مجمع الزوائد ومنبع الفوائد

یوسف بن عبداللہ بن سلام بیان کرتے ہیں : میں سیدنا ابودرداء رضی اللہ عنہ کے پاس رہا ، تاکہ اُن سے علم حاصل کرتا رہوں ، جب اُن کی وفات کا وقت قریب آیا ، تو انہوں نے فرمایا : لوگوں کو میرے قریب المرگ ہونے کی اطلاع دے دو ! میں نے لوگوں کو اطلاع دے دی ، میں آیا تو گھر بھر چکا تھا اور باہر بھی لوگ موجود تھے ، میں نے کہا: میں نے لوگوں کو آپ کے قریب المرگ ہونے کی اطلاع دیدی ہے ، تو گھر اور باہر لوگ بھر چکے ہیں ، تو انہوں نے فرمایا : تم مجھے باہر لے جاؤ ! ہم انہیں باہر لے آئے ، تو انہوں نے فرمایا : تم مجھے بٹھاؤ ! ہم نے انہیں بٹھا دیا ، انہوں نے فرمایا : اے لوگو ! میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص وضو کرتے ہوئے ، اچھی طرح وضو کرے اور پھر دو رکعات مکمل ادا کرے ، تو وہ اللہ تعالیٰ سے جو بھی چیز مانگے گا ، تو اللہ تعالیٰ اُسے وہ چیز جلدی عطا کر دے گا “ ۔ سیدنا ابودرداء رضی اللہ عنہ نے فرمایا : اے لوگو ! نماز کے دوران ادھر ادھر توجہ کرنے سے بچو ! کیونکہ ادھر ادھر توجہ کرنے والے کی نماز نہیں ہوتی ہے ، اگر مجبوراً ایسا کرنا پڑے ، تو نفل میں ایسا کر لو ، فرض میں ایسا نہ کرنا “ ۔
یہ روایت امام أحمد نے اور امام طبرانی نے معجم کبیر میں نقل کی ہے ، اس کی سند میں ایک راوی میمون ابومحمد ہے ، امام ذہبی کہتے ہیں : یہ معروف نہیں ہے ۔

یوسف بن عبداللہ بن سلام بیان کرتے ہیں : میں سیدنا ابودرداء رضی اللہ عنہ کی خدمت میں ان کی اس بیماری کے دوران حاضر ہوا ، جس میں اُن کا انتقال ہوا تھا ، انہوں نے فرمایا : اے میرے بھتیجے ! تم یہاں کس کام کے سلسلے میں آئے ہو ؟ ( یہاں راوی کو شک ہے ، شاید یہ الفاظ ہیں : ) تم کیوں آئے ہو ؟ تو یوسف بن عبداللہ نے کہا: میں صرف اُس تعلق کی وجہ سے آیا ہوں ، جو آپ کے اور میرے والد سیدنا عبداللہ بن سلام رضی اللہ عنہ کے درمیان تھا ، تو سیدنا ابودرداء رضی اللہ عنہ نے فرمایا : جھوٹ بولنے کے لئے یہ گھڑی بری ہے ( یعنی یہ گھڑی جب میں دنیا سے رخصت ہو رہا ہوں ) میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص وضو کرتے ہوئے ، اچھی طرح وضو کرے ، پھر کھڑے ہو کر دو رکعات ، یا چار رکعات ادا کرے ( یہ شک سہل نامی راوی کو ہے ) وہ اُن دونوں رکعت میں اچھی طرح سے رکوع اور خشوع کرے ، پھر وہ اللہ تعالیٰ سے مغفرت طلب کرے تو اُس کی مغفرت ہو جائے گی “ ۔
یہ روایت امام أحمد نے ، اور امام طبرانی نے معجم کبیر میں نقل کی ہے ، تاہم انہوں نے یہ الفاظ نقل کیے ہیں : ” پھر وہ کھڑا ہو کر دو یا چار رکعات ادا کرے ، خواہ وہ فرض ہوں یا نفل ہوں ، اور وہ اُن میں اچھی طرح رکوع و سجود کرے “ ۔ اس روایت کی سند حسن ہے ۔

