مجمع الزوائد ومنبع الفوائد

سیدنا عقبہ بن عامر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” روزانہ کے ہر ایک عمل پر مہر لگائی جاتی ہے جب مؤمن بیمار ہوتا ہے ، تو فرشتے عرض کرتے ہیں : اے ہمارے پروردگار ! تو نے اپنے بندے کو محبوس کر دیا ہے ، تو پروردگار فرماتا ہے : اس کے عمل پر اس کے ( گزشتہ معمول کے مطابق ) مہر لگاؤ جب تک یہ تندرست نہیں ہو جاتا یا فوت نہیں ہو جاتا“ ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : جب بھی کوئی شخص اپنے جسم میں آزمائش ( یعنی بیماری ) میں مبتلاء ہوتا ہے ، تو اللہ تعالٰی اس کے محافظ فرشتوں کو حکم دیتے ہوئے ارشاد فرماتا ہے : میرے بندے کے لئے روزانہ دن اور رات میں اس کے مطابق ( اجر و ثواب ) نوٹ کرو جو بھلائی کا کام یہ پہلے کیا کرتا تھا جب تک یہ میری بندش میں ( یعنی بیماری کا شکار رہتا ہے ) ۔
یہ روایت امام أحمد امام بزار اور امام طبرانی نے معجم کبیر میں نقل کی ہے ۔ امام أحمد کے رجال ” صحیح “ کے رجال ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جب کوئی بندہ عبادت کے حوالے سے اچھے راستے پر گامزن ہوتا ہے ، اور پھر وہ بیمار ہو جائے ( اور سابقہ معمول کے مطابق عبادت نہ کر سکے ) تو اس پر مقرر فرشتے سے یہ کہا: جاتا ہے : تم اس کے اس عمل کی مانند نوٹ کرو جب یہ آزاد تھا ( یعنی بیمار نہیں تھا ) یہاں تک کہ میں اسے آزاد کر دوں ( یعنی بیماری ختم کر دوں ) یا اسے اپنی طرف بلا لوں “ ۔
یہ روایت امام أحمد نے نقل کی ہے ، اور اس کی سند صحیح ہے ۔

ابواشعث صنعانی بیان کرتے ہیں : وہ مسجد دمشق کی طرف گئے ۔ وہ جلدی چلے گئے تھے ان کی ملاقات سیدنا شداد بن اوس انصاری رضی اللہ عنہ سے ہوئی صنایحی ان کے ساتھ تھے راوی بیان کرتے ہیں : میں نے دریافت کیا : اللہ تعالیٰ آپ دونوں حضرات پر رحم کرے آپ کہاں جا رہے ہیں ؟ ان دونوں نے جواب دیا : ہم یہاں اپنے بھائی کی عیادت کرنے کے لئے جا رہے ہیں راوی بیان کرتے ہیں : میں بھی ان دونوں کے ساتھ روانہ ہو گیا یہ دونوں صاحبان اس شخص کے پاس گئے اور اس سے دریافت کیا : تمہارا کیا حال ہے ؟ اس نے جواب دیا : میں نے نعمت کے ہمراہ صبح کی ہے ، تو سیدنا شداد رضی اللہ عنہ نے اس سے فرمایا تم گناہوں کے کفارے اور خطاؤں کے مٹائے جانے کی خوشخبری قبول کرو کیونکہ میں نے نبی اکرم صلی اللہ علیہ وسلم کو یہ فرماتے ہوئے سنا ہے : ” بے شک اللہ تعالیٰ فرماتا ہے : جب میں اپنے کسی مؤمن بندے کو آزمائش ( یعنی بیماری ) کا شکار کرتا ہوں ، اور میں نے اسے جس آزمائش کا شکار کیا ہو اس کے حوالے سے وہ میری حمد بیان کرتا ہے ( تو اے فرشتو ) تم اس کے لئے اس کی مانند اجر نوٹ کرو جس طرح تم اس کے لئے اجر اس وقت نوٹ کرتے تھے ، جب وہ تندرست ہوتا تھا“ ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ۔ ان سب حضرات نے اسے اسماعیل بن عیاش کے حوالے سے راشد صنعانی سے نقل کیا ہے ، اور اہل شام کے علاوہ سے روایت نقل کرنے میں یہ ضعیف ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب اللہ تعالیٰ کسی مسلمان بندے کو اس کے جسم کے حوالے سے آزمائش ( یعنی بیماری ) میں مبتلاء کرتا ہے ، تو اللہ تعالیٰ فرشتے سے یہ فرماتا ہے : تم اس کا وہ نیک عمل نوٹ کرتے رہو جو یہ پہلے کیا کرتا تھا اگر اللہ تعالی اس کو شفاء نصیب کر دے تو اسے ( گناہوں کے حوالے سے ) دھو دیتا ہے ، اور پاک کر دیتا ہے ، اور اگر اس کی روح کو قبض کر لے تو اس کی مغفرت کر دیتا ہے ، اور اس پر رحم کرتا ہے “ ۔
یہ روایت امام ابویعلیٰ اور امام أحمد نے نقل کی ہے ، اور اس کے رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو بھی بندہ بیمار ہوتا ہے ، تو اللہ تعالیٰ اس کے محافظ فرشتے کو حکم دیتا ہے کہ وہ ( بندہ ) جو برائی کرے وہ ( فرشتہ ) اس کو نوٹ نہ کرے ، وہ شخص جو اچھائی کرئے ، وہ فرشتہ اسے دس نیکیوں کے طور پر نوٹ کرے اور اس کے اس نیک عمل کو بھی اس کے حق میں نوٹ کرتا رہے ، جو وہ عمل پہلے کیا کرتا تھا جب وہ تندرست ہوتا تھا خواہ ( بیماری کے دوران ) اس نے وہ عمل نہ کیا ہو “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی عبدالاعلیٰ بن ابومساور ہے ، اور وہ ضعیف ہے ۔

