یہ روایت پہنچی ہے کہ ملک الموت نمازوں کے اوقات کے وقت ان لوگوں کے گھروں میں آتا جاتا ہے ، اور جب وہ موت کے قریب کسی ایسے شخص کو پاتا ہے ، جو نمازیں باقاعدگی سے ادا کیا کرتا تھا ، تو ملک الموت اس کے پاس آ جاتا ہے ، اور شیطان اس شخص سے دور ہو جاتا ہے ملک الموت اسے« لا اله الا الله محمد رسول الله» پڑھنے کی تلقین کرتا ہے ، اور یہ بڑی بہترین حالت ہے ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عمر بن شمر جعفی اور ایک راوی حارث بن خزرج ہے میں نے کسی کو ان دونوں کے حالات بیان کرتے ہوئے نہیں پایا ہے ۔ اس روایت کے بقیہ رجال ” صحیح“ کے رجال ہیں امام بزار نے اس روایت میں سے ان الفاظ تک کا حصہ نقل کیا ہے : ” آپ یہ بات جان لیں کہ میں ہر مومن کے لئے مہربان ہوں“ ۔

سیدنا عبداللہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” مومن کی جان پسینے میں سے نکلتی ہے ، اور کافر کی جان یوں نکلتی ہے ، جس طرح گدھے کی جان نکلتی ہے مؤمن نے گناہ کیا ہوا ہوتا ہے ، تو مرتے وقت اس پر سختی کی جاتی ہے تاکہ یہ چیز اس کا کفارہ بن جائے اور کافر نے اچھائی کی ہوئی ہوتی ہے ، تو مرتے وقت اس پر آسانی کی جاتی ہے ، تاکہ وہ اس اچھائی کا بدلہ بن جائے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی قاسم بن مطیب ہے ، اور وہ ضعیف ہے ۔

سیدنا سلمان فارسی رضی اللہ عنہ بیان کرتے ہیں : نبی اکرم صلی اللہ علیہ وسلم انصار سے تعلق رکھنے والے ایک شخص کی عیادت کرنے کے لئے تشریف لے گئے جب آپ اس کے پاس تشریف لائے تو آپ نے اپنا دست مبارک اس کی پیشانی پر رکھا آپ نے دریافت کیا : تم کیا محسوس کر رہے ہو ؟ اس نے نبی اکرم صلی اللہ علیہ وسلم کو کوئی جواب نہیں دیا عرض کی گئی : یا رسول اللہ ! اس کی توجہ آپ کی طرف نہیں ہے نبی اکرم صلی اللہ علیہ وسلم نے ارشاد فرمایا : مجھے اور اس کو تنہا چھوڑ دو تو لوگ نبی اکرم صلی اللہ علیہ وسلم کے پاس سے اٹھ کر باہر چلے گئے اور نبی اکرم صلی اللہ علیہ وسلم کو وہیں رہنے دیا نبی اکرم صلی اللہ علیہ وسلم نے اپنا دست مبارک اٹھایا تو بیمار نے اشارہ کیا کہ آپ اپنا دست مبارک وہیں رکھ دیں جہاں پہلے موجود تھا ، تو نبی اکرم صلی اللہ علیہ وسلم نے دریافت کیا : اے فلاں تم کیا محسوس کر رہے ہو اس نے عرض کی : میں بھلائی محسوس کر رہا ہوں میرے پاس دو چیزیں آئی ہیں ان میں سے ایک سفید ہے ، اور دوسری سیاہ ہے نبی اکرم صلی اللہ علیہ وسلم نے دریافت کیا : ان میں سے کون سی تمہارے زیادہ قریب ہے ؟ اس نے جواب دیا : سیاہ والی نبی اکرم صلی اللہ علیہ وسلم نے ارشاد فرمایا : اس کا مطلب ہے بھلائی کم ہے ، اور برائی زیادہ ہے اس نے عرض کی : یا رسول اللہ ! آپ مجھے دعا سے نوازیے نبی اکرم صلی اللہ علیہ وسلم نے دعا کی اے اللہ ! زیادہ والی چیز ( یعنی گناہوں کی ) مغفرت کر دے اور تھوڑی والی چیز ( یعنی بھلائی ) کو بڑھا دے پھر نبی اکرم صلی اللہ علیہ وسلم نے دریافت کیا : تم کیا دیکھ رہے ہو ؟ اس نے عرض کی : بھلائی ، میرے ماں باپ آپ پر قربان ہوں بھلائی بڑھ رہی ہے ، اور میں برائی کو دیکھ رہا ہوں کہ وہ مضمحل ہو رہی ہے ، اور سیاہ چیز مجھ سے پیچھے ہٹ رہی ہے نبی اکرم صلی اللہ علیہ وسلم نے دریافت کیا : تمہارے عمل میں سے کون سا عمل تمہیں موزوں لگ رہا ہے ؟ اس نے جواب دیا : میں پانی پلایا کرتا تھا نبی اکرم صلی اللہ علیہ وسلم نے فرمایا : تم سن لو کیا تمہیں میری طرف سے کوئی چیز مختلف محسوس ہوئی سیدنا سلمان نے عرض کی : جی ہاں ۔ میرے ماں باپ آپ پر قربان ہوں میں نے آپ کو مختلف قسم کی صورت حال میں دیکھا ہے ، لیکن جس طرح کی صورت حال آج ہے اس طرح کبھی آپ کو نہیں دیکھا ہے نبی اکرم صلی اللہ علیہ وسلم نے ارشاد فرمایا : یہ جس چیز کا سامنا کر رہا ہے میں اس کو دیکھ رہا ہوں ہر ایک رگ موت کی تکلیف کو الگ سے محسوس کرتی ہے ۔
یہ روایت امام طبرانی نے معجم کبیر میں نقل کی ہے ۔ امام بزار نے اس کی مانند روایت نقل کی ہے ۔ اس کی سند میں ایک راوی موسیٰ بن عبیدہ ہے ، اور وہ ضعیف ہے ۔

