مجمع الزوائد ومنبع الفوائد

عیاض بن غطیف بیان کرتے ہیں : ہم لوگ سیدنا ابوعبیدہ بن جراح رضی اللہ عنہ کی خدمت میں ان کی بیماری کی عیادت کے سلسلے میں حاضر ہوئے جو ان کو لاحق ہوئی تھی ان کی اہلیہ جو ایک کمزور خاتون تھیں جو ان کے سرہانے کے پاس بیٹھی ہوئی تھیں میں نے اُن سے دریافت کیا : سیدنا ابوعبیدہ رضی اللہ عنہ کیا حال ہے ؟ تو انہوں نے بتایا : اللہ کی قسم انہوں نے اجر کے ہمراہ رات بسر کی ہے ( یعنی رات بھر تکلیف کا شکار رہے ہیں ) تو سیدنا ابوعبیدہ رضی اللہ عنہ نے فرمایا : میں نے اجر کے ہمراہ رات بسر نہیں کی ہے پہلے ان کا رخ دیوار کی طرف تھا پھر انہوں نے اپنا رخ لوگوں کی طرف کر لیا اور ارشاد فرمایا : میں نے جو کہا: ہے تم اس کے بارے میں دریافت نہیں کرو گے ؟ لوگوں نے کہا: آپ نے جو کچھ کہا: ہے وہ ہمیں اچھا نہیں لگا کہ ہم اس کے بارے میں دریافت کرتے تو سیدنا ابوعبیدہ رضی اللہ عنہ نے بتایا : میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے : ” جو شخص اللہ کی راہ میں ایک اضافی چیز خرچ کرتا ہے ، تو اس کا سات سو گنا اجر و ثواب ہوتا ہے ، اور جو شخص اپنی جان پر یا اپنے اہل خانہ پر خرچ کرتا ہے ، یا بیمار کی عیادت کرتا ہے ، یا کسی تکلیف دہ چیز کو دور کرتا ہے ، تو ایک نیکی کا بدلہ دس گنا ہوتا ہے ، اور روزہ ڈھال ہے ، جب تک آدمی اسے توڑ نہ دے اور جس شخص کو اللہ تعالیٰ اس کے جسم کے حوالے سے کسی آزمائش میں مبتلا کرتا ہے ، تو یہ چیز اس کے لئے اس کے گناہوں کے کفارہ کا سبب بنتی ہے “ ۔
یہ روایت امام أحمد اور امام ابویعلیٰ اور امام بزار نے نقل کی ہے ۔ اس کی سند میں ایک راوی بشار بن ابوسیف ہے میں نے کسی کو اس کو ” ثقہ “ قرار دیتے ہوئے یا اس پر جرح کرتے ہوئے نہیں دیکھا ہے ۔ اس روایت کے بقیہ رجال ثقہ ہیں ۔

ابوزرعہ بستانی بیان کرتے ہیں : میں اپنے والد کے ساتھ اور دیگر کچھ لوگوں کے ساتھ سیدنا ابودرداء رضی اللہ عنہ کی عیادت کرنے کے لئے گیا وہ اس وقت ایک ایسے گھر میں موجود تھے ، جس کی دیواریں پرانی ( یا کمزور ) ہو چکی تھیں ، اور ان کا رخ دیوار کی طرف تھا ہم نے ان کی اہلیہ کو ان کے سرہانے پایا لوگوں نے اس خاتون سے دریافت کیا : سیدنا ابودرداء رضی اللہ عنہ نے کیسے رات بسر کی ؟ تو اس خاتون نے جواب دیا : انہوں نے اجر کے ہمراہ رات بسر کی ، تو سیدنا ابودرداء رضی اللہ عنہ نے اپنا چہرہ ہماری طرف کیا ، اور پھر فرمایا حقیقت وہ نہیں ہے ، جو اس عورت نے بیان کی ہے ۔ لوگ اس بات پر حیران ہوئے سیدنا ابودرداء رضی اللہ عنہ نے فرمایا ہے : کیا تم لوگ مجھ سے یہ نہیں پوچھو گے کہ میں نے یہ بات کیوں کہی ہے ؟ لوگوں نے کہا: آپ نے یہ بات کیوں کہی ہے ؟ تو انہوں نے فرمایا : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” مومن جب بیمار ہوتا ہے ، تو اسے بیماری کی وجہ سے اجر نہیں دیا جاتا بلکہ اس سے ( گناہوں کو ) دور کر دیا جاتا ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حفص بن عمر بن ابوالقاسم ہے میں نے کسی کو اس کا ذکر کرتے ہوئے نہیں پایا ہے ، اور اس روایت کے بقیہ رجال ثقہ ہیں ۔

