مجمع الزوائد ومنبع الفوائد

سیدنا عمرو بن عنبسہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” رات کی نماز دو ، دو کر کے ادا کی جائے گی ، اور رات کے آخری نصف حصے میں ، ( دعا یا عبادت ) زیادہ قبول ہوتی ہے “ ۔ راوی بیان کرتے ہیں : میں نے اپنے استاد سے دریافت کیا : لفظ ” اجوب “ کا مطلب کیا ہے ؟ انہوں نے فرمایا : اس سے مراد یہ ہے کہ ( دعا یا عبادت ) قبول ہوتی ہے ۔
یہ روایت امام أحمد نے نقل کی ہے ، اس کی سند میں ایک راوی ابوبکر بن ابومریم ہے ، اور وہ ” ضعیف“ ہے ، انہوں نے اسے اس سند کے ساتھ نقل کیا ہے ، تاہم اس میں یہ الفاظ ہیں : ” رات کا آخری نصف حصہ ، دعا کی قبولیت کے لئے زیادہ موزوں ہے “ ۔ میں نے دریافت کیا : لفظ ” اجوب “ کا مطلب کیا ہے ؟ انہوں نے فرمایا : جی نہیں ! بلکہ یہ لفظ ” اوجب“ ہے ۔

سیدنا عمار بن یاسر رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھ سے فرمایا : سونے سے پہلے وتر ادا کر لینا ، اور رات کی ( نفل ) نماز دو ، دو کر کے ادا کی جاتی ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ربیع بن بدر ہے ، اور وہ ” ضعیف “ ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” رات کی نماز دو ، دو کر کے ادا کی جاتی ہے ، اور وتر رات کے آخری حصے میں ایک رکعت ہوتی ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی لیث بن ابوسلیم ہے ، اور وہ ” ثقہ “ ہے ، تاہم وہ تدلیس کرنے والا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم دن کی ( نفل ) نماز دو ، دو کر کے ادا کرتے تھے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی علاء بن ہلال ہے ، اور وہ ” ضعیف“ ہے ۔