سیدنا ابوایوب انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” مومن کی جان جب قبض کی جاتی ہے ، تو رحمت والے فرشتے اسے یوں ملتے ہیں جس طرح دنیا میں کوئی خوشخبری سنانے والا ملتا ہے وہ کہتے ہیں : تم اپنے ساتھی کا جائزہ لو کہ اس نے راحت حاصل کر لی ہے اس سے پہلے وہ شدید مشکل میں تھا پھر وہ اس سے دریافت کرتے ہیں کہ فلاں کا کیا حال ہے فلاں کا کیا حال ہے فلاں کا کیا حال ہے کیا اس نے شادی کر لی ہے ، جب وہ اس سے کسی ایسے شخص کے بارے میں دریافت کرتے ہیں جو پہلے مر چکا ہو تو وہ کہتا ہے ارے بھائی وہ تو مجھ سے پہلے ہی فوت ہو چکا ہے ، تو دوسرے لوگ کہتے ہیں : بے شک ہم اللہ تعالٰی کے مخصوص ہے ، اور بے شک ہم نے اسی کی طرف لوٹ کے جانا ہے وہ اپنے ٹھکانے حاویہ ( یعنی جہنم ) کی طرف چلا گیا ہو گا ، اور وہ برا ٹھکانہ ہے ، اور بری تربیت کرنے والی ہے ۔ ( نبی اکرم صلی اللہ علیہ وسلم نے ارشاد فرمایا : ) تمہارے اعمال اہل آخرت سے تعلق رکھنے والے تمہارے قریبی رشتہ داروں اور تعلق داروں کے سامنے پیش کیے جاتے ہیں اگر وہ عمل بہتر ہو تو وہ اس سے خوش ہوتے ہیں اور خوشخبری حاصل کرتے ہیں اور یہ کہتے ہیں : اے اللہ ! یہ تیرا فضل ہے ، اور تیری رحمت ہے ، تو اس پر اپنی نعمت کو مکمل کر دے اور اس نعمت پر اسے موت دینا اور برائی کرنے والے کا عمل بھی ان لوگوں کے سامنے پیش کیا جاتا ہے ، تو وہ کہتے ہیں : اے اللہ ! اسے نیک عمل کی ، توفیق دے جس کے ذریعے تو اس سے راضی ہو جائے اور تو اس کو اپنی بارگاہ میں مقرب کر لے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی مسلمہ بن علی ہے ، اور وہ ضعیف ہے ۔