ابومعمر بیان کرتے ہیں : جب ہم سیدنا عبداللہ بن مسعود رضی اللہ عنہ کی زبانی کوئی ایسی بات سنتے تھے جو ہمیں اچھی نہیں لگتی تھی تو ہم خاموش رہتے تھے ، یہاں تک کہ وہ خود ہی ہمارے سامنے اس کی وضاحت کر دیتے تھے ایک مرتبہ سیدنا عبداللہ بن مسعود رضی اللہ عنہ نے ہمارے سامنے یہ بات بیان کی کہ بیماری کی وجہ سے بیمار شخص کے لئے اجر نوٹ نہیں کیا جاتا ہمیں یہ بات بہت بری لگی ، اور ہم پر یہ بات بہت گراں گزری تو انہوں نے بتایا : اللہ تعالی بیماری کی وجہ سے گناہوں کو ختم کر دیتا ہے ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا جابر بن عبداللہ رضی اللہ عنہما بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جب بھی کوئی مؤمن مرد یا مومن عورت یا مسلمان مرد یا مسلمان عورت بیمار ہوتے ہیں تو اللہ تعالیٰ اس بیماری کی وجہ سے اس کے گناہوں کو ختم کر دیتا ہے “ ۔ ایک روایت میں یہ الفاظ ہیں : ” اللہ تعالیٰ اس سے اس کی خطاؤں کو ختم کر دیتا ہے “ ۔
یہ روایت امام أحمد امام ابویعلیٰ اور امام بزار نے نقل کی ہے ۔ امام أحمد کے رجال ” صحیح “ کے رجال ہیں ۔

سیدنا سائب بن خلاد رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو بھی تکلیف کسی مؤمن کو لاحق ہوتی ہے یہاں تک کہ اسے جو کانٹا لگتا ہے ، تو اللہ تعالیٰ اس کی وجہ سے بھی اس شخص کے لئے نیکی نوٹ کرتا ہے ، اور اس کی وجہ سے اس شخص کے گناہ کو ختم کر دیتا ہے “ ۔
یہ روایت امام أحمد نے نقل کی ہے ۔ اس کی سند میں ایک راوی رشدین ہے ، اور اس کے بارے میں کلام کیا گیا ہے ۔

سیدنا معاویہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو بھی چیز مومن کو اس کے جسم میں لاحق ہوتی ہے ، اور اسے اذیت کا شکار کرتی ہے ، تو اللہ تعالیٰ ( اس تکلیف کی وجہ سے ) اس مؤمن کے گناہ اس سے دور کر دیتا ہے “ ۔
یہ روایت امام أحمد نے امام طبرانی نے معجم اوسط میں نقل کی ہے ۔ اس روایت میں پورا واقعہ منقول ہے ۔ امام أحمد کے رجال ” صحیح “ کے رجال ہیں ۔

سیدنا اسد بن کرز رضی اللہ عنہ بیان کرتے ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بیمار کے گناہ یوں گرتے ہیں جس طرح درخت کے پتے جھڑتے ہیں “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم ایک درخت کے پاس تشریف لائے آپ نے اسے ہلایا تو اس کے پتے گرنے لگے جتنا اللہ کو منظور تھا کہ وہ گر جائیں پھر آپ نے ارشاد فرمایا : ” مصیبتیں اور تکلیفیں اولاد آدم کے گناہوں کو اس سے زیادہ تیزی سے گراتی ہیں جتنی ( تیزی سے ) میں نے اس درخت کے پتے گرائے ہیں “ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی جابر جعفی ہے ، اور وہ ضعیف ہے ۔