سیدنا عثمان بن حنیف رضی اللہ عنہ بیان کرتے ہیں : ایک شخص اپنے کسی کام کے سلسلے میں سیدنا عثمان غنی رضی اللہ عنہ کے پاس آتا جاتا رہا ، لیکن سیدنا عثمان غنی رضی اللہ عنہ نے اس کی طرف توجہ نہیں دی ، اور اس کی ضرورت کا جائزہ نہیں لیا ، اُس شخص کی ملاقات سیدنا عثمان بن حنیف رضی اللہ عنہ سے ہوئی اس نے اس بات کی شکایت سیدنا عثمان بن حنیف رضی اللہ عنہ کے سامنے کی ، تو سیدنا عثمان بن حنیف رضی اللہ عنہ نے اس سے فرمایا : تم وضو کے برتن کے پاس جاؤ وضو کرو ، پھر تم مسجد میں آؤ ، اُس میں دو رکعات ادا کرو ، اور پھر یہ پڑھو : ” اے اللہ ! میں اپنے نبی سیدنا محمد صلی اللہ علیہ وسلم جو نبی رحمت ہیں ، اُن کے وسیلے سے تجھ سے سوال کرتا ہوں ، اور تیری طرف متوجہ ہوتا ہوں ، اے سیدنا محمد ! میں آپ کو اپنے پروردگار کی بارگاہ کی طرف متوجہ کرواتا ہوں ( کہ آپ میرے لئے یہ دعا کریں ) تاکہ پروردگار میری حاجت کو پورا کر دے “ ۔ ( پھر سیدنا عثمان بن حنیف رضی اللہ عنہ نے فرمایا : ) تم اپنے کام کا ذکر کرو اور پھر ادھر جب جاؤ گے ، تو میں بھی تمہارے ساتھ جاؤں گا ، وہ شخص چلا گیا ، سیدنا عثمان رضی اللہ عنہ نے جو اُسے بتایا تھا ، وہ اُس نے کیا ، پھر وہ سیدنا عثمان غنی رضی اللہ عنہ کے دروازے پر آیا ، تو دربان آیا ، اُس نے اس شخص کا ہاتھ پکڑا ، اور اسے سیدنا عثمان رضی اللہ عنہ کے پاس لے گیا ، سیدنا عثمان رضی اللہ عنہ نے اسے اپنے ساتھ اپنے بچھونے پر بٹھایا ، اور فرمایا : تمہیں کیا کام ہے ؟ اس شخص نے اپنی ضرورت کا ذکر کیا ، سیدنا عثمان رضی اللہ عنہ نے اُسے پورا کرنے کی ہدایت کی ، پھر اُس سے فرمایا تم نے اپنی ضرورت بتانے میں اتنی دیر کر دی ؟ پھر انہوں نے فرمایا : تمہیں جب بھی کوئی ضرورت ہو ، تو تم ہمارے پاس آ جایا کرو ، وہ شخص ان کے پاس سے نکلا ، تو اس کی ملاقات سیدنا عثمان بن حنیف رضی اللہ عنہ سے ہوئی ، اس شخص نے اُن سے کہا: اللہ تعالی آپ کو جزائے خیر عطا کرے ، پہلے تو وہ میری ضرورت کی طرف غور و فکر ہی نہیں کرتے تھے ، اور میری طرف توجہ ہی نہیں کرتے تھے ، آپ نے اُن سے میرے بارے میں بات چیت کی ، تو انہوں نے ایسا کیا ، تو سیدنا عثمان بن حنیف رضی اللہ عنہ نے فرمایا : اللہ کی قسم ! میں نے ان کے ساتھ کوئی بات نہیں کی ، ایک مرتبہ میں نبی اکرم صلی اللہ علیہ وسلم کے پاس موجود تھا ، ایک نابینا شخص آپ کی خدمت میں حاضر ہوا ، اُس نے بینائی رخصت ہونے کی شکایت آپ صلی اللہ علیہ وسلم سے کی ، تو نبی اکرم صلی اللہ علیہ وسلم نے ارشاد فرمایا : کیا تم صبر سے کام نہیں لیتے ؟ اس نے عرض کی : یا رسول اللہ ! مجھے ساتھ لے کے چلنے والا کوئی نہیں ہے ، اور مجھے بڑی پریشانی ہوتی ہے ، تو نبی اکرم صلی اللہ علیہ وسلم نے ارشاد فرمایا : تم وضو کے برتن کے پاس جاؤ ، وضو کرو ، پھر دو رکعات ادا کرو ، پھر یہ دعا کرو ، سیدنا عثمان بن حنیف رضی اللہ عنہ یہ بیان کرتے ہیں : اللہ کی قسم ! ابھی ہم وہاں سے اٹھے نہیں تھے ، اور گفتگو کیے ہوئے زیادہ دیر نہیں ہوئی تھی کہ وہ شخص نبی اکرم صلی اللہ علیہ وسلم کی خدمت میں حاضر ہوا ، تو یوں لگ رہا تھا کہ جیسے اُسے کوئی ضرر لاحق ہی نہیں تھا ( یعنی اس کی بینائی بالکل ٹھیک ہو چکی تھی ۔
( علامہ ہیثمی فرماتے ہیں : ) میں یہ کہتا ہوں : امام ترمذی اور امام ابن ماجہ نے اس روایت کا آخری حصہ نقل کیا ہے ، جو پورے واقعے کے علاوہ ہے ، امام طبرانی فرماتے ہیں : یہ حدیث صحیح ہے ، انہوں نے اس کے مختلف طرق ذکر کرنے کے بعد یہ بات بیان کی ہے ، جن طرق کے حوالے سے یہ روایت نقل کی ہے ۔