سیدنا عقبہ بن مسعود رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مومن پر اور بیماری میں اس کی گریہ وزاری کرنے پر حیرانگی ہوتی ہے اگر اسے یہ پتہ چل جائے کہ بیماری کا کیا ۔ اجر و ثواب اسے ملتا ہے ، تو وہ اس بات کو پسند کرے گا کہ وہ ہمیشہ بیمار رہے راوی بیان کرتے ہیں : پھر نبی اکرم صلی اللہ علیہ وسلم نے اپنا سر مبارک آسمان کی طرف اٹھایا اور ہنس پڑے عرض کی گئی : یا رسول اللہ ! آپ آسمان کی طرف سر اٹھا کر ہنسے کیوں ہیں ۔ نبی اکرم صلی اللہ علیہ وسلم نے ارشاد فرمایا : مجھے دو فرشتوں پر حیرانگی ہوئی وہ دونوں ایک بندے کو جائے نماز پر تلاش کر رہے تھے جہاں وہ موجود ہوتا تھا ان دونوں فرشتوں نے اُس کو نہیں پایا ، تو وہ دونوں واپس گئے ان دونوں نے عرض کی : اے ہمارے پروردگار تیرے فلاں بندے کا عمل ہم روزانہ دن اور رات میں نوٹ کیا کرتے تھے جو عمل وہ پہلے کیا کرتا تھا اب ہم نے اس کو پایا ہے کہ تو نے اسے اپنی رسی میں محبوس کر دیا ہے ( یعنی بیماری کا شکار کر دیا ہے ) تو اللہ تعالیٰ نے فرمایا : تم لوگ میرے بندے کے لئے اس کا وہی عمل نوٹ کرو جو وہ روزانہ دن اور رات میں عمل کیا کرتا تھا اور اس میں کوئی کمی نہ کرنا جب تک میں نے اسے محبوس رکھا ہے اس کا اجر میرے ذمہ ہے ، اور اس کو اس چیز کا اجر ملے گا ، جو وہ عمل پہلے کیا کرتا تھا“ ۔
یہ روایت امام طبرانی نے معجم اوسط میں نقل کی ہے ۔ امام بزار نے اسے اختصار کے ساتھ نقل کیا ہے ۔ اس کی سند میں ایک راوی محمد بن ابوحمید ہے ، اور وہ انتہائی ضعیف ہے ۔