سیدنا ابودرداء رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” سر درد ، یا بخار ، مومن کے ساتھ لاحق ہوتے ہیں ، مؤمن کے گناہ اُحد پہاڑ کی مانند ہوتے ہیں ، تو جب وہ بیماری مؤمن کو چھوڑتی ہے ، تو اس پر رائی کے دانے کے وزن جتنا بھی گناہ باقی نہیں رہتا “ ۔
یہ روایت امام أحمد اور امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی ابن لہیعہ ہے ، جس کے بارے میں کلام کیا گیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بخار یا سر درد ، مسلسل کسی بندے یا کنیز کے ساتھ رہتے ہیں ، حالانکہ ان دونوں پر ” اُحد “ پہاڑ جتنے گناہ ہوتے ہیں ، لیکن یہ دونوں بیماریاں جب اسے چھوڑتی ہیں تو ان دونوں ( یعنی کسی بندے یا کنیز ) پر رائی کے وزن جتنا گناہ باقی نہیں رہا ہوتا“ ۔
یہ روایت امام ابویعلیٰ نے نقل کی ہے ، اور اس کے رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم کی خدمت میں عرض کی : یہ بیماریاں جو ہمیں لاحق ہوتی ہیں ان کے بارے میں آپ کی کیا رائے ہے کہ ہمیں ان کا کیا اجر ملے گا ؟ نبی اکرم صلی اللہ علیہ وسلم نے فرمایا : یہ کفارہ بن جاتی ہیں ۔ سیدنا ابی رضی اللہ عنہ نے عرض کی : خواہ وہ تھوڑی ہو ؟ نبی اکرم صلی اللہ علیہ وسلم نے فرمایا : ” خواہ کوئی کانٹا لگتا ہے ، یا اس سے بھی کمتر کوئی تکلیف لاحق ہوتی ہے “ ۔ رادی بیان کرتے ہیں : تو سیدنا ابی صلی اللہ علیہ وسلم نے اپنی ذات کے بارے میں یہ دعا کی تھی کہ مرتے دم تک انہیں ہمیشہ بخار رہے ، لیکن وہ بخار انہیں حج اور عمرے کی ادائیگی ، یا اللہ کی راہ میں جہاد میں حصہ لینے سے ، یا با جماعت فرض نماز ادا کرنے سے نہ روکے ، راوی بیان کرتے ہیں : تو ان کی مرتے دم تک یہ حالت رہی تھی کہ جو بھی شخص انہیں چھوتا تھا ، اُسے بخار محسوس ہوتا تھا ۔ میں یہ کہتا ہوں :
یہ روایت ” صحیح “ میں اس سیاق کے بغیر منقول ہے ۔
یہ روایت امام أحمد اور امام ابویعلیٰ نے نقل کی ہے ، اور اس کے رجال ثقہ ہیں ، سیدنا ابی بن کعب سے منقول حدیث آگے چل کر بخار سے متعلق باب میں آئے گی ۔

سیدنا جبیر بن مطعم رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ اپنے مؤمن بندے کو بیماری میں مبتلاء کرتا ہے یہاں تک کہ اس سے ہر گناہ کو دور کر دیتا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ۔ اس کی سند میں ایک راوی عبدالرحمن بن معاویہ بن حویرث ہے ، جسے یحیی بن معین نے ” ضعیف“ قرار دیا ہے ، اور ابن حبان نے اسے ثقہ کہا: ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کو اللہ کی راہ میں سر کے درد کی شکایت ہوتی ہے ، اور وہ ثواب کی امید رکھتا ہے ، تو اس کے پہلے کے تمام گناہوں کی مغفرت ہو جاتی ہے “ ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا عبدالرحمن بن ازہر رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب مؤمن کو تیز بخار ، یا بخار لاحق ہوتا ہے ، تو اس ( بیمار مؤمن ) کی مثال اس لوہے کی مانند ہوتی ہے ، جو آگ میں جاتا ہے ، تو اس کا میل ( یعنی زنگ ) چلا جاتا ہے ، اور پاکیزہ چیز باقی رہ جاتی ہے “ ۔
یہ روایت امام بزار اور امام طبرانی نے معجم کبیر میں نقل کی ہے ۔ اس کی سند میں ایک راوی ایسا ہے ، جو معروف نہیں ہے ۔

حسن بصری بیان کرتے ہیں : ہم لوگ سیدنا عمران بن حصین رضی اللہ عنہ کی خدمت میں حاضر ہوئے یہ ان کی اس شدید بیماری کے دوران کی بات ہے ، جو انہیں لاحق ہوئی تھی تو انہوں نے فرمایا : میں جو صورت حال دیکھ رہا ہوں ، اس کے حوالے سے میں آپ کے سامنے افسوس کا اظہار کرتا ہوں تو سیدنا عمران بن حصین رضی اللہ عنہ نے فرمایا : اے میرے بھتیجے ! ایسا نہ کرو ، اللہ کی قسم ! وہ چیز میرے نزدیک سب سے زیادہ محبوب ہے ، جو اللہ تعالیٰ کے نزدیک زیادہ پسندیدہ ہو ، اللہ تعالیٰ نے ارشاد فرمایا ہے : ” تمہیں جو بھی مصیبت لاحق ہوتی ہے ، تو وہ اس چیز کی وجہ سے ہوتی ہے ، جو تمہارے ہاتھوں نے کمایا ہوتا ہے ، اور وہ بہت سی چیزوں سے درگزر کرتا ہے “ ۔ تو یہ وہ چیز ہے ، جو میرے ہاتھوں نے کمائی ہے ، اور پھر میرے پاس میرے پروردگار کی معافی آ جائے گی ، جو باقی رہ جانے والی چیزوں کے بارے میں ہو گی ۔
یہ روایت امام طبرانی نے معجم کبیر میں نقل کی ہے ، اور اس کی سند حسن ہے ۔

سیدنا ابوامامہ باہلی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو بھی بندہ بیماری کے دوران ( اللہ تعالیٰ کی بارگاہ میں ) التجاء کرتا ہے ، تو اللہ تعالیٰ جب اسے اس بیماری سے اٹھاتا ہے ، تو وہ شخص پاک ہو چکا ہوتا ہے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سیدہ عائشہ صدیقہ رضی اللہ عنہا نبی اکرم صلی اللہ علیہ وسلم کا بیان نقل کرتی ہیں : ” جب مؤمن بیمار ہوتا ہے ، تو وہ ( بیماری ) اسے گناہوں سے یوں پاک کر دیتی ہے ، جس طرح بھٹی لوہے کے میل ( یعنی زنگ کو ) صاف کر دیتی ہے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں تاہم میں امام طبرانی کے استاد سے واقف نہیں ہوں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” اللہ کی راہ میں جس شخص کے سر میں درد ہو ، اور وہ ثواب کی امید رکھے اس شخص کے اس سے پہلے کے گناہوں کی مغفرت ہو جاتی ہے “ ۔
یہ روایت امام بزار نے نقل کی ہے ، اور اس کی سند حسن ہے ۔

ان کے حوالے سے یہ بات منقول ہے وہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو بھی مؤمن مرد یا مومن عورت بیمار ہوتے ہیں تو اللہ تعالیٰ ( اس بیماری کو ) اس کے گزشتہ گناہوں کا کفارہ بنا دیتا ہے “ ۔
یہ روایت امام بزار نے نقل کی ہے ۔ اس کی سند میں ایک راوی یوسف بن خالد سمتی ہے ، اور وہ ضعیف ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بیمار جب تندرست ہو جائے اور بیماری سے ٹھیک ہو جائے اس کی مثال اولوں کی مانند ہے ، جو آسمان سے گرتے ہیں ، ( یعنی ) اس کی صفائی اور اس کی رنگت کے حوالے سے ( اس کی مانند ہے ) “ ۔
یہ روایت امام بزار نے اور امام طبرانی نے معجم اوسط میں نقل کی ہے ۔ اس کی سند میں ایک راوی ولید بن محمد موقری ہے ، اور وہ ضعیف ہے ۔